Mazwi 15 - Bhaibheri Rakachena muChindau

¹ Mupinguro wakapfaa unodzinga ushungu, asi izwi rokugogodora rinomusa ushungu.

² Rurumi rwewakangwara runobudisa ruziyo, asi miromo yemapenzi inodurura upenzi.

³ Madziso aMambo Mwari ari kundau dzeshe, anoramba echiringira vakashata nevakanaka.

⁴ Rurumi rwakapfaa muti wokupona; asi kupaukisa kurimwo kunogura mweya.

⁵ Benzi rinoshoora kudzidzisa kwevabereki, asi uwo unongwarira kupangwa wakangwara.

⁶ Mumhatso yewakarurama muno upfumi hwakawanda, asi dambudziko rinowira mumisharo yewakashata.

⁷ Miromo yewakangwara inoteketesa kuzia; haiwa mumwoyo webenzi.

⁸ Mudiro wewakashata chinyangadzo kunaMambo Mwari, asi mukumbiro wewakarurama kudakara kwake.

⁹ Njira yewakashata chinyangadzo kunaMambo Mwari, asi unoda uwo unoteera kururama.

¹⁰ Kuripo kuororwa kukurutu kwaari uwo unosiya njira, asi uwo unozonda kurambidzwa unozofa.

¹¹ Sheori naAbhadhoni zvakabeuka pamberi paMambo Mwari, kwakapinda kwakadini kubeuka kwemwoyo yevanhu!

¹² Muangarari aadi kurambidzwa; aazoendi kunevakangwara.

¹³ Mwoyo unodakara unoita hope inodakara, asi ngokutambudzika kwomwoyo mweya unogurwa.

¹⁴ Mwoyo wouwo unokuzwisisa unotsvaka kuzia, asi muromo yemapenzi inodya zvoupenzi.

¹⁵ Mazuva eshe omurombo akashata, asi mwoyo unodakara unedhiri risikaperi.

¹⁶ Zvishomani pamwepo nokutya Mambo Mwari zvakapinda kunaka kunoupfumi hwakawanda hunemadambudziko.

¹⁷ Kwakapinda kunaka kudya muriwo panerudo, kuno kudya kabi yakakodzwa pano kuzondana.

¹⁸ Munhu unoushungu unomusa hasha, asi uwo unononoka kushishwa unonyaradza hasha.

¹⁹ Njira younenungo yakazara minzwa, asi njira yewakarurama yakaserera iri pamhene.

²⁰ Mwana wakangwara unodakadza baba ake, asi benzi rinoshoora mai aro.

²¹ Upenzi kudakara kwaari uwo usina ungwaru, asi munhu unokuzwisisa unohamba mukururama.

²² Pasina kupangana, urongwa hunokorera, asi pane vapangi vazhinji hunobudirira.

²³ Munhu unodakara ngokupingura kwakanaka, kunakanyi kweizwi rinoereketwa ngomukuwo kwawo!

²⁴ Kunewakangwara njira yokupona inokwira, kuitira kuti apokonyoke kubva pashi muSheori.

²⁵ Mambo Mwari unoputsira pashi mhatso younodzikudza, asi unotsimisa migano yeshirikadzi.

²⁶ Urongwa hwakashata chinyangadzo kunaMambo Mwari, asi mazwi enyasha akaperera.

²⁷ Uwo unokara ngokuda kuuyirwa kusina shwiro unounza dambudziko kumhatso yake, asi uwo unozonda zvitengero unozorarama.

²⁸ Mwoyo wewakarurama unopinimidza ngenjira yakanaka yokupingura, asi muromo wewakashata unorukura zvakashata.

²⁹ Mambo Mwari uri kuretu kubva kunewakashata, asi unozwa mikumbiro yevakarurama.

³⁰ Kujeka kwamadziso kunodakadza mwoyo, nemashoko akanaka anokodza magodo.

³¹ Nzee inopurutana kupangwa kwokupona inogara pakati pavakangwara.

³² Uwo unoramba kudzidziswa unoshoora mweya wake, asi uwo unopurutana kupangwa unouyirwa ngokuzwisisa.

³³ Kutya Mambo Mwari kudzidziswa muungwaru, nokupfaa kunotanga pamberi pokuremeredzwa.