Mateu 6 - Bhaibheri Rakachena muChindau

Kudzidzisa ngendaa yoKupa Zvipo kuVarombo

¹ “Wonai kuti musaita kururama kwenyu pamberi pevanhu, kuti vamuone; kuti mwechizodaro, amuzooni musharo kunaBaba enyu ari mudenga.

² “Ndizvo apo woopa zvipo zvako kuvarombo, usaridza gwama pamberi pako, kudai ngezvevanoita vadziitisi mumhatso dzokudira nomumapato, kuti vairikidzwe ngevanhu. Ngegwinyiso ndinoti kwomuri, vatoashira musharo wavo.

³ Asi apo iwewe woopa zvipo zvako kuvarombo, usatendera kuti nyara yako yokumuoshwe izie chinoitwa ngenyara yako yokumudyo,

⁴ kuti zvipo zvako zvipuwe ngokufishika; naBaba ako vanoona mukufishika vanozokupawo.

Kudzidzisa ngendaa yoMukumbiro

⁵ “Naapo mwookumbira, musazodai ngevadziitisi; ngokuti vanoda kukumbira vechiema mumhatso dzokudira nepamhararano mumapato, kuti vaoneke ngevanhu. Ngegwinyiso ndinoti kwomuri, vatoashira musharo wavo.

⁶ Asi iwewe, apo wookumbira, potera mukamera rako repakati, naapo konya musiwo, kumbira kunaBaba ako vari mukufishika, naBaba ako vanoona mukufishika vanozokupawo.

⁷ Asi mukukumbira kwenyu musazotera kuhwirinzira mazwi asina shwiro, kudai ngezvevanoita vemadzinza; ngokuti ivo vanokarakadza kuti vanozozwika ngokuwanda kwemazwi avo.

⁸ Ndizvo musazodai ndivo, ngokuti Baba enyu unozia izvo zvomunotama musati mwakumbira kwaari.

⁹ Ndizvo kumbirai ngeiyi njira: “Baba edu ari mudenga, ngariremeredzwe zina renyu.

¹⁰ Umambo hwenyu ngahuuye. Kuda kwenyu ngakuitwe munyika kudai ngomudenga.

¹¹ Tipei ngeiri zuva kudya kwedu kunotamika nyamashi.

¹² Tirekererei ndaa dzedu kudai tisu takarekerera avo vane ndaa kwetiri.

¹³ Musatipinza mukuedzwa, asi tinunurei kubva kuneuwo wakashata.

¹⁴ “Ngokuti kudai imwimwi mwechirekerera vanhu zvipaukwa zvavo, Baba enyu ari mudenga vanozomurekererawo nemwi.

¹⁵ Asi kudai musikarekereri vanhu zvipauka zvavo, naBaba enyu avazomurekereriwo imwimwi zvipaukwa zvenyu.

Kudzidzisa ngendaa yoKuera Kudya

¹⁶ “Zve mwoera kudya, musasununika hope dzenyu kudai ngevadziitisi; ngokuti vanodzishaisha hope dzavo kuti vari vaoneke ngevanhu kuti kuera kudya. Ngegwinyiso ndinoti kwomuri, vatoashira musharo wavo.

¹⁷ Asi iwewe, apo woera kudya, dzodza soro rako, ushambe muhope mwako,

¹⁸ kuti usazooneka ngevanhu kuti uri kuera kudya, asi ndiBaba ako vari pakafishika; naBaba ako avo vanoona mukufishika, vanozokupawo.

Upfumi muDenga

¹⁹ “Musadziunganidzira upfumi munyika, apo unundu nengura zvinozvishaishira, naapo mbavha dzinopwanya dzibe.

²⁰ Asi dziunganidzirei upfumi mudenga, apo unundu nokuti ngura zvisikazvishaishiri, naapo mbavha pedzisikapwanyi dzibe.

²¹ Ngokuti apo pane upfumi hwako, ndipozve panozoa nemwoyo wako.

Chibani choMuiri

²² “Chibani chomuiri idziso, ndizvo kudai dziso rako riri dziso kwaro, muiri wako weshe unozozara ngokujeka.

²³ Asi kuti dziso rako rakashata, muiri wako weshe unozozara ngechidima. Ndizvo kudai kujeka kuri mukati mwako kuri chidima, kukuranyi kwechidima icho!

Mwari neMare

²⁴ “Akuna munhu ungakona kushandira madzimambo mairi; ngokuti unozonyenyeredza umwe, ade umweni, nokuti unozoshoora umwe abatirire kunoumweni. Amungashandiri Mwari nemare.

²⁵ “Ngendaa yeichi ndinoti kwomuri, musadembatemba mundaramo yenyu, kuti munozodyenyi nokuti munozomwenyi nokuti ngendaa yomuiri wenyu, kuti munozopfekenyi. Kurarama akupindi kudya here, nomuiri aupindi zvokupfeka here?

²⁶ Ringirai shiri dzomudenga kuti adzikushi, adzivhunizve, nokuti kuunganidza mumatura; asi Baba enyu ari mudenga unodzipa zvokudya. Imwimwi amuna mutengo mukuru kupinda idzo here?

²⁷ Ndiani kwomuri ngokudembatemba ungakona kututsira zuva rimwe rokupona kwake.

²⁸ Nemwi munodembatemba ngenyi ngezvokufuka? Pinimidzai ngeminyimbiri yomushango kumera kwayo; aishandi, airukizve,

²⁹ asi inini ndinoti kwomuri, naSoromoni muuthende hwake hweshe aazikupfekeswa kudai ngoumwe wayo.

³⁰ Asi kudai Mwari echipfekesa kudaro mwenje womushango, uwo uripo nyamashi, mangwani unokandirwa muchoto, aazopindi here kakurutu kumupfekesa, imwimwi muno kutenda kudoodoko?

³¹ Ndizvo musadembatemba mwechiti, ‘Tinozodyenyi?’ nokuti, ‘Tinozomwenyi?’ nokuti, ‘Tinozosimirenyi?’

³² Ngokuti vemadzinza vanotsvaka izvi zveshe; ngokuti Baba enyu vari mudenga vanozia kuti munozvitama izvi zveshe.

³³ Asi tsvakai kutanga umambo hwake nokururama kwake, neizvi zveshe zvinozotutsirwa kwomuri.

³⁴ Ndizvo musazodembera mangwani, ngokuti mangwani unozodzidembera. Kutambudzika kwezuva kunokwana zuvaro.