Mateu 5 - Bhaibheri Rakachena muChindau

Chumairo yepaMutunhu

¹ Naye echiona mbungano zhinji, wakakwira mutunhu, naapo agara pashi, vadzidzi vake vakauya kwaari;

² wakashama muromo wake, wakavadzidzisa echiti.

Kudakara kweGwinyiso

³ “Vanomuchena varombo vomweya, ngokuti ngehwavo umambo hwomudenga.

⁴ Vanomuchena vanotsumba, ngokuti vanozoembedzerwa.

⁵ Vanomuchena vakapfaa, ngokuti vanozogara nhaka yomunyika.

⁶ Vanomuchena avo vane nzara nenyota ngokuda kururama, ngokuti vanozogutiswa.

⁷ Vanomuchena avo vanenyasha, ngokuti vanozoitirwa nyasha.

⁸ Vanomuchena avo vanemwoyo wakachena, ngokuti vanozoona Mwari.

⁹ Vanomuchena vaiyanisi, ngokuti vanozozwi vana Mwari.

¹⁰ Vanomuchena avo vanotambudzwa ngendaa yokururama, ngokuti umambo hwomudenga ngehwavo.

¹¹ “Munomuchena apo mwootukwa, mwootambudzwa, mwooreiwa mazwi eshe akashata okunyepa ngepamusoro pangu.

¹² Dakarai, mwechidakara kakurutu; ngokuti musharo wenyu mukuru mudenga; ngokuti ngokudaro vakatambudza vaprofeti avo vaiya pamberi penyu.

Vadzidzi vari Munyu noKujeka kweNyika

¹³ “Imwimwi muri munyu wenyika, asi kuti munyu warasha kunaka kwawo, ungachazorungwa ngenyi? Sure kweizvi auchanakiri chiro, kwega kurashwa kubanze nokutsikwa-tsikwa ngevanhu.

¹⁴ Imwimwi muri kujeka kwenyika. Guta rakaakwa padera pomutunhu aringafishiki.

¹⁵ Nechibani avabasiri vechichiisa pashi pechitundu, asi pachigadzikiro pacho, nacho chinojekisa veshe vari mumhatso.

¹⁶ Ngokudaro ngakujeke kujeka kwenyu pamberi pevanhu, kuti vaone mishando yenyu yakanaka, vairikidze Baba enyu ari mudenga.

Kudzidzisa ngendaa yeMipango

¹⁷ “Musapinimidza kuti ndakauya kuparadza Mipango nokuti zvidzidziso zvevaprofeti. Andizi kuuya kuparadza, asi kuzvizadzisa.

¹⁸ Ngegwinyiso ndinoti kwomuri, metsa denga nenyika zvipinde, apana chiro chidoko nokuti chidonhwe chimwe achitongozopindi kubva muMipango metsa zveshe zvaitika.

¹⁹ Ndizvo kunyazwi ndiani unozogura chimwe chidoko cheiyi mipango, echidzidzisa vanhu kuita kudaro, iye unozoita mudoko wokugumisira muumambo hwomudenga. Asi iye unozozviita nokuzvidzidzisa, iye unozozwi mukuru muumambo hwomudenga.

²⁰ Ngokuti ndinoti kwomuri, kudai kururama kwenyu kusikapindi kururama kwevanyori nekwevaFarisi, amutongozopindi muumambo hwomudenga.

Kudzidzisa ngendaa yoKunyangadzwa

²¹ “Mwakazwa kuti kwakaronzwa kwavari vekaretu kuti, ‘Usazouraya.’ Neuwo unozouraya unozoa nendaa yokutongwa.

²² Asi inini ndinoti kwomuri munhu weshe uwo unomutsenekera munun'una wake unozoa nendaa yokutongwa, nouwo unozotuka munun'una wake kuti, ‘Munhu usinashwiro’, unozoa nendaa yokutongwa ngemakota, nouwo unozoti, ‘Iwewe benzi’, unozoa nendaa yokurashwa muGehena remwoto.

²³ Ndizvo kudai woohina chipo chako paarita, naapo ukakarakadza kuti munun'una wako unekhururu newe,

²⁴ siyapo chipo chako pamberi pearita, uende; utange kuiyana nomunun'una wako, naapo unozouya kuhina chipo chako.

