Mateu 2 - Bhaibheri Rakachena muChindau

Vazii Vanobva kuMabvazuva

¹ Kwakati apo Jesu abarwa muBhetherehema reJudhia ngemazuva aHerodhi mambo, penya, kwakauya vazii vaidzidza ngezvenyeredzi vechibva kumabvazuva vakaguma Jerusarema

² vechiti, “Uri pari uwo wakabarwa Mambo wavaJudha? Ngokuti takaona nyeredzi yake kumabvazuva, nesu tauya kuti timudire.”

³ Kwakati Herodhi mambo azwa, wakatambudzika neveJerusarema veshe naye.

⁴ Naapo aunganidza pamwepo vapristi vakuru veshe nevanyori vevanhu, wakavabvunza kuti, “Unozobarwa pari Kristu?”

⁵ Navo vakati kwaari, “MuBhetherehema reJudhia; ngokuti kwakanyorwa ngomuprofeti kudai:

⁶ ‘Iwewe Bhetherehema, nyika yaJudha, auri mudoko akadi mukati mwevatongi vaJudha; ngokuti kwouri kunozobuda mutungamiriri uwo ndiye unozoita muushi wevanhu vangu vaIsuraeri.’ ”

⁷ Naapo Herodhi adaidza vazii vaidzidza ngezvenyeredzi ngokufishika, wakanasa kubvunzisisa kwavari mukuwo weyakaoneka nyeredzi.

⁸ Naye wakavatuma Bhetherehema, akati, “Endai munase kutsvakisisa uwo mwana mudoko; kuti mwamuona mundiunzire izwi, kuti neniwo ndiende ndimudire.”

⁹ Navo, apo vazwa mambo, vakaenda, penya, nyeredzi iyo yevakaona kumabvazuva yakavatungamirira metsa yakaguma pandau apo paiya nemwana mudoko.

¹⁰ Naapo vaona nyeredzi vakadakara ngokudakara kukurutu.

¹¹ Vapotera mumhatso, vakaona mwana mudoko naMaria mai ake; navo vakawa pashi, vakamudira; kwakati vabeura pfuma yavo vakamupa zvipo, mukore, makha nemhura.

¹² Navo vechipangwa mukurota kuti vasachahwirira kunaHerodhi, vakaenda ngenjira imweni kunyika yavo.

Josefa naMaria Vanotizira Egipite

¹³ Naapo vaenda, penya, ngirosi yaMambo yakaoneka kunaJosefa mukurota yechiti, “Miruka, utore mwana mudoko namai ake, utizire Egipite, ugare apo metsa ndikuronzere, ngokuti Herodhi unozotsvaka mwana mudoko kumuuraya.”

¹⁴ Naye wakamiruka, akatora mwana mudoko namai ake usiku, wakaenda Egipite,

¹⁵ naye wakagareyo metsa kufa kwaHerodhi, kuti zvidzadzisike izvo zvakaereketwa ndiMambo kubudikidza ngomuprofeti echiti, “Ndakadaidza mukororo wangu kuti abude Egipite.”

Kuuraiwa kweVana ndiMambo Herodhi

¹⁶ Naapo Herodhi aona kuti wakaitirwa jee ngevazii vaidzidza ngezvenyeredzi, wakatseneka kakurutu, wakatuma, akauraya vadoko veshe vevakomana vaiya vari muBhetherehema nenharaunda yaro yeshe, avo vaiya vaane makore mairi nevaiya pashi paawo, kudai ngomukuwo uwo waaiya akanasa kubvunzisisa vazii vaidzidza ngezvenyeredzi.

¹⁷ Zvakazadzisika izvo zvakaereketwa kubudikidza ndiJeremia muprofeti echiti,

¹⁸ “Izwi rakazwika muRama, kuchema nokutsumba kukurutu, Racheri echichemera vana vake, asikatendi kuembedzerwa, ngokuti vaiya vasisipo.”

Kupetuka kwaJesu kubva Egipite

¹⁹ Asi apo Herodhi afa, penya, ngirosi yaMambo yakaoneka mukurota kunaJosefa ari muEgipite yechiti,

²⁰ “Miruka, utore mwana mudoko namai ake, uende munyika yeIsuraeri; ngokuti avo vaitsvaka kuuraya mwana mudoko vakafa.”

²¹ Naye wakamiruka, akatora mwana mudoko namai ake, akauya munyika yeIsuraeri.

²² Asi azwa kuti Akirausi waiya mambo weJudhia pandau yababa ake Herodhi, wakatya kuendayo; echinyowedzwa mukurota, wakapaukira kunyika yeGarire,

²³ wakauya akagara muguta rinozwi Nazaretha; kuti rizadzisike izwi rakaereketwa ngevaprofeti kuti, “Unozozwi muNazaretha.”