Mateu 12 - Bhaibheri Rakachena muChindau

Mubvunzo ngendaa yeSabatha

¹ Ngouwo mukuwo Jesu wakahamba ngomuminda yekoroni ngezuva reSabatha. Nevadzidzi vake vaiya vafukama, vakatanga kupurura mitsonzoti yekoroni vechidya.

² Asi apo vaFarisi vaona ichi, vakati kwaari, “Ringira, vadzidzi vako vanoita icho chisikatenderwi ngeMipango kuti chiitwe ngeSabatha.”

³ Asi wakati kwevari, “Amuzikudzidza here icho chaakaita Dhavhidha, apo aiya afukama, naavo vaiya naye,

⁴ kuti wakapotera mumhatso yaMwari, akadya zvingwa izvo zvaipangidzirwa, zvaiya zvisikatenderwi kuti iye azvidye, nokuti avo vaiya naye, asi kwega vapristi?

⁵ Zve amuzikudzidza here muMipango kuti ngezuva reSabatha vapristi vari muTemperi vanogura Sabatha vasina ndaa?

⁶ Asi ndinoti kwomuri chiri panapa chiro chinopinda Temperi kukura.

⁷ Asi dai mwaizia kuti kunotinyi uku, ‘Ndinoda nyasha, haiwa kuhinwa mibairo,’ mwaizodai musikazi kuvaitira ndaa avo vasina ndaa.

⁸ Ngokuti Mukororo woMunhu ndiye Mambo weSabatha.”

Jesu Unoponesa Munhu Une Nyara Yakaonyana

⁹ Naye echibvapo wakapotera mumhatso yavo yokudira.

¹⁰ Ringira, kwaiyapo munhu unenyara yake yakaonyana. Navo vakamubvunza kuti, “Kunotenderwa here kuponesa ngezuva reSabatha?” kuti vamuparise ndaa.

¹¹ Naye wakati kwavari, “Ndiani munhu kwomuri anegwai rimwe, kuti iro rikazowira mudzara ngezuva reSabatha, aazoribati here kuribudisa?

¹² Ndizvo munhu unopinda gwai kudikanwa kwakaitawani? Ndizvo kunotenderwa ngeMipango kuita zvakanaka ngezuva reSabatha.”

¹³ Naapo wakati kunemunhu uwo, “Tambanudza nyara yako.” Naye wakaitambanudza, nayo yakaponeswa kudai ngeimweni.

¹⁴ NevaFarisi vakabuda, vakaita bangano ndiye, kuti vangamuita maurairenyi.

Muranda Wakatsanangurwa waMwari

¹⁵ Asi Jesu echizia wakabvapo nembungano huru yakamuteera, naye wakavaponesa veshe.

¹⁶ Wakapanga kuti vasazoita kuti aziikanwe,

¹⁷ kuti rizadzisike izwi rakaereketwa ndiIsaya muprofeti echiti,

¹⁸ “Ringirai muranda wangu wendakatsanangura, mudikani wangu, uwo mweya wangu unodakara ndiye. Ndinozoisa mweya wangu padera pake, naye unozoteketesa kutonga kwakarurama kumadzinza.

¹⁹ Aazorwi nokuti kudaidzira, zve akuna unozozwa izwi rake mumapato.

²⁰ Aazoruvhuni rutsanga rwakakopfama, netonje rinopwititika aazoridzimi, metsa atume kutonga kwakwo kuti kunyise;

²¹ vemadzinza vanozogonda kunezina rake.”

Jesu naBheerizebhuri

²² Naapo kwakaunzwa kwaari umwe waiya nedhimoni, ari bofu nechimbungumbungu. Naye wakamuponesa, ngokudaro chimbungumbungu chakaereketa nokuona.

²³ Nevanhu vazhinji veshe vakashamiswa, vakati, “Uyu andiyepi here Mukororo waDhavhidha?”

²⁴ Asi vaFarisi vazwa vakati, “Uyu munhu unodzinga madhimoni ngesimba raBheerizebhuri, mambo wemadhimoni.”

²⁵ NaJesu echizia mikarakadzo yavo, wakati kwavari, “Umambo hweshe hunodziparadza hunozopera; nemadhorobha eshe nokuti mhatso zvinodziparadza azvizoemi akadi.

