Mazwi 19 - Bhaibheri Rakachena muChindau

¹ Wakapinda kunaka murombo unohamba mukururama kwake kuno uwo unopauka mukuereketa kwake, naye ibenzi.

² Kudisisa kusina kuzia akuzi kunaka, naye unokasira kuhamba unorasha njira.

³ Upenzi hwake munhu hunomutungamirira mukuparadzwa, asi mwoyo unonyangadzirwa Mambo Mwari.

⁴ Upfumi hunounza shamwari dzakawanda, asi murombo unosara asina shamwari.

⁵ Chapupu chokunyepa achizoendi chisikaororwi, nomunyepi aazopokonyoki.

⁶ Vazhinji vanotsvaka kuitirwa nyasha ngevanopa zvipo; nomunhu weshe ishamwari kwaari mupi wezvipo.

⁷ Kuti varombo vechizondwa kunyazwi ngehama dzavo, kunopinda kuita kuretu kwakaitawani kuneshamwari dzake kumusiya! Unovateera ngemazwi ake, asi vanoenda.

⁸ Uwo unoona ungwaru unodzida pachake; uwo unongwarira kuzwisisa unobudirira.

⁹ Chapupu chokunyepa achizoendi chisikaororwi, nomunyepi unozoparadzwa.

¹⁰ Azvizi kunaka kuti benzi rigare zvakanaka; kunopinda kushata kwakadini kuti hloko itonge padera pemadzimambo.

¹¹ Uwo unokuzwisisa unononoka kunyangadzwa, nokuremeredzwa kwake kunoita kuti asapinimidza ngokushaisha.

¹² Kunyangadzwa kwamambo kunotyisa kwakadai ngokubhonga kwemhondoro, asi nyasha dzake dzakadai ngebeto riri pamwenje.

¹³ Mukororo benzi uri pfumvu isikabviri kunababa ake, nokupopota kwomukadzi kwakadai ngemadonhwe asikaperi.

¹⁴ Mhatso noupfumi inhaka inobva kuvabereki, asi mukadzi wakangwara unobva kunaMambo Mwari.

¹⁵ Unungo hunopara hope zhinji; nomunhu unenungo unozotambudzika ngenzara.

¹⁶ Uwo unongwarira mipango unongwarira kupona kwake; asi iye unorekeredza njira dzake unozofa.

¹⁷ Kunyazwi ndiani unoitira varombo nyasha, unokweretesa kunaMambo Mwari, naye unozomuhwirinzira ngokuwandisa.

¹⁸ Orora mwana wako pachine gonda, nomweya wako usamukungurira ngendaa yokuparadzwa kwake.

¹⁹ Munhu unoushungu hukuru unozoripiswa; kuti ukamununura unozozviitazve.

²⁰ Izwa kupangwa, uashire kudzidziswa, kuti uite wakangwara pakugumisira kwako.

²¹ Arimwo mazano akawanda mumwoyo womunhu, asi kuda kwaMambo Mwari ndikwo kunozotsimiswa.

²² Chinodisiswa mumunhu kugondeka, nomurombo urinane kupinda munyepi.

²³ Kutya Mambo Mwari kunotungamirira muruponeso yaamho; wakazadzwa ndikwo unogara akagutiswa, naye aagumirwi ngokutambudzika.

²⁴ Munhu unenungo unotsira nyara yake muchidziyo, naye aazoiunzizve kumuromo wake.

²⁵ Chaya muangarari, nevasina kuzia vanozoona ungwaru; rambidza uwo unokuzwisisa, naye unozouyirwa ngokuzia.

²⁶ Uwo unoita ushungu kunababa ake, nokudzinga mai ake, mukororo unotsverudza nokuunza kushoorwa.

²⁷ Rekera kupauka, mwana wangu, kubva kumazwi oungwaru, kuitira kuti uzwe kudzidziswa.

²⁸ Chapupu chisina shwiro chinoshoora kutonga kwakanaka, nomuromo wewakashata unotangurira kushata.

²⁹ Kutongwa kwakanasirirwa vaangarari, nemboma pamishana yemapenzi.