Mateu 21 - Bhaibheri Rakachena muChindau

Kupotera kwoKunyisa kwaJesu muJerusarema

¹ Naapo vakwedzera pasinde peJerusarema, vaguma Bhethifaje, kuMutunhu wemaOrivhi, Jesu wakatuma vairi vevadzidzi vake.

² Wakati kwavari, “Endai kuguta iro remwakaringirana naro, paripo munozoona mbongoro yakasungwa netsiru pamwepo nayo; mwechidzisunhura, mudziunze kwendiri.

³ Kuti aripo unozoereketa chiro kwomuri, munozoti, ‘Mambo unodzitama,’ chiriporipo unozodzitumira.”

⁴ Ichi chakaitika kuti kuzadzisike ukwo kwakaereketwa ngomuprofeti echiti,

⁵ “Ronzerai mwanasikana weZioni. Penya, Mambo wako unouya kwouri, ari wakapfaa, echigadha padera pembongoro nepadera petsiru rechifuyo chemitwaro.”

⁶ Nevadzidzi vakaenda, vakaita kudai ngezvaakavapanga Jesu.

⁷ Navo vakaunza mbongoro netsiru rayo, vakaisa zvokufuka zvavo padera padzo, vakamugadzika padera payo.

⁸ Norupande ruzhinji rwembungano rwakachinga zvokufuka zvavo munjira; nevamweni vakatema matai emiti, vakaawara munjira.

⁹ Nembungano yaihamba pamberi pake, neiyo yaiteera ngesure, yakadaidzira yechiti, “Hosana kuMukororo waDhavhidha! Unomuchena uwo unouya ngezina raMambo! Hosana mudengadenga!”

¹⁰ Naapo apotera muJerusarema, vedhorobha reshe vakaita nyongano vechiti, “Ndiani uyu?”

¹¹ Nembungano yakati, “Uyu muprofeti Jesu, unobva Nazaretha reGarire.”

Jesu Unochenesa Temperi

¹² NaJesu wakapotera muTemperi, wakabudisa avo veshe vaitengesa naavo vaitenga muTemperi, naye wakapinduridza matafura eavo vaitenganisana mare nezvigaro zvaavo vaitengesa njia.

¹³ Wakati kwavari, “Kwakanyorwa kuti, ‘Mhatso yangu inozozwi imhatso yokudira; asi imwimwi mwaiita bako rembavha.’ ”

¹⁴ Mapofu nezvirema zvakauya kwaari muTemperi, naye wakavaponesa.

¹⁵ Asi apo vapristi vakuru nevanyori vaona izvo zvinoshamisa zvaakaita, nevana vaidaidzira muTemperi vechiti, “Hosana kuMukororo waDhavhidha,” vakatseneswa,

¹⁶ navo vakati kwaari, “Unozwa here icho chevanoereketa ava?” NaJesu wakati kwavari, “Eya. Amuzi kutongodzidza here, kuti kubva kumiromo yendumure neyevanoamwa unoashira kukudzwa kwakaperera?”

¹⁷ Naye wakavasiya, akabuda mudhorobha, akaenda Bhethani, naye wakaata apo.

Jesu Unotuka Muonde

¹⁸ Mangwanani apo echihwirira kudhorobha waiya nenzara.

¹⁹ Naapo aona muonde pasinde penjira, wakaguma kwouri, akaona usina chiro, asi mashakani ega, naye wakati kwouri, “Michero isachazoberekwa kwouri kunoti mhera nariini.” Paripo muonde wakazeketera.

²⁰ Kwakati vadzidzi vaona, vakashamiswa vechiti, “Muonde wazeketera ngokukasira ngenyi?”

²¹ Jesu wakapingura, akati kwavari, “Ngegwinyiso ndinoti kwomuri, kudai munokutenda musikagonondi, amungazoiti chega icho chakaitwa kunemuonde, asi kunyazwi mwechizoti kunouyu mutunhu, ‘Ibva panapa, ukandirwe muruandhle,’ chinozoitika.

²² Nazvo zveshe zvomunozokumbirira mumikumbiro ngokugonda, munozozviashira.”

Mubvunzo ngendaa yeSimba raJesu

²³ Naapo apotera muTemperi, vapristi vakuru nevakuru vevanhu vakauya kwaari achadzidzisa, vakati, “Ngesimba raani rounoita izvi ndiro? Ndiani wakakupa simbaro?”

²⁴ Jesu wakapingura, akati kwavari, “Inini ndinozomubvunzawo chiro chimwe, kuti mukandironzera, ndinozomuronzerawo kuti isimba raani rendinoita izvi ndiro.

