Mateu 20 - Bhaibheri Rakachena muChindau

Vashandi muMunda weMivhini

¹ “Ngokuti umambo hwomudenga hunoedzaniswa nomunhu uri mune wemhatso, uwo wakafumira mangwanani maishi kootora vashandi vomunda wake vemivhini.

² Naapo atenderana nevashandi ngechigurwa chesirivha ngezuva, wakavatuma kumunda wemivhini.

³ Naye wakabudazve rooda kuita awa rechitatu, akaona vamweni vakaema pandau yomusika, vasikashandi.

⁴ Wakati kwavari, ‘Mwechiendawo mumunda wemivhini, neicho chinomusisira ndinozomupa.’ Navo vakaenda.

⁵ Wakabudazve rooda kuita awa rechitanhatu nerechipfumbamwe, wakaitazve kudaro.

⁶ Rooda kuita awa rechigumi narimwe wakabuda, akaona vamweni vakaema, akati kwavari, ‘Munoema panapa ngenyi zuva reshe musina chomunoshanda?’

⁷ Vakati kwaari, ‘Ngokuti apana munhu watitora.’ Wakati kwavari, ‘Mwechiendawo mumunda wemivhini.’

⁸ Kwaita madeekoni mambo womunda wemivhini wakati kunenhunge yake, ‘Daidza vashandi, uvape misharo yavo, utange ngouwo wokugumisira metsa kuguma kunouwo wokutanga.’

⁹ Kwakati vechiuya avo vakatorwa ngeawa rechigumi narimwe vakaashira chigurwa chesirivha.

¹⁰ Kwakati avo vokutanga voouya vakapinimidza kuti vangatutsirwa; navo ngokudaro vakaashira munhu weshe chigurwa chesirivha.

¹¹ Naapo vaashira, vakavhuruvhutira munewemhatso

¹² vechiti, ‘Ava vokupedzisira vashanda awa rimwe rega, newe waita kuti vaedzane nesu, isusu takatwara mutwaro nokupisha kwezuva.’

¹³ Asi iye wakapingura, akati kunoumwe wavo, ‘Mungani, andizi kukuitira chakashata. Auzi kutenderana neni here ngechigurwa chesirivha?

¹⁴ Tora icho chiri chako uende. Ndinoda kumupawo uyu wokupedzisira kudai ndiwe.

¹⁵ Akutenderwi here kwendiri kuti ndiite icho chendinoda ngezviri zvangu? Nokuti dziso rako raita godo ngokuti inini ndakanaka here?’

¹⁶ Ndizvo avo vesure vanozoita vepamberi, nevepamberi vanozoita vesure.”

Jesu Unoereketa kwechitatu ngendaa yoKufa noKumuka kwake

¹⁷ Apo Jesu akwira Jerusarema, wakatora vadzidzi gumi navairi vari vega munjira, naye wakati kwavari,

¹⁸ “Penyai, tinokwira Jerusarema; noMukororo woMunhu unozohinwa kuvapristi vakuru nevanyori, navo vanozomutongera rufu.

¹⁹ Navo vanozomuhina kunevemadzinza kuti aitirwe jee nokuchaiwa nokukohomerwa, ngezuva rechitatu unozomuka.”

Chikumbiro chaMai vaJakobe naJohani

²⁰ Naapo kwakauya kwaari mai evakororo vaZebhedhi, pamwepo nevakororo vake, akagwadama, echikumbira kwaari chiro.

²¹ Naye wakati kwaari, “Chiinyi chomunoda?” Wakati kwaari, “Ronza kuti ava vakororo vangu vairi vagare umwe ngokumudyo kwako noumweni ngokumuoshwe kwako muumambo hwako.”

²² Asi Jesu wakapingura, akati “Amuzii chomunokumbira. Munokona here kumwa kutsani yendichamwa inini?” Vakati kwaari, “Tinokona.”

²³ Iye wakati kwavari, “Ngegwinyiso munozomwa kutsani yangu; asi kugara ngokumudyo kwangu nokuti ngokumuoshwe kwangu, andikwopi kwangu kuhina, asi ngekwaavo vakakunasirirwa ndiBaba angu.”

²⁴ Naapo varigumi vazwa, vakatsenekera avo vakoma vairi.

²⁵ Asi Jesu wakavadaidza kwaari, akati, “Munozia kuti vatongi vemadzinza vanotonga padera pavo, nevakuru vavo vanesimba padera pavo.

²⁶ Asi akuzodaropi pakati penyu; asi iye unoda kuti aite mukuru pakati penyu ngaaite mushandiri wenyu.

²⁷ Nouwo unoda kuita wokutanga pakati penyu ngaaite muranda wenyu.

²⁸ Kudai ngoMukororo woMunhu aazi kuuya kushandirwa, asi kushandira nokuhina kupona kwake kuita muripo wevazhinji.”

Jesu Unopembenudza Mapofu Mairi muJerikho

²⁹ Navo vachabuda kubva muJerikho mbungano huru yakamuteera.

³⁰ Penya, mapofu mairi akagara panjira, apo akazwa kuti Jesu waizopindapo, akadaidzira echiti, “Mambo, Mukororo waDhavhidha, tiitire nyasha.”

³¹ Nembungano yakaakaraidza kuti anyarare. Asi akapinda kudaidzisa echiti, “Mambo, Mukororo waDhavhidha, tiitire nyasha.”

³² NaJesu wakaema, akaadaidza, akati, “Munoda kuti ndimuitirenyi?”

³³ Akati kwaari, “Mambo, kuti madziso edu apembenudzwe.”

³⁴ Ndizvo Jesu wakaazwira urombo, akagwama madziso awo; paripo madziso awo akapembenudzwa, nawo akamuteera.