Mazwi 20 - Bhaibheri Rakachena muChindau

¹ Vhini mutsvinyi, nokumwa kunoradzisa kunopara bopoto; kunyazwi ndiani unobatwa ndizvo aazi kungwara.

² Kunyangadzwa kunotyisa kwamambo kwakadai ngokubhonga kwemhondoro; uwo unomunyangadza unoshaishira ndaramo pachayo.

³ Unoremeredzwa uwo unotiza kubva panoitwa hasha, asi benzi reshe rinokasira kuita hasha.

⁴ Munhu unenungo aarimi panguva yechando; kukukura kwaguma, naapo apana chiro chaanoonapo.

⁵ Biningidzo riri mumupinimidzo womunhu rakadai ngemvura yakadzama, asi munhu unokuzwisisa unozoichera.

⁶ Vanhu vazhinji vanodziteketesa pachavo kuita vanogondeka, asi ndiani ungaona munhu unogondeka?

⁷ Munhu wakarurama unohamba muugondeki hwake; vanomuchema vana vake vanoteera sure kwake.

⁸ Mambo unogara padendemaro rokutonga unorudza kushata kweshe ngemadziso ake.

⁹ Ndiani ungati, “Ndaita kuti mwoyo wangu ucheneswe; ndakachena kubva mukushaisha kwangu?”

¹⁰ Zvipimo zvakaparadzana nokupima kwakaparadzana, zveshe izvi zviri zvinonyangadza kunaMambo Mwari.

¹¹ Kunyazwi nomwana unodziita pachake kuti aziikanwe ngezviito zvake, kuti mushando wake wakaperera nokunaka.

¹² Nzee inozwa nedziso rinoona, Mambo Mwari wakasika zveshe.

¹³ Usade hope, kuti usaita murombo; beura madziso ako, newe unozogutiswa ngokudya kwakawanda.

¹⁴ “Chakashata, chakashata,” unoronza mutengi; zvino aenda, unoganza.

¹⁵ Uripo mukore, nemapuwe anomutengo mukuru; asi miromo yokuzia iri chinemeso chinomutengo mukuru.

¹⁶ Tora jira rake uwo wakagondisa mupara, utore chigondiso chakapuwa kuita chibatiso chomupara.

¹⁷ Chingwa chaoneka ngokuchengedzera chinotapira kunomunhu, asi ngesure muromo wake unozozara ngetsanza.

¹⁸ Mazano eshe anogwinyiswa ngokupangwa; urwe hondo ngokuteera kupangwa kwakangwara.

¹⁹ Uwo unoreya unobudisa zvakafishika; ndizvo usaiyana nouwo unonyanya kuereketa.

²⁰ Uwo unotuka baba ake nokuti mai ake, chibani chake chinozodzimwa muchidima chikuru.

²¹ Upfumi hunooneka ngokukasira pakutanga hauzofumiswi pamagumo awo.

²² Usati iwewe, “Ndinozounzidzira kushata;” garira Mambo Mwari, naye unozokudetsera.

²³ Zvipimo zvisikazi kuedzana zvinonyangadza kunaMambo Mwari, nechipimo chokunyepera achizi kunaka.

²⁴ Zvitsiko zvomunhu zvinotungamirirwa ndiMambo Mwari; zvino munhu ungaita mazwisisirenyi njira yake?

²⁵ Murau kunomunhu unopika ngokukasira echiti, “Chakachena,” nokutanga kupinimidza ngemhiko ngesure kwokupika mhiko.

²⁶ Mambo wakangwara unorudza vakashata nokuvatsika ngevhiri.

²⁷ Mweya womunhu chibani chaMambo Mwari chinotsvakisisa ngomukati mweshe.

²⁸ Nyasha nokugondeka zvinozongwarira mambo, nedendemaro rake rinozogwinyiswa ngenyasha.

²⁹ Uthende hwemajaha isimba ravo, asi unaku hwevasharuka imvi dzavo.

³⁰ Kuponda kunoremadza kunosuka kushata; kuponda kunochenesa marupande eshe omukati.