Mazwi 1 - Bhaibheri Rakachena muChindau

Mutengo Mukuru weMazwi Akangwara

¹ Mazwi akangwara aSoromoni mukororo waDhavhidha, mambo waIsuraeri:

² Kudzidzisa ungwaru nokudzidziswa, kuzwisisa mazwi oungwaru,

³ Kuuyirwa ngokudzidziswa kuita muungwaru, kururama, kutonga kwakanaka nekwakarurama;

⁴ kudzidzisa ungwaru kuneavo vasina ruziyo noungwaru kuvatsva.

⁵ Munhu wakangwara ngaazwewo, auyirwe mukudzidza, newakangwara atsvake ungwaru,

⁶ kuzwisisa mazwi akangwara nemadimikira, mazwi evakangwara nezvisana zvavo.

Kupangwa kweMajaha

⁷ Kumutya Mambo Mwari ndikwo kuamba kwokuzia; mapenzi anoshoora kungwara nokudzidziswa.

⁸ Izwa, mwana wangu, kudzidzisa kwababa ako, usaramba kudzidzisa kwamai ako;

⁹ ngokuti zviri chinemeso chakanaka chesoro rako, neketani mumutsipa wako.

¹⁰ Mwana wangu, kuti vashaishi vechikuonga, usatenda.

¹¹ Kuti vechiti, “Hamba nesu, ngatigare tiparadze ngazi, ngatihwarire avo vasina ndaa;

¹² ngativatangurire vechizwa, kudai ngeiba, vari mimhu kudai ngaavo vanodzaka muhunza.

¹³ Tinozotsvaka zveshe zviro zvinomutengo mukuru, tinozozadza mhatso dzedu ngezvakachakatwa.

¹⁴ Itai mabhigidha enyu pakati pedu; tinozoita chikhwama chimwecho teshe.”

¹⁵ Mwana wangu, usahamba navo munjira yavo; dusa tsoka yako munjira yavo;

¹⁶ ngokuti tsoka dzavo dzinorumbirira kunezvakashata, navo vanokasira kuparadza ngazi.

¹⁷ Ngokuti akudetseri chiro kuteya murau mukuona kweshiri,

¹⁸ asi vanohwarira kudziuraya pachavo! Vanohwarira kupona kwavo!

¹⁹ Ndizvo zvakaita njira yomunhu weshe unokarira kuuyirwa; kunodusa kupona kwevane vakwo.

Ungwaru Hunodaidza

²⁰ Ungwaru hunodaidzira mupato; hunodaidzira neizwi guru mumaruwanze.

²¹ Hunodaidzira mundau huru yomusika, pamisiwo yedhorobha hunoereketa.

²² “Munozoda zvoupenzi mukuwo wakadini, imwimwi musina ungwaru? Nevanoshoora vanozodakara mukuwo wakadini mukushoora kwavo nemapenzi enonyenya kuzia?

²³ Purutanai kudzidzisa kwangu. Ringirai, ndinozodurura kwomuri mweya wangu, ndinozoita kuti mazwi angu aziikanwe kwomuri.

²⁴ Ngokuti ndadaidzira, nemwi mwaramba; ndatambanudza muoko wangu, apana munhu wabatika ndicho;

²⁵ nangendaa yokuti mwaramba kupanga kwangu kweshe, nemwi amuna kuashira kurambidza kwangu,

²⁶ neniwo ndinozosheka madambudziko enyu, ndinozoita jee apo kutya kwamubata;

²⁷ naapo kutya kwamubata kudai ngomubvumo, nokutambudzika kwenyu kwauya kudai ngechipupuri; apo kutambudzika nokurwadziwa kwauya padera penyu.

²⁸ Zvino vanozodaidzira kwendiri, asi andizopinguri; vanozonditsvakisisa, asi avazondioni.

²⁹ Ngokuti vakazonda ruziyo, vasikazi kutsanangura kutya Mambo Mwari,

³⁰ avazi kutendera kupanga kwangu, vakashoora kurambidza kwangu,

³¹ ndizvo vanozodya michero yenjira yavo, nokuzadzwa ngokuronga mazano avo.

³² Ngokuti kupauka kwaavo vasina ungwaru kunozovauraya, nokugarisika kwemapenzi kunozovapedza.

³³ Asi kunyazwi ndiani uwo unopurutana kwendiri unozogarisika, naye unozogara asikatyi zvakashata.”