Mateu 24 - Bhaibheri Rakachena muChindau

Jesu Unoereketa ngoKuputswa kweTemperi

¹ Jesu wakabuda muTemperi; oenda vadzidzi vake vakauya kwaari kuti vamupangidzire mhatso dzeTemperi.

² Naye wakapingura, akati kwavari, “Amuoni izvi zveshe here? Ngegwinyiso ndinoti kwomuri, arizosiiwi panapa buwe padera pebuwe rimweni risikazoputsirwi pashi.”

Madambudziko noKutambudzwa

³ Achagara paMutunhu wemaOrivhi, vadzidzi vake vakauya kwaari ari ega vechiti, “Tironzere, izvi zvinozoitika riini? Zve chiinyi chinozoita chioniso chokuuya kwako nechokuguma kwenyika.”

⁴ Jesu wakapingura, akati kwavari, “Ngwarai kuti musazopaukiswa ngomunhu.

⁵ Ngokuti vazhinji vanozouya ngezina rangu vechiti, ‘Inini ndiri Kristu’, vanozorashikisa vazhinji.

⁶ Nemwi munozozwa ngokuambana nemawirira okuambana; ngwarai kuti musazotambudzika; ngokuti kunosisira kuti zveshe zviitike, asi magumo aasati aguma.

⁷ Ngokuti dzinza rinozomukirana nedzinza, noumambo hunozomukirana noumambo; kunozoapo nzara nokuzungunyika kwenyika kundau dzakaparadzana.

⁸ Izvi zveshe zviri zvokuamba kwemadambudziko.

⁹ Naapo vanozomuhina mukutambudzwa, navo vanozomuuraya; nemwi munozonyenywa ngemadzinza eshe ngepamusoro pezina rangu.

¹⁰ Naapo vazhinji vanozopumhunwa, vanozohinana umwe noumweni nokunyenyana.

¹¹ Nevaprofeti vokunyepa vazhinji vanozoapo, navo vanozorashikisa vazhinji.

¹² Ngokuti kushaisha kunozowanda, rudo rwevazhinji runozopora.

¹³ Asi iye unozoshingirira metsa kumagumo unozoponeswa.

¹⁴ Neiri vhangeri roumambo rinozochumairwa munyika dzeshe kuita chapupu kumadzinza eshe; naapo kupera kunozoguma.

Chinyangadzo Chinoparadza Chakashata yaamho

¹⁵ “Ndizvo apo mwozoona chinyangadzo chokuparadza chaakaereketa ndicho Dhanieri muprofeti chechiema mundau yakachena, (uwo unodzidza ngaazwisise)

¹⁶ naapo avo vari muJudhia ngavatizire kumitunhu.

¹⁷ Naye uri padera pechachungu chemhatso, asadzaka kutora zviro zviri mumhatso yake.

¹⁸ Naye uri mumunda asahwirira sure kootora bhachi rake.

¹⁹ Asi ihehe kwavari avo vaanemimba naavo vanoamwisa ngaao mazuva!

²⁰ Kumbirai kuti kutiza kwenyu kusazoitika ngenguva yechando nokuti ngezuva reSabatha.

²¹ Ngokuti kunozoapo kutambudzika kukurutu, ukwo kusikazi kumboitika kwakadaro kubvira mukuamba kwenyika metsa kuguma zvinopano, zve, akuchatongozoitiki zvakadaro.

²² Kudai mazuva awo asikazofupiswi, akuna nomunhu unozoponeswa; asi ngepamusoro pevakatsanangurwa, awo mazuva anozofupiswa.

²³ Ngouwo mukuwo kuti aripo munhu unozoti kwomuri, ‘Penyai, Kristu uri panapa’, nokuti ‘Apo’, musazozvitenda.

²⁴ Ngokuti vanozoapo vaKristu vokunyepa nevaprofeti vokunyepa, navo vanozoita zvioniso zvikuru nemishamiso, kupaukisa, kudai zvechiitika, eya nevakatsanangurwa.

²⁵ Penyai, ndamuronzera izvi ngepamberi.

²⁶ Ndizvo kuti vechizoti kwomuri, ‘Penyai, uri mushango,’ musaendeyo. ‘Penyai, uri mukamera romukati,’ musazotenda.

