Mateu 25 - Bhaibheri Rakachena muChindau

Muedzaniso weVasikana Vari Gumi

¹ “Zvinopano umambo hwomudenga hunoedzaniswa nevasikana varigumi, avo vakatora zvibani zvavo, vakabuda kooshongana nomukwambo.

² Vashanu vavo vaiya mapenzi nevashanu vaiya vakangwara.

³ Ngokuti avo vaiya mapenzi vakatora zvibani zvavo, avazikutora mafuta navo.

⁴ Asi vakangwara vakatora mafuta mukati mwezvidziyo zvavo, pamwepo nezvibani zvavo.

⁵ Apo mukwambo achanonoka, vakakutsira veshe vakaata.

⁶ Asi pakati pousiku kwakadaidzirwa kuti, ‘Penyai, mukwambo! Budai kooshongana naye.’

⁷ Naapo vasikana veshe vakamiruka, vakanasirira zvibani zvavo.

⁸ Namapenzi akati kunevakangwara, ‘Tipenyiwo mafuta enyu; ngokuti zvibani zvedu zvinodzima.’

⁹ Asi vakangwara vakapingura, ‘Azvingadaropi, ngokuti aazokwani isusu nemwi. Asi mwechienda kuneavo vanotengesa, mudzitengere.’

¹⁰ Asi vachaenda kootenga, mukwambo wakauya; naavo vaiya vakanasirira vakapotera naye mumuchadho, noruvhi rwakakonywa.

¹¹ Ngesureni kwakauyawo vasikana vamweni vechiti, ‘Mambo, Mambo, tibeurire.’

¹² Asi iye wakapingura echiti, ‘Ngegwinyiso ndinoti kwomuri, anditongomuzii.’

¹³ Ndizvo rindai imwimwi ngokuti amuzii zuva nokuti awa.

Muedzaniso weMatarenda

¹⁴ “Ngokuti zvakadai ngomunhu wakatikuti echida kuenda kunyika imweni, wakadaidza varanda vake, akahina kwavari zviro zvake.

¹⁵ Nokuneumwe wakahina matarenda ari mashanu, nokuneumweni wakahina mairi, nokuneumweni rimwe; kuneumwe ngaumwe wavo wakahinwa kudai ngokukona kwake kushandisa, wakaenda rwendo rwake.

¹⁶ Paripo uwo wakaashira matarenda mashanu wakaenda akaaberekesa, wakauyirwa ngemashanu amweni.

¹⁷ Ngokudarozve uwo wakaashira mairi, wakauyirwazve ngemairi.

¹⁸ Asi iye wakaashira rimwe, wakaenda, akatsira mumavhu, akafisha mare yamambo wake.

¹⁹ Ngesure kwomukuwo wakareba mambo wevaranda avo wakauya, akaerengerana navo.

²⁰ Nouwo wakaashira matarenda mashanu wakauya, wakaunza matarenda amweni mashanu echiti, ‘Mambo, wakahina kwendiri matarenda aiya mashanu, penya, ndakauyirwa ngeamweni matarenda mashanu.’

²¹ Namambo wake wakati kwaari, ‘Wakashuma, iwewe muranda wakanaka nounogondeka; wakagondeka padera pezvishomani, ndinozokuemesa padera pezvakawanda; pinda mukudakara kwamambo wako.’

²² Wakauyawo uwo wakaashira matarenda mairi, akati, ‘Mambo, wakahina kwendiri matarenda mairi; penya, ndakauyirwa ngematarenda amweni mairi.’

²³ Mambo wake wakati kwaari, ‘Wakashuma, muranda wakanaka nounogondeka; iwewe wakagondeka ngezvishomani, ndinozokuemesa padera pezvakawanda, pinda mukudakara kwamambo wako.’

²⁴ Wakauyawo uwo wakaashira tarenda rimwe, akati, ‘Mambo, ndakakuzia iwewe kuti uri munhu wakakonza, unokukura pousikazi kukusha nokuunganidza pousikazi kuparadzira.

²⁵ Neni ndakatya, ndakaenda, ndikafisha tarenda rako mumavhu. Penya, iri riri rako.’

