Mazwi 25 - Bhaibheri Rakachena muChindau

Mazwi Akangwara Amweni aSoromoni

¹ Aya ndiwo mazwi amweni akangwara aSoromoni, akateerwa ngavanhu vakuru vaHezekia mambo waJudha.

² Ndikwo kukudzwa kwaMwari kufisha zviro, asi kukudzwa kwemadzimambo ndikwo kutsvakisisa ndaa.

³ Kudai ngematenga paurebu, nenyika paudzamu, ndizvo mwoyo yemadzimambo aitsvakisiswi.

⁴ Dusa zvakashata kubva pasirivha, nomupfuri unozoanayo yokunasira chidziyo chakanaka.

⁵ Dusa vakashata kubva pamberi pamambo, nedendemaro rake rinozogwinyiswa mukururama.

⁶ Usadzikudza pamberi pamambo, nokuti kuema mundau dzevakuru;

⁷ ngokuti zvirinane kuronzerwa kuti, “Uya pano,” pane kuti udzaswe pashi mukuona kwomutongi. Wewaona ngemadziso ako,

⁸ usakasira kuenda kumutongi, ngokuti pamweni auzozii chokuita pakugumisira, apo muakirwana wako akutsverudza.

⁹ Nasira ndaa yako nomuakirwana wako, usikaronzi chakafishika choumweni;

¹⁰ ngokuti pamweni umweni unokuzwa unozounza kutsverudzwa padera pako nembiri yako yakashata aizoperi.

¹¹ Izwi raereketwa ngezvinosisira rakadai ngemichero inemiara yomukore mumitani yesirivha.

¹² Kudai ngendandazi yomukore, nokuti chinemeso chomukore ndizvo zvinoita mupangi wakangwara kunomunhu unopurutana.

¹³ Kudai ngokutonhora kwechando ngomukuwo wokucheka, ndizvo zvinoita nhumwa yakagondeka kwaari uwo unoituma; unomusirira mweya wemadzimambo ake.

¹⁴ Kudai ngemakore nedutu asina mvura inonaya ndizvo zvinoita umwe unodziganzisa ngechipo chaasikazi kupa.

¹⁵ Kubudikidza ngomwoyo wakapfaa mutongi unonyengererwa, norurumi rwakapfaa runogura magodo.

¹⁶ Kuti waona uchi, idya uhwo hwakakukwanira, nokuti pamweni ukadyisa, unozohurutsa.

¹⁷ Rutsoka rwako rusagara rwechipotera mumhatso yomuakirwana wako, kuti asazoneswa ndiwe nokukuzonda.

¹⁸ Kudai ngenduku yehondo, shoti, nokuti musee wakapinza ndizvo zvinoita uwo unoita chapupu chokunyepa kunomuakirwana wake.

¹⁹ Kudai ngezino rakaora, nokuti tsoka yakaremara, ndizvo zvinoita kugonda munhu usikagondeki ngomukuwo wokutambudzika.

²⁰ Kudai ngevhiniga yaiswa pachironda, wakadai ngouwo unokhumura bhachi ngomukuwo wechando ndizvo zvinoita uwo unoemba ngoma kunomwoyo unotambudzika.

²¹ Kuti gaa rako rapera ngenzara, ripe chingwa kuti ridye; nokuti rapera ngenyota, ripe mvura kuti rimwe;

²² ngokuti unozounganidza masimbe omuriro pasoro raro, naMambo Mwari unozokupa musharo.

²³ Dutu redera rinounza mvura yokunaya, norurumi runoreya runounza hope yakanyangadzwa.

²⁴ Kwakapinda kunaka kugara pakhona remhatso yepadera, kuno kugara mumhatso yakakura nomukadzi unoruzha.

²⁵ Kudai ngemvura inotonhorera kumweya unenyota, ndizvo zvinoita mashoko akanaka anobva kunyika iri kuretu.

²⁶ Kudai ngechinyuka chavhundurwa, nokuti rwizi rwasvipiswa, ndizvo zvinoita wakarurama unonyiswa pamberi pewakashata.

²⁷ Akuzi kunaka kudya uchi hwakawanda, nokuti kutsvaka kuremeredzwa padera pokuremeredzwa.

²⁸ Iye usikabati mweya wake wakadai ngedhorobha rakapwanyirwa pashi risina marukumbati.