Mazwi 12 - Bhaibheri Rakachena muChindau

¹ Kunyazwi ndiani unoda kupangwa unoda kuzia, asi uwo unozonda kupangwa ibenzi.

² Munhu wakanaka unoona nyasha kubva kunaMambo Mwari, asi uwo unoronga zvakashata Mambo Mwari unomurasha.

³ Apana unoona kungwaririka ngokushata, asi runzinde rwewakarurama aruzokutukuswi.

⁴ Mukadzi wakanaka idzungudza kumwamuna wake; asi uwo unounza kutsverudzwa wakadai ngezvakaora mumagodo ake.

⁵ Mipinimidzo yewakarurama yakanaka; kupanga kwevakashata ngekwokuchengedzera.

⁶ Mazwi ewakashata ngeokuhwarira kuparadza ngazi, asi kuereketa kwewakarurama kunomununura.

⁷ Vakashata vanoparadzwa, navo avachaapopi; asi mhatso yewakarurama inozoema.

⁸ Munhu unokuriswa ngendaa youngwaru hwake hwakanaka, asi mupinimidzo unopauka unoshoorwa.

⁹ Kwakapinda kunaka kushoorwa nokua nemuranda, kune uwo unodziita usikabviri asina chokudya.

¹⁰ Munhu wakarurama unozia zvinodiwa mukupona kwechifuyo chake, asi nyasha dzewakashata kushata.

¹¹ Uwo unorima munda wake unozogutiswa ngokudya kwakawanda, asi uwo unoteera vanhu vasina shwiro aana kuzwisisa.

¹² Vakashata vanoemura kupamba kwevanhu vakashata, asi runzinde rwevakarurama runobara michero.

¹³ Vakashata vanobatwa ngokubvotomoka kwemiromo yavo, asi vakarurama vanopokonyoka kubva mudambudziko.

¹⁴ Kubva kumichero yomuromo munhu unogutiswa ngezviro zvakanaka, nomushando wenyara unemusharo wawo.

¹⁵ Benzi rinopinimidza kuti njira yaro yakanaka mukuona kwaro, asi wakangwara unopurutana kupangwa.

¹⁶ Benzi rinokasira kuonisa ushungu hwaro, asi munhu wakangwara aadairi kutukwa.

¹⁷ Kunyazwi ndiani unoereketa gwinyiso, unoonisa kururama kwezvakaitika; asi chapupu chokunyepa chinoereketa kuchengedzera.

¹⁸ Mazwi okukasira kuereketa akadai ngokubaya kweshoti, asi rurumi rwowakangwara runounza kuporeswa.

¹⁹ Miromo yegwinyiso inogara mhera nariini, asi rurumi runonyepa runogara mukuwo mufupi.

²⁰ Kuchengedzera kuri mumwoyo yaavo vanoronga zvakashata, asi avo vanopanga zvokunyarara vanekudakara.

²¹ Apana kuremadzwa kunoitika kunevakarurama; asi vakashata vachazadzwa ngokutambudzika.

²² Miromo inonyepa chinyangadzo kunaMambo Mwari, asi avo vanoita ngokugondeka vari kudakara kwake.

²³ Munhu uwo wakangwara unofisha ruziyo, asi mwoyo yemapenzi inopopota zvoupenzi.

²⁴ Nyara youwo unogwinyisira inozotonga, apo unenungo unozoitwa hloko.

²⁵ Kunyunyuta mumwoyo womunhu kunopedza simba, asi izwi rakanaka rinoita kuti udakare.

²⁶ Wakarurama unopanga vangani vake zvakanaka, asi njira yevakashata inopaukisa.

²⁷ Unenungo aakochi chaakabata ngokuvhima, asi unogwinyisira unoona upfumi unomutengo mukuru.

²⁸ Munjira yokururama muno kupona; mukuhamba munjira yakwo amuna rufu.