Mateu 9 - Bhaibheri Rakachena muChindau

Jesu Unoponesa Munhu waiya noMuiri Wakaoma

¹ Echipotera mungarava, wakaambuka ruseri, akaguma kuguta rekwake.

² Penya, vakaunza kwaari munhu wairwara ngenhenda yokuoma muiri, akaata pamanhi. NaJesu aona kutenda kwavo, wakati kuneuwo waiya nenhenda yokuoma muiri, “Mukororo, shinga; zvishaishi zvako zvarekererwa.”

³ Penya, vamweni vevanyori vakati pakati pavo, “Munhu uyu unotuka.”

⁴ NaJesu echizia kupinimidza kwavo wakati, “Munopinimidzirenyi zvakashata mumwoyo yenyu?

⁵ Ngokuti ngechiri chinopinda kureruka, kuronza kuti, ‘Zvishaishi zvako zvarekererwa,’ nokuti kuronza kuti, ‘Miruka uhambe?’

⁶ Asi kuti muzie kuti Mukororo woMunhu unesimba munyika rokurekerera zvishaishi,” (naapo wakati kuneuwo waiya nenhenda yokuoma muiri,) “Miruka, tora manhi ako uende kumhatso yako.”

⁷ Naye wakamiruka, akaenda kumhatso yake.

⁸ Naapo mbungano yazviona, yakatya, yakakudza Mwari, uwo waiya akahina simba rakadai kuvanhu.

Jesu Unodaidza Mateu

⁹ NaJesu echipinda mberi, wakaona munhu unozwi Mateu, echigara pandau yokubharisa chibharo; naye wakati kwaari, “Nditeere.” Naye wakamiruka, akamuteera.

¹⁰ Kwakaitika achatseama panokudya mumhatso, ringirai, vabharisi nevashaishi vazhinji vakauya vakagara pashi naJesu navadzidzi vake.

¹¹ VaFarisi vechiona, vakati kunevadzidzi vake, “Ngenyi Mudzidzisi wenyu echidya nevabharisi nevashaishi?”

¹² Asi iye echizwa wakati, “Avo vakamhodyoka avatami n'anga, asi avo vanorwara.

¹³ Asi endai mwoodzidza kuti zvinoronzenyi izvi, ‘Ndinoda nyasha, haiwa kuhinwa mubairo.’ Ngokuti andizi kuuya kudaidza vakarurama, asi vashaishi.”

Mubvunzo ngendaa yoKuera Kudya

¹⁴ Naapo vakaguma kwaari vadzidzi vaJohani vechiti, “Isusu nevaFarisi tinogara techiera kudya ngenyi, asi vadzidzi vako avaeri kudya?”

¹⁵ NaJesu wakati kwavari, “Vemhatso yanyamuroorwa vangatsumba here apo mukwambo achinavo? Asi mazuva anozouya apo mukwambo unozoduswa kwavari, naapo vanozoera kudya.

¹⁶ Apana munhu unoisa chitembwe chitsva pajira rakatsakara, ngokuti icho chinoiswa kuinamira, chinobaurisa kubva kweiri, neburi rinozopinda kukura.

¹⁷ Zve, avaisi vhini idzva mumbudu dzakatsakara; ngokuti mbudu dzinozoputiswa nevhini rinozodururika nembudu dzinozoparadzwa. Asi vanoisa vhini idzva mumbudu itsva, nazvo zveshe zvinozongwaririka.”

Jesu Unomusa Mwanasikana waJairosi noKuponesa Dzimai Raibuda Ngazi

¹⁸ Achaereketa izvi kwavari, penya, wakauya mutongi wakatikuti, wakamugwadamira, akati kwaari, “Mwana wangu womusikana watofa, asi chiuya uise nyara yako padera pake, naye unozorarama.”

¹⁹ NaJesu wakamiruka, akaenda naye, nevadzidzi vake.

²⁰ Penya, mukadzi waiya nenhenda yokubuda ngazi makore gumi namairi, wakauya ngesure kwake, akabata mupendero wegauni rake.

²¹ Ngokuti iye wakati mukati mwake, “Kudai ndingabata kwega gauni rake, ndinozoponeswa.”

²² Asi Jesu echikunukuka, amuona, wakati, “Mukunda, shinga. Kutenda kwako kwakuponesa.” Nedzimai iro rakaponeswa kubvira ngeawa iro.

²³ Naapo Jesu aguma mumhatso yomutongi, wakaona varidzi veminanzi nembungano yechiita hohoho.

²⁴ Wakati, “Taraukai, ngokuti mwanasikana uyu aazi kufa akadi, asi wakaata.” Navo vakamusheka.

²⁵ Naapo abudisa mbungano kubanze, wakapotera mukati, wakamubata ngenyara nemwanasikana wakamiruka.

²⁶ Nembiri yacho yakateketeswa munyikamwo mweshe.

Jesu Unopembenudza Mapofu Mairi

²⁷ Naapo Jesu achapinda kuenda mberi kubva apo, mapofu mairi akamuteera, echidaidzira echiti, “Iwewe Mukororo waDhavhidha, tiitire nyasha.”

²⁸ Apotera mumhatso, mapofu akauya kwaari, naJesu wakati kwaari, “Munotenda here kuti ndine simba rokuita ichi?” Akati, “Eya, Mambo.”

²⁹ Naapo wakagwama madziso awo, akati, “Ngakuitwe kwomuri kudai ngokutenda kwenyu.”

³⁰ Nemadziso awo akapembenudzwa; naJesu wakaapanga echiti, “Ngwarai kuti zvisazoziikanwa ngomunhu.”

³¹ Asi vabvapo, vakateketesa mbiri yake munyikamwo mweshe.

Jesu Unoponesa Chimbungumbungu Chaiya neDhimoni

³² Vachabuda kubvapo, penya, kwakaunzwa kwaari chimbungumbungu chaiya nedhimoni.

³³ Naapo dhimoni rakarashwa kubva kwechiri, chimbungumbungu chakaereketa; nembungano yakashamiswa yechiti, “Akuzi kutongombooneka zvakadai muIsuraeri.”

³⁴ Asi vaFarisi vaiti, “Iye unorasha madhimoni ndimambo wemadhimoni.”

Jesu Unozwira Vanhu Urombo

³⁵ NaJesu wakahambahamba mumadhorobha eshe nomumaguta eshe, echidzidzisa mumhatso dzavo dzokudira, echichumaira vhangeri roumambo, echirapa mbeu dzeshe dzenhenda nokurwara kweshe.

³⁶ Asi aona mbungano, wakavazwira urombo ngokuti vaidezwaira nokupepesheka kudai ngemakwai asina muushi.

³⁷ Naapo wakati kuvadzidzi vake, “Ngegwinyiso kukukura kwakawanda asi vashandi vashomani.

³⁸ Ndizvo kumbirai kunaMambo wokukukura kuti atumire vashandi mukukukura kwake.”