Mazwi 13 - Bhaibheri Rakachena muChindau

¹ Mwana wakangwara unoda kupanga kwababa ake, asi muangarari aapurutani kurambidzwa.

² Kubva kumichero yemazwi avo vanhu vakanaka vanodya zviro zvakanaka, asi chidisiso chounopaukisa ngechokuita zvakashata.

³ Uwo unobata muromo wake unongwarira kupona kwake; uwo unobeura yaamho muromo wake unopinda mukuparadzwa.

⁴ Kudisisa kwoune nungo kunokurisa, naye aaoni chiro; asi kudisisa kwounogwinyisira kushanda kunogutisa yaamho.

⁵ Munhu wakarurama unonyenya manyepo, asi munhu wakashata unoshooreka, unotsverudzwa.

⁶ Kururama kunongwarira uwo wakarurama munjira, asi kushata kunowisa mushaishi.

⁷ Umwe unodziita mupfumi, asi asina chiro; umweni unodziita murombo, asi unoupfumi hwakawanda.

⁸ Muripo wokupona kwomunhu upfumi hwake, asi murombo aazwi kurambidzwa.

⁹ Kujeka kwewakarurama kunojeka zvinodakadza, asi chibani chewakashata chinodzimwa.

¹⁰ Kudzikudza kunobara hasha kwega, asi ungwaru hune uwo unopurutana kupangwa.

¹¹ Upfumi hunooneka ngokukasira hunokasira kupera, asi iye unounganidza padoko-padoko uchahuwanza.

¹² Gonda rinononoka kuitika rinorwarisa mwoyo, asi chidisiso chaitika muti wokupona.

¹³ Uwo unoshoora izwi unodziunzira kuparadzwa padera pake, asi uwo unotya mupango unozothuswa.

¹⁴ Kudzidzisa kwewakangwara chinyuka chokupona, kuti munhu apokonyoke pamurau worufu.

¹⁵ Kuzwisisa kwakanaka kunounza kudikanwa, asi njira yevasikagondeki kuparadzwa.

¹⁶ Wakangwara unoita zviro zveshe ngokuzia; asi benzi rinobudisa pamhene upenzi hwaro.

¹⁷ Nhumwa yakashata inounza dambudziko, asi nhumwa inogondeka inounza kupona.

¹⁸ Urombo nokutsverudzwa ndiwo muthuso wouwo unoramba kudzidziswa, asi uwo unongwarira kupangwa unoremeredzwa.

¹⁹ Chidisiso chaitika chinotapira mumweya, asi kukunukuka kubva kuchishaishi chinyangadzo kunemapenzi.

²⁰ Kunyazwi ndiani unohamba nevanhu vakangwara unongwara, asi unozwanana nemapenzi unoremadzwa.

²¹ Kushata kunorumbirira vashaishi, asi kubudirira kunopuwa kunevakarurama.

²² Munhu wakanaka unosiira nhaka kunevana vevana vake, asi upfumi hwomushaishi unozongwaririrwa vakarurama.

²³ Munda womurombo ungakukurwa zvokudya zvakawanda, asi zvinoparadzwa kubudikidza ngokutamika kwokururama.

²⁴ Uwo usikashandisi ndonga unozonda mwana wake, asi iye unomuda unomuorora kazhinji.

²⁵ Vakarurama vanazvo zvakakwana zvokugutisa mweya yavo; asi ndani yewakashata ayina chiro.