Mazwi 17 - Bhaibheri Rakachena muChindau

¹ Zvakapinda kunaka kudya nzvuyu yaoma panokunyarara, kune mhatso yakazara ngokudya kwakanaka, pane hasha.

² Hloko yakangwara inozotonga padera pemwana uwo unotsverudza, nayo inozokoanisirwawo nhaka kudai ngoumwe wevemhuri.

³ Hari yokuerisa ngeyesirivha, nechoto ngechomukore, asi Mambo Mwari unoedza mwoyo.

⁴ Uwo unoita zvakashata unopurutana kumiromo yakashata; nomunyepi unopurutana kunorurumi rwakashata.

⁵ Uwo unoitira jee murombo unotuka Musiki wake; naye unodakara papfumvu aazokoreri kuororwa.

⁶ Vana vevana idzungudza revasharuka, nouthende hwevana vabereki vavo.

⁷ Kuereketa kwakanaka akusisiri benzi; kunopinda kwakaitawani kushata miromo inonyepa pamutongi.

⁸ Chitengero chakadai ngebuwe rinomutengo mukuru mukuona kwouwo unochipira; kunyazwi ngepari paanoenda, unozobudirira.

⁹ Uwo unokungurira kushaisha unotsvaka rudo, asi uwo unomusa ndaa unoparadzanisa shamwari kwadzo.

¹⁰ Kurambidza kunodetsera munhu wakangwara kupinda zana remizvimbiri pabenzi.

¹¹ Munhu wakashata unotsvaka kumukira kwega; asi nhumwa yakashata inozotumwa koorwisana naye.

¹² Kwakapinda kunaka kushongana nebheya rabirwa vana varo pane kushongana nebenzi muupenzi hwaro.

¹³ Uwo unounzidzira chakanaka ngechakashata, kushata akuzobvi pamhatso pake.

¹⁴ Kuamba kwehasha kwakadai ngomunhu unobeurira mvura; ndizvo rekerai hasha kusati kwashata.

¹⁵ Uwo unopembedza vakashata nounoitira ndaa vakarurama, ava veshe vari chinyangadzo kunaMambo Mwari.

¹⁶ Ngenyi benzi rinomutengo munyara wokutenga ungwaru, apo asina ungwaru hwokudzidza?

¹⁷ Mungani unorudo mukuwo weshe, nehama inoberekwa kuti idetsere mukutambudzika.

¹⁸ Munhu usina kuzwisisa unodzisunga nyara, echigondisa kuita chibatiso kumuakirwana wake.

¹⁹ Uwo unoda kupaukisa unoda hasha; uwo unomirudza mudenga musiwo wake unotsvaka kuparadzwa.

²⁰ Uwo unomukarakadzo wakashongoroka aabudiriri, naye unorurumi runopumhunisa unowira mukushata.

²¹ Uwo unobereka benzi unoona kutambudzika; vabereki vebenzi avana kudakara.

²² Mwoyo unodakara mutombo wakanaka, asi mweya wakaguka unoomesa magodo.

²³ Munhu wakashata unoashira chitengero chakafishika kupaukisa njira dzokutonga kwakanaka.

²⁴ Munhu unozwisisa unoringira kuungwaru; asi madziso ebenzi anoringira kumagumo enyika.

²⁵ Mukororo benzi unotambudza baba ake, nokutsinza mai ake vakamubereka.

²⁶ Kuripisa munhu wakarurama azvizi kunaka, nokuti kuchaya vanhu vakuru ngendaa yokururama.

²⁷ Uwo unotsonza mazwi ake wakazara ngokuzia; uwo wakanyarara mumweya unokuzwisisa.

²⁸ Kunyazwi benzi apo rakanyarara rinoerengwa kuti rakangwara; naapo rakonya miromo yaro, rinoerengwa kuti munhu wokuzwisisa.