²⁶ Asi mambo wake wakapingura, akati kwaari, ‘Iwewe muranda wakashata nounenungo! Waizia here kuti ndinokukura pendisikazi kukusha nokuunganidza pendisikazi kuparadzira?

²⁷ Ndizvo kwaisisira kuti uise mare yangu kwavari vebhange, kuti mukuuya kwangu ndaizoashirazve yangu nokuuyirwa kwayo.

²⁸ Ndizvo torai kwaari tarenda, muhine kwaari unematarenda gumi.

²⁹ Ngokuti kwaari weshe unacho unozohinwa, naye unozoa nezvakawanda. Asi kunouwo usina, eya, neicho chaanacho chinozobviswa kwaari.

³⁰ Mwechirasha muranda uwo usikadetseri chiro muchidima chiri kubanze. Kunozoiteyo kuboorera nokukwetsana kwemazino.’

Kutonga kwoKupedzisira

³¹ “Asi apo Mukororo woMunhu oouya muuthende hwake nengirosi dzeshe naye, naapo unozogara padera pedendemaro routhende hwake.

³² Nepamberi pake anozounganidzwa madzinza eshe, naye unozovaparadzanisa umwe kuneumweni kudai ngomuushi unoparadzanisa makwai kubva kunembudzi.

³³ Naye unozoisa makwai ngokumudyo kwake, asi mbudzi ngokumuoshwe kwake.

³⁴ Naapo Mambo unozoti kwavari vari ngokumudyo kwake, ‘Uyai, imwimwi mwakadakadziswa ndiBaba angu, mugare nhaka youmambo hwakanasirirwa imwimwi kubvira pakusikwa kwenyika.

³⁵ Ngokuti ndaiya ndinenzara nemwi mwakandipa kudya, ndaiya ndinenyota nemwi mwakandipa chokumwa, ndaiya ndiri mupfumba nemwi mwakandiashira,

³⁶ ndaiya ndiri mutitinini nemwi mwakandifukidza, ndairwara nemwi mwakandihambira, ndaiya mutirongo nemwi mwakauya kwendiri.’

³⁷ Naapo vanozomupingura vakarurama vechiti, ‘Mambo, takakuona riini unenzara tikakupa kudya? Nokuti unenyota tikakupa chokumwa?

³⁸ Takakuona riini uri mupfumba, tikakuashira? Nokuti uri mutitinini tikakufukidza?

³⁹ Takakuona riini wechirwara nokuti uri mutirongo tikauya kwouri?’

⁴⁰ NaMambo unozopingura echiti kwavari, ‘Ngegwinyiso ndinoti kwomuri, kudai ngezvemwakaita kuneumwe weava vadoko vanun'una vangu, mwakachiita kwendiri.’

⁴¹ Naapo unozoti kwavari vari ngokumuoshwe kwake, ‘Ibvai kwendiri, imwimwi mwakatukwa, muende mumwoto usikaperi, uwo wakanasirirwa Dhiabhorosi nengirosi dzake.

⁴² Ngokuti ndaiya nenzara amuzi kundipa kudya, ndaiya ndine nyota amuzi kundipa chokumwa,

⁴³ ndaiya ndiri mupfumba amuzikundiashira, ndaiya ndiri mutitinini amuzikundifukidza, ndairwara, ndaiya mutirongo amuzi kundihambira.’

⁴⁴ Naapozve avo navo vanozomupingura vechiti, ‘Mambo, takakuona riini unenzara, nokuti unenyota, nokuti uri mupfumba, nokuti uri mutitinini, nokuti wechirwara, nokuti uri mutirongo, nesu atizikukushandira?’

⁴⁵ Naapo iye unozovapingura echiti, ‘Ngegwinyiso ndinoti kwomuri, kudai ngezvemusikazi kuitira kuneumwe weava vadoko vanun'una vangu, amuzi kuchiitira kwendiri.’

⁴⁶ Naavo vanozoenda mukuororwa kusikaperi, asi vakarurama mukupona kusikaperi.”