Mateu 19 - Bhaibheri Rakachena muChindau

Jesu Unodzidzisa ngendaa yoKurambana

¹ Kwakatika apo Jesu apedza kuereketa aya mazwi, wakabuda muGarire, wakauya kumigano yeJudhia, ruseri rweJorodhani.

² Mbungano huru yakamuteera, naye wakavaponesa apo.

³ NevaFarisi vakauya kwaari, vechimuedza vechiti, “Kunotenderwa here ngezvironzo kuti munhu arambe mukadzi wake ngendaa kunyazwi ngeiri?”

⁴ Naye wakapingura, akati, “Amuzikudzidza here kuti uwo wakavasika pakutanga, wakavasika mwamuna nomukadzi.

⁵ Akati, ‘Ngeiyi ndaa munhu unozosiya baba ake namai, unozonamatira kumukadzi wake neava vairi vanozoita nyama imwe.’

⁶ Ndizvo avachaiti vairi, asi nyama imwe. Ndizvo icho chaakasunganidza Mwari, munhu asasunhura.”

⁷ Vakati kwaari, “Ndizvo ngenyi Mosi akapanga kuhina tsamba yokuparadzana nokumuramba?”

⁸ Wakati kwavari, “Mosi ngendaa yokukonza kwomwoyo yenyu wakamutendera kuti murambe vakadzi venyu. Asi kubvira pakutanga zvaiya zvisikazi kudaro.

⁹ Asi inini ndinoti kwomuri, kunyazwi ndiani uwo unoramba mukadzi wake isiri ndaa yokuomba, aroore umweni, unoomba.”

¹⁰ Vadzidzi vakati kwaari, “Kuti yakadaro ndaa yomunhu nomukadzi wake, akuzi kunaka kuroora.”

¹¹ Asi wakati kwavari, “Veshe avangaashiri izwi iri, asi kwega kwavari avo vakaripuwa.

¹² Ngokuti varipo vari ngomwa kubva mundani dzemadzimai avo; varipozve mitenwa avo vakatenwa ngevanhu, varipozve vakadziitisa ngomwa ngepamusoro poumambo hwomudenga. Iye unesimba rokuashira, ngaariashire.”

Jesu Unofumisa Vana Vadoko

¹³ Naapo vakaunza kwaari vana vadoko, kuti aise nyara dzake padera pavo, avakumbirire. Asi vadzidzi vakavarambidza.

¹⁴ Asi Jesu wakati, “Tenderai vana vadoko kuti vauye kwendiri, musavarambidza, ngokuti umambo hwomudenga ngehwevakadaro.”

¹⁵ Naye wakaisa nyara dzake padera pavo, akabva apo.

Jaha Mupfumi

¹⁶ Penya, umwe wakauya kwaari, akati, “Mudzidzisi, chiinyi icho chakanaka chendingaita kuti ndizoona kupona kusikaperi?”

¹⁷ Naye wakati kwaari, “Unondibvunza ngenyi ngendaa yechakanaka? Uripo umwe wakanaka, asi kudai wechida kupotera mukupona wechingwarira mipango.”

¹⁸ Wakati kwaari, “Mipango iri?” NaJesu wakati, “Usazouraya, usazoomba, usazoba, usazoita chapupu chokunyepa,

¹⁹ remeredza baba ako namai, unozoda muakirwana wako kudai ngokudzida iwewe.”

²⁰ Jaha rakati kwaari, “Ndakazvingwarira izvi zveshe. Chiinyi chasara kuti ndiite?”

²¹ Jesu wakati kweriri, “Kuti wechida kuita wakaperera, enda utengese zveshe zvounazvo, uhine kuvarombo, newe unozoona upfumi mudenga, uuye unditeere.”

²² Asi apo jaha razwa izwi iro rakaenda rechitambudzika; ngokuti raiya noupfumi hwakawanda.

²³ Naapo Jesu wakati kuvadzidzi vake, “Ngegwinyiso ndinoti kwomuri, kwakakonza kunegurudza kuti ripotere muumambo hwomudenga.

²⁴ Zve ndinoti kwomuri, kwakapinda kuita nyore kuti kamera ripotere ngepauri renaiti, kunekuti gurudza ripotere muumambo hwaMwari.”

²⁵ Apo vadzidzi vazwa izvi, vakashamiswa kakurutu, vakati, “Kuti zvakadaro, ndiani ungaponeswa?”

²⁶ Asi Jesu echivaringira, wakati kwavari, “Kunevanhu ichi achiitiki; asi kunaMwari zveshe zvinoitika.”

²⁷ Naapo Petro wakapingura, akati kwaari, “Ringira, isusu takasiya zveshe, tikakuteera; ndizvo tinozoonenyi?”

²⁸ Jesu wakati kwavari, “Ngegwinyiso ndinoti kwomuri, munyika itsva, apo Mukororo woMunhu paanozogara padera pedendemaro routhende hwake, imwimwiwo mwakanditeera munozogarawo padera pemadendemaro gumi namairi, mwechitonga madzinza gumi namairi aIsuraeri.

²⁹ Nemunhu weshe wakasiya mhatso, nokuti vanun'una, nokuti hanzvadzi, nokuti baba, nokuti mai, nokuti vana, nokuti minda, ngepamusoro pezina rangu, unozoashira zvakapetwa kuita zana, naye unozogara nhaka yokupona kusikaperi.

³⁰ Asi vazhinji avo vari vepamberi vanozoita vesure; naavo vari vesure vanozoita vepamberi.