Mateu 26 - Bhaibheri Rakachena muChindau

Bangano roKuuraya Jesu

¹ Naapo Jesu aiya apedza eshe mazwi aya, wakati kuvadzidzi vake,

² “Munozia kuti ngesure kwemazuva mairi Phasika rinozoapo, noMukororo woMunhu unozopirwa kuti akohomerwe.”

³ Naapo vakaungana vapristi vakuru nevakuru vevanhu kungome yomupristi mukuru, uwo waidaidzwa kuti Kaiafasi.

⁴ Navo vakaita bangano rokuti vabate Jesu ngourimbwi, vamuuraye.

⁵ Asi vakati, “Haiwa ngemazuva omushongano wokudya, kuti isazoapo hohoho pakati pevanhu.”

Jesu Unodzodzwa Mafuta muBhethani

⁶ Naapo Jesu ari muBhethani mumhatso yaSimoni uwo waiya nemapere,

⁷ kwakauya kwaari dzimai raiya nenhera yearibhasitera yemakha anomutengo mukuru, naro rakaadurura musoro mwake, achatseama pakudya.

⁸ Asi apo vadzidzi vake vaona, vakarurumwiswa vechiti, “Kurashanyi uku?

⁹ Ngokuti aya aizotengeswa ngomutengo mukuru uhinwe kuvarombo.”

¹⁰ Asi Jesu echizia, wakati kwavari, “Munoritambudzirenyi dzimai? Ngokuti naro rashanda mushando wakanaka kwendiri.

¹¹ Ngokuti munavo varombo nguva dzeshe, asi inini amuneni akadi nguva dzeshe.

¹² Ngokuti radurura makha aya padera pomuiri wangu, raita kunasirira muiri wangu kuikwa.

¹³ Ngegwinyiso ndinoti kwomuri, kunyazwi ngepari perinozochumairwa vhangeri munyika dzeshe, ichiwo cheraita dzimai iri chinozoereketwa ndicho, kuita chicherechedziso kweriri.”

Judhasi Unotenda Kutengesa Jesu

¹⁴ Naapo umwe wegumi navairi, unozwi Judhasi Isikarioti, wakaenda kuvapristi vakuru.

¹⁵ Naye wakati kwavari, “Chiinyi chomunozondipa kuti ndikazomuhina kwomuri?” Navo vakamuerengera zvigurwa zvesirivha makumi matatu.

¹⁶ Kubvira ngouwo mukuwo iye wakatsvaka nguva yokuti amupire.

Jesu Unodya Phasika neVadzidzi vake

¹⁷ Zvinopano ngezuva rokutanga rokudya zvingwa zvisina mumera, vadzidzi vakauya kunaJesu vechiti, “Unoda kuti tikunasirire pari pokudyira Phasika?”

¹⁸ Naye wakati kwavari, “Endai muguta kunemunhu wakatikuti, mwechiti kwaari, ‘Mudzidzisi unoti nguva yangu yaapedo; ndinozodyira Phasika kumhatso yako nevadzidzi vangu.’ ”

¹⁹ Nevadzidzi vakaita kudai ngezvaakavapanga Jesu, navo vakanasirira Phasika.

²⁰ Zvinopano apo kwaita madeekoni, wakatseama pakudya nevadzidzi varigumi navairi.

²¹ Kwakati vachadya, wakati kwavari, “Ngegwinyiso ndinoti kwomuri, umwe wenyu unozondipira.”

²² Navo vakatambudzika kakurutu, vakatanga kuronza kwaari umwe ngaumwe kuti, “Ndini here, Mambo?”

²³ Naye wakapingura, akati, “Uwo washeya ngenyara yake muchidziyo neni, ndiye unozondipira.

²⁴ Mukororo woMunhu unoenda kudai ngezvakanyorwa ndiye. Asi ihehe kuneuwo munhu waanozopirwa ndiye Mukororo woMunhu! Kwaizopinda kunaka kunouwo munhu dai asakabarwa.”

²⁵ NaJudhasi uwo wakamupira wakapingura, akati, “Rabhi, ndini here?” Iye wakati kwaari, “Watoronza.”

Chidyo chaMambo

²⁶ Vachadya, Jesu wakatora chingwa, akachibonga, akachigura; naye wakachihina kwavari echiti, “Torai, mudye; ichi chiri muiri wangu.”

²⁷ Wakatora tsani, akaibonga, akahina kwavari echiti, “Imwai mweshe kweiri.

