Mateu 27 - Bhaibheri Rakachena muChindau

Jesu Unoendeswa pamberi paPiratu

¹ Kwaedza vapristi vakuru veshe nevakuru vevanhu vakaita bangano ndiJesu kuti vamuuraye.

² Naapo vaiya vamusunga, vakamukweya kuenda naye kunaPiratu mutongi.

Kufa kwaJudhasi Isikarioti

³ Naapo Judhasi, uwo wakamupira, aona kuti Jesu wakaitirwa ndaa, wakatenderuka, akaunzazve zvigurwa zvesirivha makumi matatu kuvapristi vakuru nevakuru

⁴ echiti, “Ndakashaisha ngokupira ngazi isina ndaa.” Asi vakati, “Chinenyi icho kwetiri? Wechidzionera wemene.”

⁵ Naye wakakandira zvigurwa zvesirivha muTemperi, akaenda akadzisungira.

⁶ Nevapristi vakuru vakatora zvigurwa zvesirivha, vakati, “Akutenderwi kuti tizviise mubhokisi remare yezvipo, kwechioneka kuti imare yengazi.”

⁷ Vakaita bangano, vakatenga ndizvo munda womuumbi wehari, kuti vaikemwo vapara.

⁸ Ndizvo uwo munda unodaidzwa metsa nanyamashi kuti, Munda weNgazi.

⁹ Naapo rakazadzisika izwi iro rakaereketwa ndiJeremia muprofeti echiti, “Navo vakatora zvigurwa zvesirivha makumi matatu, mutengo wakatenderwana ngevamweni vevana vaIsuraeri kuti vamutenge ndiwo.

¹⁰ Navo vakazvipa kutenga munda womuumbi wehari, kudai ngezvaakandipanga Mambo.”

Piratu Unobvunza Jesu

¹¹ NaJesu wakaema pamberi pomutongi. Nomutongi wakamubvunza echiti, “Iwewe uri Mambo wevaJudha here?” Jesu wakati, “Watoronza kudaro.”

¹² Naapo aitirwa ndaa ngevapristi vakuru nevakuru, aazikupingura chiro.

¹³ Zvino Piratu wakati kwaari, “Auzvizwi here izvo zvakawanda zvevanokuitira ndaa ndizvo?”

¹⁴ Naye aazi kupingura neizwi, ngokudaro mutongi wakashamiswa kakurutu.

Jesu Unotongerwa Rufu

¹⁵ Zvinopano pamushongano wokudya, mutongi waindosunhurira vanhu bhanditi rimwe, iro revaida.

¹⁶ Ngouwo mukuwo vaiya nebhanditi raiya nembirikira, raizwi ndiBharabhasi.

¹⁷ Ndizvo apo vakaungana pamwepo, Piratu wakati kwavari, “Munoda kuti ndimusunhurire anani, Bharabhasi nokuti Jesu unozwi Kristu?”

¹⁸ Ngokuti iye waizia kuti yaiya ndaa yendurumwa yavakamupira ndiyo.

¹⁹ Apo agara pashi padendemaro rokutonga, mukadzi wake wakatumira kwaari echiti, “Usaa nechiro chounoita kunouno munhu wakarurama; ngokuti ndatambudzwa ngezvakawanda nyamashi mukurota ngendaa yake.”

²⁰ Asi vapristi vakuru nevakuru vevanhu vakanyengerera mbungano kuti ikumbire Bharabhasi nokuuraya Jesu.

²¹ Mutongi wakati kwavari, “Ndiani pakati paavo vairi womunoda kuti ndimusunhurire?” Navo vakati, “Bharabhasi.”

²² Piratu wakati kwavari, “Ndizvo ndinozoitenyi ndiJesu, uwo unozwi Kristu?” Veshe vakati, “Ngaakohomerwe.”

²³ Naye wakati, “Ngenyi? Kushatanyi kwaakaita?” Asi avo vakapinda kudaidzira kuti, “Ngaakohomerwe.”

²⁴ Naapo Piratu aona kuti asaikona kudetsera chiro, asi kwega kuti hohoho yaimuswa, wakatora mvura, akashamba nyara dzake pamberi pembungano echiti, “Inini andina ndaa yengazi youyu munhu. Dzionerenyi pachenyu imwimwi.”

²⁵ Nevanhu veshe vakapingura, vakati, “Ngazi yake ngaiuye padera pedu nepadera pevana vedu.”

²⁶ Naapo wakavasunhurira Bharabhasi. Naapo aiya ashwapura Jesu yaamho, wakamuhina kuti akohomerwe.

Majoni Anoitira Jee Jesu

²⁷ Naapo majoni omutongi akatora Jesu kuenda naye mumhatso yokutongera, akaunganidza pamberi pake chikwata cheshe chemajoni.

²⁸ Nawo akamukumura, akamupfekedza gauni rakatsvukuruka.

²⁹ Naapo varuka dzungudza reminzwa, vakariisa musoro mwake, norutsanga munyara yake yokumudyo; navo vakagwadama pashi pamberi pake, vakamuitira jee vechiti, “Mwauya, Mambo wevaJudha!”

³⁰ Navo vakamupfira mata, vakatora rutsanga vakamurova musoro.

³¹ Naapo vaiya vamuitira jee, vakakumura gauni, vakamupfekedza zvokufuka zvake, navo vakamukweya koomukohomera.

Jesu Unokohomerwa

³² Naapo vachabuda kubanze vakaona munhu weKureni, zina rake raizwi Simoni; uwo wavakaangiridza kuti atware muchinjiko wake.