²⁷ Ngokuti kudai ngemheni inobva kumabvazuva, inojekisa metsa kuguma kumabirirazuva; kunozodaro nokuuya kwoMukororo woMunhu.

²⁸ Ngokuti apo panemiiri yakafa, ndipo pedzinoungana ngwanga.

Kuuya kwoMukororo woMunhu

²⁹ “Ngokukasira ngesure kwokutambudzika kwemazuva awo, zuva rinozoita chidima, nemwedzi auzojeki, nenyeredzi dzinozowa kubva mudenga, nesimba reshe romudenga rinozozungunyiswa.

³⁰ Naapo kunozooneka chioniso choMukororo woMunhu mudenga, nemadzinza eshe enyika anozobonda, nawo anozomuona Mukororo woMunhu echiuya padera pemakore omudenga, anesimba nouthende hukuru.

³¹ Naye unozotuma ngirosi dzake ngokuridzwa kukurutu kwegwama, nadzo dzinozounganidza vakatsanangurwa vake kubva kumadutu marongomuna, kubva kumagumo amwe omudenga metsa kuguma kumagumo amweni.

Chidzidziso choMuti woMuonde

³² “Zvinopano dzidzai muedzaniso kumuti womuonde; apo dai rawo riri mbishi, rechiburikira mashakani, imwimwi munozia kuti zienza raapasinde.

³³ Ngokudaro imwimwiwo, apo mwoona izvi zveshe, munozia kuti uri pasinde pamisiwo.

³⁴ Ngegwinyiso ndinoti kwomuri kuti uyu mubarirwana auzopindi metsa izvi zveshe zviitike.

³⁵ Denga nenyika zvinozopinda, asi mazwi angu aatongozopindi akadi.

Akuna Unozia Zuva nokuti Awa roKuuya kwoMukororo woMunhu

³⁶ “Asi ngendaa yezuva iro neawa iro akuna naumwe unozia, kunyazwi ngirosi dzomudenga nokuti Mukororo, kwega Baba.

³⁷ Ngokuti kudai ngemazuva aNoa, kunozodarozve kuuya kwoMukororo woMunhu.

³⁸ Ngokuti ngemazuva awo ngepamberi pendambi, vakadya, vechimwa nokuroora nokuroodza, metsa rakaguma zuva iro raakapotera ndiro Noa mungarava.

³⁹ Navo avazikuzia metsa ndambi yakaguma, yakavatora veshe, kunozodarowo kuuya kwoMukororo woMunhu.

⁴⁰ Naapo vanhu vairi vanozoapo mumunda, umwe unozotorwa noumweni unozosiiwa.

⁴¹ Vakadzi vairi vechikuya paguyo, umwe unozotorwa noumweni unozosiiwa.

⁴² Ndizvo rindai; ngokuti amurizii zuva raanozouya Mambo wenyu.

⁴³ Asi mwechizia ichi, kuti kudai munewemhatso aizia mukuwo weinouya ndiwo mbavha iye waizorinda, asikatendi kuti mhatso yake ipwanyiwe.

⁴⁴ Ndizvo itai vakanasirirwa; ngokuti ngeawa romusikapinimidzi Mukororo woMunhu unouya.

Muranda Unogondeka noUsikagondeki

⁴⁵ “Ndizvo ndiani uri muranda unogondeka newakangwara, uwo mambo wake wakamuemesa kuita mutongi padera pemhatso yake, kuti avape kudya kwavo ngenguva kwayo?

⁴⁶ Unomuchena muranda uwo apo mambo wake ouya unozomuona echiita kudaro.

⁴⁷ Ngegwinyiso ndinoti kwomuri, unozomuemesa kuti aite mutongi padera peizvo zveshe zvaanazvo.

⁴⁸ Asi kuti uwo muranda wakashata unozoti mumwoyo mwake, ‘Mambo wangu unononoka kuuya;’

⁴⁹ naye atange kurova varanda avo vari vangani vake, adye echimwa pamwepo nezviradza,

⁵⁰ mambo wouwo muranda unozouya ngezuva raasikakariri neawa raasikazii.

⁵¹ Naye unozomutema kuita zvigurwa, aemese kwaari chikoaniswa chake pakati pevadziitisi. Unozoiteyo kuboorera nokukwetsana kwemazino.