Mazwi 11 - Bhaibheri Rakachena muChindau

¹ Chipimo chokunyepera chinyangadzo kunaMambo Mwari, asi chipimo chakanaka chiri kudakara kwake.

² Apo kudzikudza kwouya, zvino kutsveruka kunouya; asi ungwaru huri kunevakapfaa.

³ Kugondeka kwavakarurama kunovatungamira, asi kusikarurama kwevapauki kunovaparadza.

⁴ Upfumi ahudetseri ngezuva roushungu, asi kururama kunonunura kubva murufu.

⁵ Kururama kwewakaperera kunongwarira njira yake yakarurama, asi wakashata unowiswa ngokushaisha kwake.

⁶ Kururama kwevakaperera kunovanunura, asi vapaukisi vanobatwa muusungwa ngokuronga kwavo.

⁷ Naapo munhu wakashata paanofa, kugonda kwake kunopera, nemagondero evasikadiri Mwari anoita asina shwiro.

⁸ Wakarurama unonunurwa kubva mukutambudzika, newakashata unotowiramwo.

⁹ Usikadiri Mwari unoparadza muakirwana wake ngomuromo wake, asi ngokuzia vakarurama vanonunurwa.

¹⁰ Naapo vakarurama vechibudirira, dhorobha rinodakara; naapo vakashata vechipera, kunopururidzwa.

¹¹ Dhorobha rinokudzwa ngezvifumiso zvevakarurama, asi rinoparadzwa ngemiromo yevakashata.

¹² Kunyazwi ndiani unoshoora muakirwana wake aazi kungwara, asi munhu wakangwara unonyarara.

¹³ Mureyi unohamba echibudisa zvakafishika, asi uwo unogondeka mumweya unonyarara nazvo.

¹⁴ Apo pasina kupangwa vanhu vanowa, asi muchiunga chevapangi muno kungwaririka.

¹⁵ Uwo unoita chibatiso kumupara unozodziunzira dambudziko, asi kuripo kungwaririka kunouwo unoramba kuita kudaro.

¹⁶ Mukadzi unomwoyo wakanaka unoremeredzwa; asi mwamuna unoushungu unouyirwa ngoupfumi hwega.

¹⁷ Munhu unenyasha unoitira zvakanaka kumweya wake, asi uwo wakashata unodzitambudza pachake.

¹⁸ Munhu wakashata apana chaanouyirwa ndicho, asi uwo unokusha kururama unoona musharo kwawo.

¹⁹ Kunyazwi ndiani wakagwinya mukururama unozopona, asi kunyazwi ndiani unorumbirira kushata unozofa.

²⁰ Mipinimidzo yakashongoroka chinyangadzo kunaMambo Mwari, asi avo vakarurama munjira dzavo vari kudakara kwake.

²¹ Gondiswai, wakashata aazorekeri kuororwa; asi avo vakarurama vanozopokonyoka.

²² Kudai ngechinemeso chomukore pamiro penguruve, ngezvakaita mukadzi wakanaka usina ungwaru.

²³ Kudisisa kwewakarurama kunoperera mukunaka kwega; kudisisa kwevakashata kunoperera muushungu.

²⁴ Vamweni vanopa ngokuda, asi vechiangira kuita vapfumi; vamweni vanobatirira zvevanosisira kupa, navo vanoangira kutama.

²⁵ Munhu unopa unozoitwa gurudza, nouwo unopa mvura unozoona mvura.

²⁶ Vanhu vanotuka uwo unonyima zviyo, asi chifumiso chiri padera pesoro rouwo unozvitengesa.

²⁷ Kunyazwi ndiani unogwinyisira kutsvaka zvakanaka, unotsvaka nyasha; asi kushata kunouya kwaari unokutsvaka.

²⁸ Uwo unogonda muupfumi hwake unozowa, asi vakarurama vanozobudirira kudai ngemashakani akasvipira.

²⁹ Uwo unotambudza mhatso yake unozogara nhaka yedutu, nebenzi rinozoita muranda kunevakangwara.

³⁰ Michero yewakarurama muti wokupona; nouwo unotenderudza mweya wakangwara.

³¹ Kuti vakarurama vechipuwa musharo munyika, kunozopinda kwakaitawani kukura kunevakashata nevashaishi!