Mazwi 24 - Bhaibheri Rakachena muChindau

¹ Usaemura vanhu vakashata, nokuti kudisisa kugara navo;

² ngokuti mwoyo yavo inoronga kuita zvakashata nemiromo yavo inoereketa zvakashata.

³ Mhatso inoakiwa ngoungwaru, nayo inogwinyiswa ngokuzwisisa;

⁴ ngokuzia mhatso yeshe inozadzwa ngoupfumi hwakanaka hunomutengo mukuru.

⁵ Murwi wehondo wakangwara wakagwinya kupinda unesimba; nouwo unokuzia unopinda uwo unesimba;

⁶ ngokuti ngokutungamirira kwakangwara unokona kurwa hondo yako; muuwandu hwevapangi munokunyisa.

⁷ Ungwaru auzwiki ngebenzi; pamusiwo aribeuri muromo waro.

⁸ Kunyazwi ndiani unotanda kuita zvakashata unozodaidzwa kuti muiti wezvakashata.

⁹ Mukarakadzo woupenzi kushaisha, nomuangarari uri chinyangadzo kwevari veshe.

¹⁰ Kudai wechidemera ngezuva rokutambudzika, simba rako idoko;

¹¹ kudai wechirekera kununura avo vanokweyiwa kupinda murufu, naavo vanothethereka kuenda mukuurawa;

¹² kudai wechiti, “Ringira, atizi kuchizia ichi;” uwo unopima mwoyo, aachizii here? Nouwo unongwarira mweya wako aachizii here? Aazounzidziri here kunomunhu weshe kudai ngemishando yake?

¹³ Mwana wangu, idya uchi, ngokuti hwakanaka, nemisoro youchi iyo inotapira mukuraira kwako.

¹⁴ Ziya kuti ungwaru hunotapira hwakadaro kumweya wako; kudai wechihuona, unozoona zvichauya, negonda rako arizoperi.

¹⁵ Usahwarira ugaro hwevakarurama, kudai ngedzongoni; usashaishira pandau apo panogara vakarurama;

¹⁶ ngokuti kunyazwi munhu wakarurama unowa kanomwe, unozomirukazve; asi vakashata vanozorigirwa pashi ngemadambudziko.

¹⁷ Usadakara apo gaa rako rechiwa, nomwoyo wako usadakara apo rapumhunwa,

¹⁸ ngokuti Mambo Mwari unozozviona nokunyangadzwa, naye unozodusa ushungu hwake kubva kweriri.

¹⁹ Usadzinesa ngendaa yevanhu vakashata. Usaemura vakashata;

²⁰ ngokuti wakashata aazooni musharo; chibani chewakashata chinozodzima.

²¹ Mwana wangu, itya Mambo Mwari namambo, usaiyana naavo vasikagarisiki;

²² ngokuti dambudziko rinouya ngokukasira kubva kwevari; ndiani unozia kupera kwavo veshe?

Mazwi Akangwara Amweni

²³ Ayawo mazwi evakangwara: Mukheto mukutonga auzi kunaka.

²⁴ Kunyazwi ndiani unoti kunewakashata, “Iwewe wakarurama,” uwo unozotukwa ngavanhu, madzinza anozomunyenya,

²⁵ asi avo vanorambidza wakashata vanozoa nokudakara, nechifumiso chakanaka chinozouya padera pavo.

²⁶ Uwo unopingura zvakanaka unozochingamidzwa ngomuromo.

²⁷ Nasirira mushando wako kubanze, udzinasirire zviro zveshe zvemunda; ngesure kwazvo aka mhatso yako.

²⁸ Usaita chapupu chokuitira ndaa muakirwana wako pasina ndaa; usachengedzera ngemiromo yako.

²⁹ Usaronza kuti, “Ndinozoita kwaari kudai ngezvaakaita kwendiri; ndinozohwirinzira kumunhu kudai ngomushando wake.”

³⁰ Ndakapinda ngepasinde pomunda wounenungo, nepasinde pomunda wemivhini womunhu usikazii;

³¹ ringira, waiya wamera minzwa, neshakura raiya rafukidza munda weshe, norushosha rwawo rwemapuwe rwaiya rwapwanyika.

³² Zvino ndakaona, ndakanasa kukarakadza; ndakaringira, ndikaashira kudzidziswa.

³³ Kuata kudoodoko, nokukutsira kudoodoko, nokupeta maoko kudoodoko kuata,

³⁴ nourombo unozouya padera pako kudai ngembavha, nokutama, kudai ngowakapfeka zvokurwa.