²⁸ Ngokuti iyi iri ngazi yangu yechitenderano, inoparadzirwa ngepamusoro pevazhinji kuita kurekererwa kwezvishaishi.

²⁹ Asi ndinoti kwomuri andichazomwi ngesure kwouku kumichero iyi yomuvhini metsa zuva rendinozorimwazve idzva muumambo hwaBaba angu.”

³⁰ Naapo vaiya vaemba ruyo, vakabuda kuenda kuMutunhu wemaOrivhi.

Jesu Unoronzera Petro kuti Unozomuramba katatu

³¹ Naapo Jesu wakati kwavari, “Imwimwi mweshe munozopumhuniswa ndini usiku huno; ngokuti kwakanyorwa kuti, ‘Ndinozorova muushi nemakwai edanga anozopararira.’

³² Asi ngesure kwokumuka kwangu ndinozoenda pamberi penyu muGarire.”

³³ Asi Petro wakapingura, akati kwaari, “Kunyazwi veshe vanozopumhuniswa ndiwe, inini anditongozopumhuniswi.”

³⁴ Jesu wakati kwaari, “Ngegwinyiso ndinoti kwouri, usiku huno, risati rarira jongwe, iwewe unozondiramba katatu.”

³⁵ Petro wakati kwaari, “Kunyazwi ndechizofa newe, anditongozokurambi.” Nevadzidzi veshe vakaronza kudaro.

Jesu Unokumbira muGetsemani

³⁶ Naapo Jesu wakauya navo kundau inozwi Getsemani, akati kuvadzidzi vake, “Garai panapa imwimwi ndichaendapo kookumbira.”

³⁷ Naye wakatora navo Petro navakororo vairi vaZebhedhi, naye wakatanga kusururika nokutambudzika kakurutu.

³⁸ Zvino wakati kwavari, “Mweya wangu unotambudzika kakurutu metsa kufa. Garai panapa, murinde neni.”

³⁹ Naye wakaenda mberi kadodoko, akawa ngehope yake, akakumbira echiti, “Baba angu, kudai kungaitika, tsani iyi ngaibve kwendiri; asi haiwa kudai ngokuda kwangu, asi kudai ngokuda kwako.”

⁴⁰ Naye wakauya kunevadzidzi vake, akavaona vakaata, akati kuna Petro, “Ndizvo mwakorera kurinda neni awa rimwe here?

⁴¹ Rindai, mwechikumbira, kuitira kuti musapinda mukuedzwa; mweya ngegwinyiso unotenda, asi nyama aina simba.”

⁴² Zve ngokwechipiri wakaenda echiti, “Baba angu, kudai iyi isikapindi ngokubanze kwokuti ndiimwe inini, kuda kwako ngakuitike.”

⁴³ Wakauyazve akavaona vakaata, ngokuti madziso avo aiya echiremerwa.

⁴⁴ Naye wakavasiyazve, akaenda, akakumbira ngokwechitatu, echironza mazwi ndiwo ndiwo.

⁴⁵ Naapo wakauya kuvadzidzi, akati kwavari, “Muchakaata here zvinopano, mwechizorora? Penyai mukuwo waapasinde, noMukororo woMunhu unohinwa munyara dzevashaishi.

⁴⁶ Mirukai, tiende; penyai, waa pasinde uwo unondipira.”

Kusungwa kwaJesu

⁴⁷ Achaereketa, penya, Judhasi, umwe wevanegumi navairi, wakauya, nayo mbungano huru vaneshoti nenduku, vechibva kuvapristi vakuru nevakuru vevanhu.

⁴⁸ Zvinopano uwo wakamupira, waiya avapa chioniso echiti, “Uwo wendinozochingamidza ngomuromo ndiye; mwechimubata.”

⁴⁹ Paripo wakauya kunaJesu, akati, “Mwauya, Rabhi”; naye wakamuchingamidza ngomuromo.

⁵⁰ Jesu wakati kwaari, “Hama, ita icho chewahambira kuita.” Naapo vakauya, vakamubata Jesu ngenyara dzavo, vakamutora.

⁵¹ Penya umwe weavo vaiya naJesu wakatambanudza nyara yake, akashwamura shoti yake, wakatema muranda womupristi mukuru, akagura nzee yake.

⁵² Naapo Jesu wakati kwaari, “Hwirinza shoti yako mundau mwayo; ngokuti avo veshe vanotora shoti vanozopera ngeshoti.

