Mateu 8 - Bhaibheri Rakachena muChindau

Jesu Unomhodyosa Munhu waiya neMapere

¹ Naapo Jesu adzaka kubva pamutunhu, mbungano huru yakamuteera.

² Penya munhu waiya nemapere wakauya kwaari, akamugwadamira echiti, “Mambo, dai wechida ungandimhodyosa.”

³ Naye wakatambanudza nyara yake, akamugwama akati, “Ndinoda, chimhodyoka.” Paripo mapere ake akamhodyoswa.

⁴ NaJesu wakati kwaari, “Ngwara kuti usazoronzera munhu; asi enda, udzipangidzire kumupristi, nokupa chipo icho chaakaronza Mosi kuti chiite chapupu kwavari.”

Jesu Unoponesa Muranda weNduna yeZana

⁵ Naapo apotera muKhapernaume, kwakauya kwaari nduna yezana yechimukumbira,

⁶ yechiti, “Mambo, muranda wangu wakaata mumhatso echirwara ngokuoma muiri, echirwadziwa kakurutu.”

⁷ Wakati kweiri, “Inini ndinozouya, ndimuponese.”

⁸ Asi nduna yezana yakapingura, ikati, “Haiwa, Mambo, hazvisisiri kuti iwewe upotere pashi pedenga rangu, asi ronza ngeizwi rega nomuranda wangu unozoponeswa.

⁹ Ngokuti ininiwo ndiri munhu unotongwa, ndine majoni ari pashi pangu; neni ndinoti kuneuyu, ‘Enda,’ naye unoenda; nokuneumweni, ‘Uya,’ naye unouya; nokumuranda wangu, ‘Ita ichi,’ naye unochiita.”

¹⁰ Naapo Jesu azwa ichi, wakashama, akati kwavari vaimuteera, “Ngegwinyiso andizi kumboona kutenda kukurutu kwakadai, haiwa kunyazwi kuvaIsuraeri.

¹¹ Neni ndinoti kwomuri kuti vazhinji vanozouya kubva kumabvazuva nokumabirirazuva, vanozogara pashi padhiri naAbrahama naIsaka naJakobe muumambo hwomudenga.

¹² Asi vana voumambo vanozokandirwa muchidima chiri kubanze; kunozoiteyo kuboorera nokukwetsana kwemazino.”

¹³ NaJesu wakati kunduna yezana, “Enda, ngakuitwe kwouri kudai ngokutenda kwako.” Nomuranda wakaponeswa ngeiro awa.

Jesu Unoponesa Ambuya vaPetro neVanhu Vazhinji

¹⁴ Naapo Jesu apotera mumhatso yaPetro, wakaona vambuya vake vakaata vechirwara ngomutsarara.

¹⁵ Naye wakabata nyara yake, nomutsarara wakavasiya; navo vakamiruka, vakamushandira.

¹⁶ Kwaita madeekoni, vakaunza kwaari vazhinji vaiya nemadhimoni, naye wakaabudisa akaadzinga ngeizwi rake, wakaponesa veshe vairwara,

¹⁷ kuti kuzadzisike ukwo kwakaereketwa ndiIsaya muprofeti echiti, “Iye emene wakatora nhenda dzedu, akatwara kurwara kwedu.”

Kukonza kwoKuteera Jesu

¹⁸ Zvinopano Jesu echiona mbungano huru yechimutendenedza, wakapanga kuti vaambuke ruseri.

¹⁹ Kwakauya kwaari munyori, akati kwaari, “Mudzidzisi, ndinozokuteera apo pounoenda.”

²⁰ NaJesu wakati kwaari, “Hava dzine mirindi neshiri dzemudenga dzine zvisaki; asi Mukororo woMunhu aana nepokutsamira soro rake.”

²¹ Umwe wevadzidzi wakati kwaari, “Mambo, kutanga nditendere kuti ndiende nditsire baba angu.”

²² Asi Jesu wakati kwaari, “Nditeere, urekere vakafa kuti vatsire vakafa vavo.”

Jesu Unonyaradza Dutu

²³ Naapo apotera mungarava, vadzidzi vake vakamuteera.

²⁴ Penya, kwakabuda mubvumo mukurutu muruandhle, ngokudaro ngarava yakadumaidzwa ngemafungo; asi iye waiya akaata.

²⁵ Vakauya kwaari, vakamumusa vechiti, “Mambo, tiponese; tofa.”

²⁶ Naye wakati kwavari, “Munombotya ngenyi, imwimwi munokutenda kudoodoko?” Naapo wakamiruka, akakaraidza mubvumo noruandhle; kwakaapo kuterama kukurutu.

²⁷ Nevanhu vakashama vechiti, “Uyu munhu uri wakaitawani, kuti mubvumo noruandhle zvinomupurutana?”

Jesu Unoponesa Vanhu Vairi vaiya neMadhimoni muGadhara

²⁸ Naapo aguma ruseri munyika yavaGadhareni, kwakashongana naye vanhu vairi vaiya nemadhimoni vechibva mumaiba, vane ushungu hunotyisa, ngokudaro kwaiya kusina nomunhu waichahamba ngeiyo njira.

²⁹ Ringirai, vakadaidzira vakati, “Tinenyi newe, iwewe Mukororo waMwari? Wauya panapa kutishwinyisa usati waguma mukuwo here?”

³⁰ Zvino kwaiyapo danga renguruve zhinji dzechifura kanharauko kubva kwaari.

³¹ Nemadhimoni akamukumbira akati, “Kudai wechitibudisa, titumei tipotere mudanga renguruve.”

³² Naye wakati kwaari, “Endai.” Nawo abuda, akapotera munguruve. Penya, danga reshe rakadzaka ngepamakaha muruandhle, rakafa mumvura.

³³ Avo vaiusha vakatiza, vakaenda mudhorobha, vakaronza zveshe izvo zvaiya zvaitwa kuneavo vaiya nemadhimoni.

³⁴ Penya, vedhorobha reshe vakabuda kooshongana naJesu. Kwakati vechimuona, vakamunyengerera kuti abve mumigano yavo.