Mazwi 10 - Bhaibheri Rakachena muChindau

Mazwi Akangwara aSoromoni

¹ Mwana wakangwara unodakadza baba ake, asi mwana benzi idambudzo kunamai ake.

² Upfumi hwokushata ahudetseri chiro, asi kururama kunozonunura kubva murufu.

³ Mambo Mwari aatenderi vakarurama kuti vafukame, asi unopaukisa kudisisa kwevakashata.

⁴ Nyara inenungo inounza urombo, asi nyara youwo unogwinyisira inounza upfumi.

⁵ Mwana unounganidza muzienza wakangwara, asi mwana unoata ngomukuwo wokukukura unotsverudza.

⁶ Zvifumiso zviri padera pesoro rewakarurama, asi muromo wewakashata unofisha ugebengwa.

⁷ Kukarakadzwa kwewakarurama chifumiso, asi zina rewakashata rinozoora.

⁸ Wakangwara mumwoyo unozopurutana mipango, asi benzi rinobwaza rinozouya mukuparadzwa.

⁹ Kunyazwi ndiani unohamba mukururama, unohamba mukungwaririka; asi kunyazwi ndiani unoteera njira dzinopaukisa unozooneka.

¹⁰ Kunyazwi ndiani unochonya ngedziso rake unozounza madambudziko, asi benzi rinobwaza rinozouya mukuparadzwa.

¹¹ Muromo wowakarurama chinyuka chokupona, asi muromo wowakashata unofisha ugebenga.

¹² Kuzonda kunomusa hasha, asi rudo runofukidza zvishaishi zveshe.

¹³ Pamiromo youwo unokuzwisisa panooneka ungwaru, asi ndonga ngeyokuchaya mushana wouwo usikazwisisi.

¹⁴ Vanhu vakangwara vanounganidza ruziyo, asi kubwaza kwebenzi kunounza pasinde kuparadzwa.

¹⁵ Upfumi hwegurudza ndiro dhorobha raro rakagwinya; kuparadzwa kwevarombo ndihwo urombo hwavo.

¹⁶ Musharo wevakarurama unotungamirira mukupona, asi kuuyirwa kwevakashata kunotungamirira mukushaisha.

¹⁷ Kunyazwi ndiani unongwarira kudzidziswa uri munjira yokupona, asi iye unoramba kurambidzwa unopauka.

¹⁸ Miromo inonyepa inofisha kuzonda, kunyazwi ndiani unoreya vamweni ibenzi.

¹⁹ Naapo mazwi awanda kushaisha akutamiki, asi iye unobata muromo wake wakangwara.

²⁰ Rurumi rwowakarurama rwakadai ngesirivha yakapinda kunaka; mupinimidzo wewakashata auna shwiro.

²¹ Miromo yevakarurama inogutisa vazhinji, asi mapenzi anofa ngendaa yokutama kuzwisisa.

²² Kufumisa kwaMambo Mwari ndikwo kunounza upfumi, naye aatutsiri kusvipo mwoyo ndikwo.

²³ Kuita zvakashata kwakadai ngokutamba kunebenzi, asi kuita ngoungwaru kudakadzwa kunomunhu unozwisisa.

²⁴ Icho chaanotya wakashata chinozouya padera pake, asi chidisiso chowakarurama chinozopuwa kwaari.

²⁵ Naapo chipupuri chapinda, vakashata avachazoapo; asi vakarurama vakagwinyiswa mhera nariini.

²⁶ Kudai ngevhini rinozhazha mumazino, nokudai ngechiushi mumadziso, ndizvowo zvinoita unenungo kuneavo vanomutuma.

²⁷ Kutya Mambo Mwari kunorebesa ndaramo; asi makore evakashata anozofupiswa.

²⁸ Kugonda kwavakarurama kunogumira mukudakara; asi magondero ewakashata anozopera.

²⁹ Njira yaMambo Mwari ibako kunevakarurama asi kuparadzwa kunevaiti vezvakashata.

³⁰ Vakarurama avazotsukunuswi; asi vakashata avazogari munyika.

³¹ Muromo wewakarurama unobudisa ungwaru, asi rurumi runopaukisa runozogurwa.

³² Miromo yewakarurama inozia izvo zvinoashirika, asi miromo yewakashata inozia izvo zvinopaukisa.