²⁵ Rubhabhatidzo rwaJohani rwakabva kuri? Rwakabva mudenga here, nokuti rwakabva kuvanhu?” Navo vakapangana pakati pavo vechiti, “Kuti tikaronza kuti, ‘Rwakabva mudenga,’ unozoti kwetiri, ‘Ndizvo amuzikumutenda ngenyi?’

²⁶ Asi kuti tikaronza kuti, ‘Rwakabva kuvanhu,’ tinotya vanhu; ngokuti veshe vanoti kuti Johani waiya muprofeti.”

²⁷ Navo vakapingura kunaJesu vakati, “Atizii.” Naye wakati kwavari, “Ininiwo andimuronzeri kuti ndinoita izvi ngesimba raani.

Muedzaniso weVakororo Vairi

²⁸ “Asi munopinimidzenyi? Munhu waiya nevakororo vairi; naye wakaenda kunewokutanga, akati, ‘Mwana, enda nyamashi ushande mumunda wemivhini.’

²⁹ Naye wakapingura, akati, ‘Andidi’, asi ngesure wakatenderuka, akaenda.

³⁰ Naye wakaenda kunewechipiri, wakaereketa ndizvo ndizvo. Iye wakapingura, akati, ‘Ndinoenda, baba’, asi ngesure aazi kuenda.

³¹ Ndiani pavairi wakaita kuda kwababa ake?” Vakati, “Uwo wokutanga.” Jesu wakati kwavari, “Ngegwinyiso ndinoti kwomuri, vabharisi nemhombo vanomutangira kupotera muumambo hwaMwari.

³² Ngokuti Johani wakauya kwomuri munjira yokururama, nemwi amuzi kumutenda; asi vabharisi nemhombo vakamutenda; nemwi apo mwaona izvo amuzi kutenderuka ngesureni, kuti mugonde kwaari.

Muedzaniso weVaranda muMinda yeMivhini

³³ “Izwai muedzaniso umweni. Kwaiyapo munewemhatso wakatikuti, wakasima munda wemivhini, wakaushoshera ngerusvingo, wakatsvaka pokukamurira vhini mukati mwawo, naye wakaaka chitumba akauhina kuti ungwarirwe ngevarimi, akaenda kunyika imweni.

³⁴ Naapo nguva yokuibva kwemichero yakwedzera, wakatuma varanda vake kuvarimi avo, kuti vaashire chikoaniswa chake chemichero.

³⁵ Nevarimi avo vakatora varanda vake, vakachaya umwe, vakauraya umweni, vakaponda umweni ngemapuwe.

³⁶ Wakatumazve varanda vamweni vakapinda kuwanda kuneavo vokutanga, navo vakaita kwavari ndizvo ndizvo.

³⁷ Asi pakupedzisira wakatuma kwavari mukororo wake echiti, ‘Vanozoremeredza mukororo wangu.’

³⁸ Asi apo varimi vaona mukororo uwo, vakati pachavo, ‘Uyu ndiye unogara nhaka. Uyai ngatimuuraye, titore nhaka yake.’

³⁹ Navo vakamubata, vakamubudisa kubanze kwomunda wemivhini, vakamuuraya.

⁴⁰ Ndizvo apo mambo womunda wemivhini ouya, unozoitenyi kuneavo varimi?”

⁴¹ Vakati kwaari, “Unozouraya vanhu vakashata ngokuuraya kwakashata, naye unozohina munda uwo wemivhini kuvarimi vamweni, avo vanozohina kwaari michero ngemikuwo yayo.”

⁴² Jesu wakati kwavari, “Amuzi kutongodzidza here muzvinyorwa kuti, ‘Buwe iro rakarambwa ngevaaki, ndiro rakaitwa soro repakona; ichi chakabva kunaMambo, nacho chinoshamisa mukuona kwedu?’

⁴³ “Ndizvo ndinoti kwomuri kuti, umambo hwaMwari hunozoduswa kwomuri, nahwo hunozohinwa kudzinza iro rinobereka michero yahwo. [

⁴⁴ Naye uwo unozowa padera pebuwe iri, unozoputika; asi iye werinowa padera pake, rinozomukuya kuita bukuta.”]

⁴⁵ Naapo vapristi vakuru nevaFarisi vazwa miedzaniso yake, vakazia kuti unoereketa ndivo.

⁴⁶ Naapo vakatsvaka kuti vamubate, vakatya mbungano ngokuti iyi yaigonda kuti muprofeti.