Mazwi 2 - Bhaibheri Rakachena muChindau

Musharo woUngwaru

¹ Mwana wangu, dai wechiashira mazwi angu, wechingwarira mipango yangu mweuri,

² wechiita kuti nzee yako ipurutane kuungwaru, wechiemesa mwoyo wako pakuzwisisa;

³ kudai ngegwinyiso wechichemera kuzia, nokudaidzira kuzwisisa;

⁴ kuti wechikutsvaka kudai ngesirivha, wechikutsvakisisa kudai ngokutsvaka upfumi hwakafishika,

⁵ zvino unozozwisisa kutyisa kwaMambo Mwari, nokuona ruziyo rwaMwari.

⁶ Ngokuti Mambo Mwari ndiye unopa ungwaru; kubva pamuromo wake panobuda ruziyo nokuzwisisa.

⁷ Unounganidzira vakarurama ungwaru kwahwo; ndiye chihlangu kwevari vanohamba ngokururama.

⁸ Unongwarira njira dzokutonga kwakarurama nokungwarira njira yevakacheneswa vake.

⁹ Zvino uchazwisisa kururama, nokutonga kwakarurama nokunaka, njira dzeshe dzakanaka;

¹⁰ ngokuti ungwaru huchapinda mumwoyo mwako, noruziyo runodakadza mweya wako;

¹¹ kungwara kuchakurinda nokuzwisisa kuchakungwarira.

¹² Kunozokuponesa kubva munjira yokushata, kubva kumunhu unoereketa zvinopaukisa,

¹³ uwo unosiya njira dzokururama, kuhamba munjira dzechidima;

¹⁴ unodakara mukuita zvakashata, echidakara mukupaukisa kwevakashata,

¹⁵ avo vanenjira dzakashongoroka, dzinopaukisa.

¹⁶ Unozoponeswa kubva kumukadzi unoomba, kubva kumhombo inochengedza ngemazwi ayo akaserera;

¹⁷ unoramba mwamuna woutsva hwake, nokuriyarwa chitenderano chakaitwa pamberi paMwari wake.

¹⁸ Ngokuti mhatso yake inokweera murufu, nenjira dzake kunevakafa.

¹⁹ Akuna unoenda kwaari unopetuka, nokuti kuuyirwazve ngenjira dzokupona.

²⁰ Ndizvo iwewe hamba munjira dzavanhu vakanaka, nokungwarira njira dzevakarurama.

²¹ Ngokuti vakarurama vanozogara munyika, nevakaperera vanozogara mukati mwayo;

²² asi vakashata vanozourawa kubva munyika, nevanopaukisa vanozobvitwa kubva kweiri.