Mateu 28 - Bhaibheri Rakachena muChindau

Kumuka kwaJesu

¹ Ngesure kweSabatha, mumambakwedza ngezuva rokutanga revhiki, kwakauya Maria Magadhareni noumweni Maria koona iba.

² Penya, kwaiya kuriyo kuzungunyika kukurutu kwenyika; ngokuti ngirosi yaMambo yakadzaka kubva mudenga, yakauya yakamburumbudza ikabusa buwe, nayo yakagara padera paro.

³ Kuoneka kwayo kwaiya kwakadai ngemheni, nezvokufuka zvayo zvaiya zvakachena kudai ngechando.

⁴ Ngokuitya varindi vakahuta, vakaita kudai ngevakafa.

⁵ Nengirosi yakati kumadzimai, “Musatya imwimwi; ngokuti ndinozia kuti munotsvaka Jesu uwo wakakohomerwa.

⁶ Apachina panapa akadi; ngokuti wamuka, kudai ngezvaakaronza. Uyai muone pandau apo paaiya akaata.

⁷ Kasirai muende muronzere vadzidzi vake kuti, ‘Wamuka kwevakafa, penyai, unomutangira kuenda Garire; naapo munozomuonapo! Ringirai, ndamuronzera.’ ”

⁸ Navo vakaenda ngokukasira vechibva paiba, vanokutya nokudakara kukurutu; vakarumba kooronzera vadzidzi vake.

⁹ Penya, Jesu wakashongana navo, akati, “Mwauya.” Navo vakauya vakabata tsoka dzake, vakamudira.

¹⁰ Naapo Jesu wakati kwavari, “Musatya; endai mwooronzera vanun'una vangu kuti vaende Garire, vanozondionapo.”

Mushumo weVarindi

¹¹ Naapo vachaenda, penya vamweni vevarindi vakauya kudhorobha, vakaronzera vapristi vakuru zveshe izvo zvakaitika.

¹² Naapo vakaungana pamwepo nevakuru vevanhu, apo vaiya vapangana, vakahina mare yakawanda kumajoni

¹³ vechiti, “Ronzai imwimwi kuti vadzidzi vake vakauya nousiku, vakamuba takaata.

¹⁴ Kudai izvi zvikanyazwika ngomutongi, tinozonasirisa kuti musaa nendaa.”

¹⁵ Navo vakatora mare iyo, vakaita kudai ngezvevakapangwa, neizwi iri rakashumirwa pakati pevaJudha metsa nanyamashi.

Kutuma Kukurutu kwaJesu kuNyika dzeshe

¹⁶ Nevadzidzi gumi naumwe vakaenda muGarire, pamutunhu apo paakavaronzera Jesu.

¹⁷ Naapo vamuona vakamudira. Asi vamweni vakagononda.

¹⁸ NaJesu wakauya kwavari, akaereketa kwavari echiti, “Simba reshe rakapuwa kwendiri mudenga nomunyika.

¹⁹ Ndizvo endai, mwechiita vadzidzi kumadzinza eshe, mwechivabhabhatidza ngezina raBaba neroMukororo neroMweya Wakachena,

²⁰ mwechivadzidzisa kungwarira zviro zveshe zvendakamupanga; penyai, ndinemwi mazuva eshe metsa kuguma kwenyika.”