Mazwi 21 - Bhaibheri Rakachena muChindau

¹ Mwoyo wamambo rwizi rwemvura munyara yaMambo Mwari; unoutenderedza kweshe kwaanoda.

² Njira yeshe yomunhu yakarurama mukuona kwake; asi Mambo Mwari unopima mwoyo.

³ Kuita kururama nokutonga kwakanaka kunoashirika pamberi paMambo Mwari kupinda mudiro.

⁴ Madziso anoringira ngokudzikudza nomwoyo unodzikudza, chibani chevakashata, kushaisha.

⁵ Urongwa hwouwo unogwinyisira hunounza zvakawanda, asi weshe unokasira unounza kutama.

⁶ Kuona upfumi ngorurumi runonyepa imhute inohamba-hamba nomurau worufu.

⁷ Kugebenga kwavakashata kunozovapedza, ngokuti vanoramba kuita zvakarurama.

⁸ Njira yomushaishi yakashongoroka kakurutu; asi kuita kwewakaperera kwakanaka.

⁹ Zvirinane kugara pachikhona chemhatso yepadera, pano kugara mumhatso yakafara nomukadzi unehasha.

¹⁰ Mweya wewakashata unodisisa zvakashata; muakirwana wake aaoni nyasha mumadziso ake.

¹¹ Apo muangarari aororwa, usina kuzia unongwara; naapo wakangwara echidzidziswa, unoashira kuzia.

¹² Uwo Wakarurama unonasa kuringisa mhatso yowakashata; unokandira vakashata mukuparadzwa.

¹³ Uwo unotsiira nzee dzake kuvarombo vechichema, nayewo unozochema aazozwiki.

¹⁴ Chipo chakafishika chinopedza ushungu; nechitengero chiri muditi chinonyaradza ushungu hunotyisa.

¹⁵ Naapo kutonga kwakanaka kwaitwa, kunodakadza kunevakarurama, asi kuparadzwa kwevashandi vezvakashata.

¹⁶ Kunyazwi ndiani unopepesheka kubva munjira yokuzwisisa unozozorora muchiunga chevakafa.

¹⁷ Kunyazwi ndiani unoda kutamba unozoita murombo; kunyazwi ndiani unoda vhini nemafuta aazoiti mupfumi.

¹⁸ Wakashata muripo wewakarurama, nouwo usikagondeki muripo wewakarurama.

¹⁹ Zvirinane kugara murubaya, kuno kugara nomukadzi unehasha noushungu.

²⁰ Upfumi hunomutengo mukuru nemafuta zvinogara mumhatso yewakangwara, asi benzi rinozozvipedza.

²¹ Kunyazwi ndiani unoteera kururama nenyasha unoona kupona, kururama nokuremeredzwa.

²² Munhu umwe wakangwara unokwira koorwisa dhorobha rengwazi, nokupwanyira pashi rusvingo rwevanogonda.

²³ Uwo unongwarira muromo wake norurumi rwake, unongwarira mweya wake kubva mumadambudziko.

²⁴ Munhu unodzikudza nokudzitunhumadza, zina rake “Mudadi,” unoshanda ngemanyau mukudzikudza.

²⁵ Kudisisa kwomunhu unenungo kunomuuraya, ngokuti nyara dzake adzidi kushanda.

²⁶ Unoemura kakurutu zuva reshe, asi vakarurama avareki kupa.

²⁷ Mudiro wewakashata chinyangadzo; kunopinda kwakadini kunyangadza apo unounzwa nomupinimidzo wakashata!

²⁸ Chapupu chokunyepa chinozoparadzwa, asi munhu unopurutana zvakanaka unozoereketa zvakaperera.

²⁹ Munhu wakashata unokonzisa hope yake, asi wakarurama unokarakadza njira dzake.

³⁰ Apana ungwaru, apana kuzwisisa, apana kupanga kwakwo kunomukira Mambo Mwari.

³¹ Hachi ranasirirwa zuva rokurwa, asi kunyisa ngokwaMambo Mwari.