Mazwi 14 - Bhaibheri Rakachena muChindau

¹ Mukadzi wakangwara unoaka mhatso yake, asi benzi rinoipwanyira pashi ngenyara dzaro.

² Uwo unohamba mukururama unotya Mambo Mwari; asi uwo unopauka munjira dzake unomushoora.

³ Kuereketa kwebenzi indonga inochaya mushana waro; asi miromo yevakangwara inovangwarira.

⁴ Apo pasina kabi, apana zviyo; zviyo zvakawanda zvinounzwa ngesimba rekabi.

⁵ Chapupu chinogondeka achinyepi; asi chapupu chinonyepa chinofemurika manyepo.

⁶ Muangarari unotsvaka ungwaru, asingahuoni; asi kuzia kwakarerukira kwaari uwo unozwisisa.

⁷ Ibva pamberi pebenzi ngokuti apo auonipo mazwi okuzia.

⁸ Ungwaru hwewakangwara kuzwisisa kwaanoenda, asi upenzi hwemapenzi kupausa.

⁹ Mapenzi anoitira jee mudiro wokushaisha; asi vakarurama vanodakadzwa ngenyasha dzaMwari.

¹⁰ Mwoyo unozia kurwadziwa kwawo, akuna mupara ungakoanisirana kudakara kwawo.

¹¹ Mhatso yewakashata yaparadzwa, asi tende rewakarurama rinoema zvakanaka.

¹² Iripo njira inooneka yakarurama kumunhu, asi magumo ayo injira yorufu.

¹³ Kunyazwi mukusheka mwoyo unotambudzika, nemagumo okudakara kudzimbirwa.

¹⁴ Mupauki unozoashira musharo unosisira njira dzake, nomunhu wakanaka unosisirana nokuita kwake.

¹⁵ Benzi rinogonda zviro zveshe, asi munhu wakangwara unonasa kuringira kuhamba kwake.

¹⁶ Munhu wakangwara unotya, nokutenderuka kubva kunezvakashata, asi benzi rinorasha kudzibata arina ndaa yezviro.

¹⁷ Uwo unoshatirwa ngokukasira unoita zvoupenzi, nomunhu uneurimbwi unozondwa.

¹⁸ Mapenzi anogara nhaka youpenzi, asi vakangwara vanedzungudza rokuzia.

¹⁹ Vakashata vanogwadama pamberi pevakarurama, vakashata vanogwadama pamisiwo yevakarurama.

²⁰ Varombo avadiwi ngevaakirwana vavo, asi makurudza anevangani vakawanda.

²¹ Uwo unoshoora muakirwana wake mushaishi, asi unomuchena uwo unenyasha kuvarombo.

²² Avashaishi here avo vanoronga zvakashata? Avo vanoronga zvakanaka vanoona nyasha nokugondeka.

²³ Mumishando yeshe yesimba munokuuyirwa, asi kuereketa kwega kunounza urombo.

²⁴ Dzungudza revakangwara upfumi hwavo; asi upenzi ndiro dzungudza remapenzi.

²⁵ Chapupu chegwinyiso chinoponesa ndaramo, asi chapupu chinoereketa manyepo muparadzi.

²⁶ Mukutya Mambo Mwari muno kugonda kwakagwinya, nevana vake vanozoona pokutizira.

²⁷ Kutya Mambo Mwari chinyuka chokupona, kuitira kuti munhu akone kukunukuka kubva kumirau yorufu.

²⁸ Uthende hwamambo huri mukuwanda kwevanhu; pasina vanhu uzvare hwaparara.

²⁹ Kunyazwi ndiani unononoka kunyangadzwa unokuzwisisa kukurutu, asi uwo unokasira kushishwa unowanza upenzi.

³⁰ Mwoyo wakaterama unopa kupona kwenyama, asi ndurumwa inoita kuora kwemagodo.

³¹ Uwo unotambudza murombo unotuka Musiki wake, asi uwo unoitira nyasha varombo unomuremeredza.

³² Munhu wakashata unoparadzwa kubudikidza ngokuita kwake kwakashata, asi wakarurama unegonda mukufa kwake.

³³ Ungwaru hunogara mumwoyo mwounokuzwisisa, asi icho chiri mukati mwemapenzi achiziikanwi.

³⁴ Kururama kunokudza dzinza, asi kushaisha kunotsverudza dzinza kumyazwi ngeriri.

³⁵ Muranda unoita ngokungwara unoona nyasha dzaMambo, asi ushungu hwake huri padera pouwo unoita zvinotsverudza.