⁵³ Aupinimidzi here kuti ndingakumbira kunaBaba angu, naye ungatuma zvinopano ngirosi dzinopinda hondo dzirigumi nambiri ngokuwanda?

⁵⁴ Asi kuti zvakadaro zvinyorwa zvingazoita mazadzisikirenyi, zvinoti kunosisira kuti zviitike kudaro?”

⁵⁵ Ngeawa ririro Jesu wakati kumbungano, “Mwabuda here muneshoti nenduku kuti mundibate kudai ngevanorwa negandanga? Ndakagara nemwi mazuva eshe ndechimudzidzisa muTemperi, nemwi amuzi kundibata.

⁵⁶ Asi izvi zveshe zvakaitika kuti kuzadzisike izvo zvakanyorwa ngevaprofeti.” Naapo vadzidzi vake veshe vakamusiya, vakatiza.

Jesu pamberi peVatongi vevaJudha

⁵⁷ Naavo vaiya vamubata Jesu vakamukweya kuenda kunaKaiafasi mupristi mukuru, apo pevaiya vakaungana vanyori nevakuru.

⁵⁸ Asi Petro wakamuteera ari kuretu, metsa kuguma kungome yomupristi mukuru, naye wakapotera mukati, akagara pashi nevadzimbabwe kuti aone magumo azvo.

⁵⁹ Nevapristi vakuru nemakurukota eshe vakatsvaka chapupu chokunyepa kumuitira ndaa Jesu kuti aurawe.

⁶⁰ Asi avazi kuiona; kunyazwi zvizhinji zvapupu zvokunyepa zvakauya, asi avazi kuiona. Pakugumisira kwakauya zviiri zvapupu zvokunyepa.

⁶¹ Avo vakati, “Uyu wakati, ‘Ndinesimba rokuputsa Temperi raMwari, nangemazuva matatu ndinozoriakazve.’ ”

⁶² Nomupristi mukuru wakamiruka, akati kwaari, “Aupinguri chiro here? Chiinyi chevanopupura ava kukuitira ndaa?”

⁶³ Asi Jesu wakanyarara. Nomupristi mukuru wakati kwaari, “Ndinokuphikisa ndiMwari Unopona, kuti utironzere kuti uri Kristu here, Mukororo waMwari?”

⁶⁴ Jesu wakati kwaari, “Watoronza; kani hai ndinoti kwomuri, ngesure kweizvi munozoona Mukororo woMunhu echigara pashi ngokumudyo kwoUnesimba, echiuya ari padera pemakore omudenga.”

⁶⁵ Naapo mupristi mukuru wakabaura zvokufuka zvake echiti, “Waereketa kutuka. Tichatama ngenyi zvimweni zvapupu? Penyai zvinopano mwazwa kutuka kwake.

⁶⁶ Munopinimidzenyi imwimwi?” Navo vakapingura, vakati, “Unosisira kufa.”

⁶⁷ Naapo vakamupfirira muhope mwake, vakamupamhadza, vakamurova ngendonga

⁶⁸ vechiti, “Profeta kwetiri, iwewe Kristu, kuti ndiani wakurova?”

Petro Unoramba Jesu

⁶⁹ NaPetro waiya akagara pashi kubanze paruwanze; nomusikana wakauya kwaari echiti, “Iwewewo waiya naJesu weGarire.”

⁷⁰ Asi iye wakaramba pamberi pavo veshe echiti, “Andizii chounoreketa.”

⁷¹ Naapo abuda kuenda muberere, musikana umweni wakamuona, akati kuneavo vaiyapo, “Uyu naye waiya naJesu weNazaretha.”

⁷² Zve wakaramba ngokupika mhiko kuti, “Andimuzii munhuwo.”

⁷³ Ngesure kwekamukuwo vakauya avo vaiema apo, navo vakati kuna Petro, “Ngegwinyiso iwewe newe uri umwe wavo, ngokuti kuereketa kwako kunopangidzira kudaro.”

⁷⁴ Naapo wakatanga kutuka nokupika kuti, “Anditongomuzii munhuwo.” Paripo jongwe rakarira.

⁷⁵ NaPetro wakakarakadza izwi raJesu, iro raakaereketa kuti, “Risati rarira jongwe, iwewe unozondiramba katatu.” Naye wakabuda kubanze, akachema kakurutu.