²⁵ Tenderana negaa rako ngokukasira, uchiri munjira naro, kuti kunyazwi ngouri mukuwo gaa rako risazokuhina kumutongi, nomutongi akuhine kunejoni, newe uiswe mutirongo.

²⁶ Ngegwinyiso ndinoti kwouri, ‘Autongozobudimwo metsa waripa nekamare kokupedzisira.’

Kudzidzisa ngendaa yoKuomba

²⁷ “Mwakazwa kuti kwakaronzwa kuti, ‘Usazoomba.’

²⁸ Asi inini ndinoti kwomuri, kunyazwi ndiani unomuringira mukadzi ngokuemura, watoomba naye mumwoyo mwake.

²⁹ Asi kudai dziso rako rokumudyo rechikupumhunisa, ribvite, urirashe kubva kwouri; ngokuti kwakapinda kunaka kwouri kuti chimwe chenhengo dzemuiri wako chife, kunekuti muiri wako weshe ukandirwe muGehena.

³⁰ Kuti nyara yako yokumudyo yechikupumhunisa, iteme, uirashe kubva kwouri; ngokuti kwakapinda kunaka kwouri kuti chimwe chenhengo dzemuiri wako chife, kunekuti muiri wako weshe urashwe muGehena.

Kudzidzisa ngendaa yoKurambana

³¹ “Kwakaronzwa kuti, ‘Uwo unoramba mukadzi wake, ngaamupe tsamba yokuparadzana.’

³² Asi inini ndinoti kwomuri, iye unoramba mukadzi wake asina ndaa yokuomba, unomuitisa muombi, nouwo unomuroora uwo wakarambwa unoomba.

Kudzidzisa ngendaa yeMhiko

³³ “Zve, mwakazwa kuti kwakaronzwa kwavari vekaretu kuti, ‘Usazopika wechinyepa, asi unozoita kunaMambo mhiko dzako.’

³⁴ Asi inini ndinoti kwomuri, musazopika nakamwe, kunyazwi ngomudenga, ngokuti riri dendemaro raMwari;

³⁵ kunyazwi ngenyika, ngokuti iri chitambarariro chetsoka dzake; kunyazwi ngeJerusarema, ngokuti riri dhorobha raMambo mukuru;

³⁶ kunyazwi ngesoro rako, ngokuti aungakoni kuita kuti rubvudzi rumwe ruchene nokuti rusvipe.

³⁷ Asi kuereketa kwenyu ngakuite, ‘Eya, eya,’ nokuti, ‘Haiwa, haiwa;’ ngokuti zveshe izvo zvinopinda izvi zvinobva kuneuwo wakashata.

Kudzidzisa ngendaa yoKuunzidzira

³⁸ “Mwakazwa kuti kwakaronzwa kuti, ‘Dziso ngendaa yedziso, nezino ngendaa yezino.’

³⁹ Asi inini ndinoti kwomuri, usarwisana nouwo wakashata. Asi iye unozokurova padama rako rokumudyo, wechipindurira kwaari rimwenizve.

⁴⁰ Kuti aripo unozokumangarira nokutora hembe yako, ipa kwaarizve nejazi rako.

⁴¹ Nouwo unozokuangiridza kuenda naye khiromitha rimwe, enda naye makhiromitha mairi.

⁴² Ipa kwaari uwo unokumbira kwouri, nouwo unoda kukwereta kwouri, usamurambira.

Rudo kuMagaa

⁴³ “Mwakazwa kuti kwakaronzwa kuti, ‘Unozomuda muakirwana wako, unyenye gaa rako.’

⁴⁴ Asi inini ndinoti kwomuri, idai magaa enyu, muvakumbirire avo vanomutambudza,

⁴⁵ kuti muite vana vaBaba enyu ari mudenga; ngokuti iye unoita kuti zuva rake ribude padera pevakashata nevakanaka, nokunaisa mvura padera pevakarurama nevasikazi kururama.

⁴⁶ Ngokuti kudai mwechida avo vanomuda imwimwi, munozoashira musharo wenyi? Andizvopi here zvevanoita vabharisi?

⁴⁷ Kudai mwechichingamidza hama dzenyu dzega, munopinda vamweni ngokuitawani? Avadaropi nevemadzinza here?

⁴⁸ Ndizvo imwimwi itai vakaperera, kudai ndiBaba enyu ari mudenga vakaperera. Chumairo Inoendemberi.