Mazwi 23 - Bhaibheri Rakachena muChindau

¹ Naapo wechigara pakudya nomutongi, nasa kuringira kakurutu uwo uri pamberi pako.

² Uise banga pahuro pako kuti uri munhu unodyisa.

³ Usaemura kudya kwake kwakanaka, ngokuti kudya kunochengedzera.

⁴ Usadzinesa pachako ngokuda kuita mupfumi; ita wakangwara, ubve kwezviri.

⁵ Naapo madziso ako aringira padera pahwo apachina; ngokuti ngokukasira upfumi hunozodziitisa maphaphiro; hunombururuka kuenda mudenga kudai ngegodzi.

⁶ Usadya chingwa chomunyimi; usaemura kudya kwake kwakanaka.

⁷ Ngokuti icho chaanopinimidza mumwoyo mwake ndizvo zvaari. Unoti kwouri, “Idya, wechimwa!” Asi mwoyo wake auronzi kudaro.

⁸ Unozorutsa zvidoko zvewadya newe unozorashikirwa ngemazwi ako akanaka.

⁹ Usaereketa mukuzwa kwebenzi, ngokuti rinozoshoora ungwaru hwemazwi ako.

¹⁰ Usadusa mujeki wekaretu; usapamba munda wenherera,

¹¹ ngokuti Muripiri wavo unesimba; unozoemerera ndaa yavo kwouri.

¹² Isa mwoyo wako mukudzidziswa nenzee dzako mumazwi oruziyo.

¹³ Usarekera kuorora mwana; kudai wechimuchaya ngendonga, aazofi.

¹⁴ Kudai wechimuchaya ngendonga, unozoponesa mweya wake kubva muSheori.

¹⁵ Mwana wangu, kudai mwoyo wako wakangwara, mwoyo wanguwo unozodakara.

¹⁶ Mweya wangu unozodakara, apo miromo yako inoereketa zvakarurama.

¹⁷ Usatendera mwoyo wako kuemura vakashata, asi angira mukutya Mambo Mwari mazuva eshe.

¹⁸ Ngegwinyiso zviripo zvichauya, nemagondero ako aazogurwi.

¹⁹ Izwa, mwana wangu, ungware, utungamirire mwoyo wako munjira.

²⁰ Usaapo pakati pevanokarira vhini, nokuti pakati pevanokarira kudya nyama;

²¹ ngokuti muraradzi nomudyisi vanozogumirwa ngourombo, nokukutsira kunozovasimidza mitsoto.

²² Purutana baba ako vakakubereka, usashoora mai ako apo vaamusharuka.

²³ Tenga gwinyiso, usaritengesa; tenga ungwaru, nokudzidziswa, nokuzwisisa.

²⁴ Baba vewakarurama vanozodakara kakurutu; nouwo unobara mwana wakangwara unodakara ndiye.

²⁵ Baba ako namai ako ngavadakare, uwo wakakubereka ngaadakare.

²⁶ Mwana wangu, ndipe mwoyo wako, namadziso ako anase kuringira njira dzangu.

²⁷ Ngokuti hure ihunza yakadzama; nomukadzi mupara mugodhi wakatetepa.

²⁸ Unohwarira kudai ngembavha, nokuwanza kusikagondeka pakati pevanhu.

²⁹ Ndiani unedambudziko? Ndiani unekusvipa mwoyo? Ndiani unehasha? Ndiani unoereketa zvisina shwiro? Ndiani unemaronda pasina ndaa? Ndiani unemadziso akatsvuka?

³⁰ Ndivo vanogara pavhini mukuwo wakareba, avo vanoenda kootsvaka vhini rakakumanidzwa.

³¹ Usaringira vhini apo ratsvuka, apo rechivhaira mutsani, nokudzerera pashi zvakanakisa.

³² Pakugumisira rinoruma kudai ngenyoka, nokuruma kudai ngebuura.

³³ Madziso ako anozoona zviro zvinoshamisa, nomwoyo wako unozoereketa zviro zvinopaukisa.

³⁴ Unozodai ngouwo unoata mukati mworuandhle, kudai ngounoata padera pomuti wengarava.

³⁵ Unozoti, “Vakandichaya, asi andizi kuremadzwa; vakandichaya, asi andizi kuzvizwa. Ndinozomuka riini? Ndinozotsvakazve kumwa rimweni.”