Mateu 22 - Bhaibheri Rakachena muChindau

Muedzaniso weDhiri roMuchadho

¹ NaJesu wakapingura, akaereketazve kwavari ngemiedzaniso echiti,

² “Umambo hwomudenga hunoedzaniswa nomunhu uri mambo, wakaitira mukororo wake dhiri romuchadho.

³ Naye wakatuma varanda vake kudaidza avo vakakokwa kudhiri romuchadho, navo avazi kuda kuuya.

⁴ Wakatumazve varanda vamweni echiti, ‘Ronzerai avo vakakokwa kuti, penyai ndanasirira kudya kwangu; n'ombe dzangu nedzakanuna dzangu dzaurawa, nazvo zveshe zvanasirirwa; uyai kudhiri romuchadho.’

⁵ Asi avo vakazvirerusa, vakaenda, umwe kumunda wake noumweni kootengesa kwake,

⁶ navo vakasara vakabata varanda vake, vakavashononesa, vakavauraya.

⁷ Naapo mambo azwa izvi wakatseneka, naye wakatuma hondo dzake, akavauraya avo vaurayi, akapisha dhorobha ravo.

⁸ Naapo wakati kuvaranda vake, ‘Dhiri romuchadho ranasirirwa, asi avo vakakokwa vaiya vasikasisiri.

⁹ Ndizvo endai pamhararano dzenjira, navo veshe vomunozoona, mwechivakoka kuti vauye kudhiri romuchadho.’

¹⁰ Naavo varanda vakabuda, vakaenda munjira, vakaunganidza veshe avo vevakandoona, veshe vakashata nevakanaka; mhatso yedhiri romuchadho yakazara ngevaeni.

¹¹ Asi apo mambo apotera kuringira vaeni, wakaona munhu waiya asikazi kupfeka bhachi romuchadho.

¹² Naye wakati kwaari, ‘Hama, waita mapoterenyi muno usina bhachi romuchadho?’ Asi iye wakanyarara.

¹³ Naapo mambo wakati kuvaranda vake, ‘Mwechimusunga tsoka nenyara, mwechimukandira muchidima chiri kubanze; kunozoiteyo kuboorera nokukwetsana kwemazino.’

¹⁴ Ngokuti vazhinji vanodaidzwa, asi vashomani vanotsanangurwa.”

Mubvunzo ngendaa yoKubhadhara Chibharo kunaSiza

¹⁵ Naapo vaFarisi vakaenda, vakaita bangano rokuti vamuteye mukuereketa kwake.

¹⁶ Navo vakatumira kwaari vadzidzi vavo pamwepo nevaHerodhi vechiti, “Mudzidzisi, tinozia kuti iwewe uri wegwinyiso, unodzidzisa njira yaMwari ngegwinyiso, autunhumadzi munhu; ngokuti aupenyi hope yomunhu.

¹⁷ Tironzere zvinopano unopinimidzenyi. Ndizvo here kuti tibhadhare chibharo kunaSiza nokuti tisabhadhara?”

¹⁸ Asi Jesu, echizia kushata kwavo, wakati, “Munondiedza ngenyi, imwimwi vadziitisi?

¹⁹ Ndipangidzirenyi mare yechibharo.” Navo vakaunza kwaari chigurwa chemare chinozwi dhinariusi.

²⁰ Naye wakati kwavari, “Ngowaani uyu mutodzaniso nouku kunyorwa?”

²¹ Vakati, “NgezvaSiza.” Naapo wakati kwavari, “Ndizvo mwechihina kunaSiza zvaSiza, nokunaMwari izvo zviri zvaMwari.”

²² Naapo vazwa, vakashamiswa, vakamusiya vakaenda.

Mubvunzo ngendaa yoKumuka kweVakafa

²³ Ngezuva ndiro ndiro, vaSadhusi avo vanoti akuna kumuka kwevakafa, vakauya kwaari, vakamubvunza

²⁴ vechiti, “Mudzidzisi, Mosi wakati, ‘Kuti munhu akafa, asina vana, munun'una wake unozoroora mukadzi wake aberekere mukoma wake vana.’

²⁵ Ndizvo kwaiyapo nesu vakoma vanomwe; nouwo wokutanga wakaroora, wakafa asina vana, wakasiya mukadzi wake kune munun'una wake.

²⁶ Ngokudarozve newechipiri newechitatu, metsa kupedzisira ngowechinomwe.

²⁷ Napakugumisira kwavo veshe mukadzi wakazofawo.

²⁸ Ndizvo mukumuka kwevakafa, unozoita mukadzi waani kwavari vanomwe? Ngokuti veshe vakamuroora.”

²⁹ Jesu wakapingura, akati kwavari, “Munokangaidzwa ngokusikazia zvinyorwa nokuti simba raMwari.

³⁰ Ngokuti mukumuka kwavakafa, avaroori, zve avaroorwi, asi vari vakadai ngengirosi dziri mudenga.

³¹ Asi ngendaa yokumuka kwevakafa, amuzi kutongodzidza here icho chakaereketwa kwomuri ndiMwari echiti,

³² ‘Inini ndiri Mwari waAbrahama naMwari waIsaka naMwari waJakobe?’ Mwari aasiri Mwari wevakafa akadi, asi wevanopona.”

³³ Naapo mbungano yazwa izvi, yakashamiswa ngokudzidzisa kwake.

Mupango Mukuru

³⁴ Asi apo vaFarisi vazwa kuti waiya anyararisa vaSadhusi, vakaungana pamwepo.

³⁵ Umwe wavo waiya gweta, wakamubvunza mubvunzo, echimuedza echiti,

³⁶ “Mudzidzisi, ngouri mupango mukuru muMipango?”

³⁷ Naye wakati kwaari, “Unozomuda Mambo Mwari wako ngomwoyo wako weshe, ngomweya wako weshe nemirangariro yako yeshe.”

³⁸ Ichi chiri mupango mukuru nowokutanga.

³⁹ Newechipiri wakadai ngouyu, “Unozomuda muakirwana wako kudai ngokudzida iwewe.

⁴⁰ Kuneiyi mipango miiri ndipo pasingwisingwi yeMipango yeshe nevaprofeti.”

Mubvunzo ngendaa yaKristu

⁴¹ Zvinopano vaFarisi vachaungana, Jesu wakavabvunza

⁴² echiti, “Munopinimidzenyi ndiKristu? Mwana waani?” Vakati kwaari, “Mukororo waDhavhidha.”

⁴³ Wakati kwavari, “Ndizvo ngenyi Dhavhidha, ari muMweya, unomudaidza kuti Mambo echiti,

⁴⁴ ‘Mambo wakati kunaMambo wangu, gara ngokumudyo kwangu, metsa ndiite magaa ako chitambarariro chetsoka dzako?’

⁴⁵ Ndizvo, kuti Dhavhidha akamudaidza kuti Mambo, zvino uri mukororo wake ngokuitawani?”

⁴⁶ Kwaiya kusina munhu waikona kumupingura neizwi, zve, kwaiya kusina munhu kubvira ngezuva iro waishinga kuchamubvunza mibvunzo.