³³ Naapo vaguma kundau inozwi Gorogotha, ukwo kunoti, Ndau yeDehenya,

³⁴ vakamupa vhini rakakumanidzwa nezvinozhazha kuti arimwe. Kwakati araira, wakaramba kurimwa.

³⁵ Naapo vaiya vamukohomera, vakakoanisana zvokufuka zvake, vechiita mabhigidha.

³⁶ Navo vakagara pashi, vechimurindapo.

³⁷ Navo vakaisa padera pesoro rake mazwi endaa yake, yakanyorwa kuti, “UYU NDIJESU, MAMBO WEVAJUDHA.”

³⁸ Naapo kwakakohomerwa naye magandanga mairi, rimwe ngokumudyo nerimweni ngokumuoshwe.

³⁹ Navo vaipinda ndipo vakamutuka, vechigudwaira masoro avo

⁴⁰ vechiti, “Iwewe unoputsa Temperi nokuriaka ngamazuva matatu, dziponese. Kuti uri Mukororo waMwari, dzaka pamuchinjikopo.”

⁴¹ Ngokudarowo vapristi vakuru vakamuitira jee, pamwepo nevanyori nevakuru vevanhu vechiti,

⁴² “Iye wakaponesa vamweni, asi aakoni kudziponesa. NdiMambo waIsuraeri, ngaadzake pashi zvinopano kubva pamuchinjiko, nesu tinozomutenda.

⁴³ Iye wakagonda kunaMwari; ngaachimununura zvinopano, kuti echimuda; ngokuti wakati, ‘Inini ndiri Mukororo waMwari.’ ”

⁴⁴ Nemagandanga awo akakohomerwa naye akamutukawo zvimwezvo.

Kufa kwaJesu

⁴⁵ Zvinopano kubvira ngeawa rechitanhatu chaiyapo chidima padera penyika yeshe metsa kuguma awa rechipfumbamwe.

⁴⁶ Rooita awa rechipfumbamwe Jesu wakadaidzira ngeizwi guru echiti, “Eloi, Eloi, Lama Sabakathani?” Uko kunoti, “Mwari wangu, Mwari wangu, wandisiya ngenyi?”

⁴⁷ Vamweni avo vaiema apo vazwa, vakati, “Uyu unodaidza Erija.”

⁴⁸ Paripo umwe wavo wakarumba wakatora siponji, wakainyika muvhini rinorungura, wakariisa parutsanga, akamuita kuti amwe.

⁴⁹ Asi vamweni vakati, “Murekerei, ngatione kuti Erija unouya here koomuponesa.”

⁵⁰ Naapo Jesu adaidzirave ngeizwi guru, wakafa.

⁵¹ Penya, jira reTemperi rakabaurwa kuita mairi, kubvira ngedera metsa kuguma pashi; nenyika yakazungunyika nemapuwe akamweka;

⁵² nemaiba akabeurwa nemiiri mizhinji yevakafa vakarurama yakamuswa.

⁵³ Navo vakabuda mumaiba ngesure kwekumuka kwake, vakapotera mudhorobha rakachena, vakaoneka ngevazhinji.

⁵⁴ Zvinopano apo nduna yezana, naavo vaiya nayo, vechirinda Jesu, vaona kuzungunyika kwenyika neizvo zvakaitika, vakatya kakurutu vechiti, “Ngegwinyiso uyu waiya Mukororo waMwari!”

⁵⁵ Kwaiyapo madzimai mazhinji vairingira vari kuretu, avo vaiya vakamuteera Jesu kubva Garire, vechimushandira.

⁵⁶ Pakati pavo kwaiyapo Maria Magadhareni, Maria mai aJakobe naJosefa, namai evana vaZebhedhi.

Kuikwa kwaJesu

⁵⁷ Kwooita madeekoni kwakauya gurudza reArimathia, zina raro raizwi Josefa, iro naro raiya mudzidzi waJesu.

⁵⁸ Iro rakaenda kunaPiratu, rikapota kupuwa muiri waJesu. Naapo Piratu wakapanga kuti riupuwe.

⁵⁹ Naapo Josefa aiya atora muiri uwo, wakauputira ngejira rakachena.

⁶⁰ Naye wakamuisa muiba idzva raiya rake, iro raiya akatsa pabuwe; naye wakamburumbudzira buwe guru pamuromo weiba akaenda.

⁶¹ Kwaiyapo Maria Magadhareni naMaria umweni vakagara ngepamberi peiba.

Varindi paIba

⁶² Nechimangwani ngesure kwezuva rokunasirira Phasika, vapristi vakuru nevaFarisi vakaungana kunaPiratu

⁶³ vechiti, “Changamire, tinokarakadza kuti uwo muchengedzi wakati achapona, ‘Ngesure kwemazuva matatu ndinozomukazve.’

⁶⁴ Ndizvo panga kuti iba rigwinyisiswe metsa kuguma zuva rechitatu, kuti vasazouya vadzidzi vake usiku, vamube nokuronza kune vanhu kuti, ‘Wakamuka kwevakafa.’ Nokuchengedza kwokugumisira kungapinda kushata kunoukwo kwokutanga.”

⁶⁵ Piratu wakati kwavari, “Imwimwi munavo varindi. Endai mwechirigwinyisisa kudai ngezvomunokona.”

⁶⁶ Ndizvo vakaenda, vakagwinyisisa iba, vechinamira namo pabuwe, varindi varipo navo.