Mateu 3 - Bhaibheri Rakachena muChindau

Kuchumaira kwaJohani Mubhabhatidzi

¹ Ngaawo mazuva wakauya Johani muBhabhatidzi echichumaira mushango mweJudhia

² echiti, “Tenderukai; ngokuti umambo hwomudenga hwaa pasinde.”

³ Ngokuti uyu ndiye waakareketa ndiye Isaya muprofeti echiti, izwi rounodaidzira mushango: “Nasirirai njira yaMambo, ruramisai makwara ake.”

⁴ Uyu Johani waisimira chipfeko chakanasirwa ngemamviri ekamera, nebhande redoo muchiunu chake; nokudya kwake kwaiya ndongwe neuchi womushango.

⁵ Kwakauya kwaari veJerusarema neveshe veJudhia nevenharaunda yeshe yeJorodhani,

⁶ navo vakabhabhatidzwa ndiye murwizi rweJorodhani, vechitenda zvishaishi zvavo.

⁷ Asi echiona vazhinji vevaFarisi nevaSadhusi vechiuya kurubhabhatidzo rwake, wakati kwavari, “Imwimwi vana vemabuura, ndiani wakamunyowedza kuti mutize ushungu hunouya?

⁸ Ndizvo mwechipangidzira michero inoonisa kutenderuka.

⁹ Musapinimidza mwechiti mukati mwenyu, ‘Tina Abrahama baba edu.’ Ngokuti ndinoti kwomuri Mwari unesimba ngaaya mapuwe kumusira vana kunaAbrahama.

¹⁰ Nazvinopano sanho raiswa panzinde dzemiti, ndizvo muti weshe usikabereki michero yakanaka unotemerwa pashi, ukandirwe mumwoto.

¹¹ Inini ngegwinyiso ndinomubhabhatidza mumvura, kuita chioniso chokutenderuka, asi iye unouya sure kwangu unesimba kupinda inini, anditosisiri nokutwara magwada ake; uyu ndiye unozomubhabhatidza ngoMweya Wakachena nemwoto.

¹² Uwo rutsero rwake ruri munyara yake, naye unozonasa kutsvaira mbuwa yake nokuunganidza koroni yake mudura, asi unozopisha makoto ngomwoto usikadzimi.”

Kubhabhatidzwa kwaJesu

¹³ Naapo Jesu wakauya Jorodhani kunaJohani echibva Garire, koobhabhatidzwa ndiye.

¹⁴ Asi Johani wakada kumurambira echiti, “Inini ndinosisira kuti ndibhabhatidzwe ndiwe, newe wouya kwendiri here?”

¹⁵ Asi Jesu wakapingura akati kwaari, “Wechitenda zvino; ngokuti ngokudaro kunodikanwa kuti tizadzise kururama kweshe.” Naapo wakamutendera.

¹⁶ Naapo Jesu abhabhatidzwa, paripo wakabva mumvura, penya, denga rakabeuka kwaari, naye wakaona Mweya waMwari wechidzaka kudai ngenjia, wechiuya padera pake.

¹⁷ Penya, izwi rechibva mudenga rakati, “Uyu ndiye Mukororo wangu, unodikanwa, wendinonasa kudakara ndiye.”