²⁶ Nokudai Sathani echidzinga Sathani, iye wadziparadza. Ndizvo umambo hwake hungazoita maemerenyi?

²⁷ Kudai inini ndechidzinga madhimoni ngesimba raBheerizebhuri, ndizvo vakororo venyu vanoadzinga ndiani? Ndizvo vachaita vatongi venyu.

²⁸ Asi kuti inini ngoMweya waMwari ndechidzinga madhimoni, ndizvo umambo hwaMwari hwauya kwomuri.

²⁹ Munhu ungaita mapotererenyi mumhatso youwo unesimba, aparadze nhumbi dzake, kuti asati asunga uwo unesimba? Naapo unozoparadza mhatso yake.

³⁰ Iye usipo neni unorwa neni; nouwo usikaunganidzi neni unotatanisa.

³¹ Ndizvo ndinoti kwomuri, ‘Kushaisha kweshe nezvituko zveshe zvinozorekererwa kuvanhu, asi kutukwa kwoMweya akurekererwi.’

³² Nouwo unoereketa izwi rokurwa noMukororo woMunhu, unozorekererwa; asi iye unoereketa kurwa noMweya Wakachena, aazorekererwi munyika muno nokuti munyika inouya.

Muti noMunhu Zvinoziikanwa ngeMichero yazvo

³³ “Mwechiita kuti muti unake nemichero yawo inake. Nokuti muite kuti muti ushate nemichero yawo ishate. Ngokuti muti unoziikanwa ngemichero yawo.

³⁴ Imwimwi vana vemabuura, mungaita maereketerenyi zvakanaka, muri vakashata? Ngokuti muromo unoereketa kubva kunezvakawanda zviri mumwoyo.

³⁵ Munhu wakanaka kubva kuupfumi hwakanaka hwomwoyo wake wakanaka unobudisa zvakanaka. Nomunhu wakashata kubva kuupfumi hwakashata unobudisa zvakashata.

³⁶ Asi inini ndinoti kwomuri, mazwi eshe asina shwiro anozoereketwa ngevanhu, vanozobvunzisiswa ndiwo ngezuva rokutongwa.

³⁷ Ngokuti ngemazwi ako unozopembedzwa, zve ngemazwi ako unozopariswa ndaa.”

Jesu Unoramba Kuita Mushamiso

³⁸ Naapo vamweni vevanyori nevaFarisi vakamupingura vechiti, “Mudzidzisi, tinoda kuona chioniso chinoitwa ndiwe.”

³⁹ Asi iye wakapingura akati kwavari, “Mubarirwana wakashata nounoomba unotsvaka chioniso; asi akuna chioniso chinozooniswa kwouri, kwega chioniso chaJona muprofeti.

⁴⁰ Ngokuti kudai ndiJona wakapedza mazuva matatu nousiku hutatu mundani yehove huru, ngokudaro Mukororo woMunhu unozogara mazuva matatu neusiku hutatu ari mumwoyo wenyika.

⁴¹ Vanhu veNinevhe vanozomiruka ngezuva rokutongwa pamwepo nouyu mubarirwana nokuuitira ndaa, ngokuti ivo vakatenderuka ngokuchumaira kwaJona. Ringirai, chiri panapa chiro chikuru chinopinda Jona.

⁴² Mambokadzi wokubani unozomiruka ngezuva rokutongwa pamwepo nomubarirwana uyu nokuuitira ndaa. Ngokuti iye wakabva ari kumagumo enyika kuuya koozwa ngokungwara kwaSoromoni. Ringirai, chiri panapa chiro chikuru chinopinda Soromoni.

Kupetuka kwoMweya Wakashata kuMunhu

⁴³ “Asi apo mweya unetsvina wabuda kumunhu, unoparura kuhamba ndau dzisina mvura, wechitsvaka kuzorora, usikakuoni.

⁴⁴ Naapo unoti, ‘Ndinozohwirirayo kumhatso yangu apo pendakabva. Naapo wauya unoiona isina chiro, yakatsvairwa nokurongedzwa.’

⁴⁵ Naapo unoenda worowotorazve mweya imweni minomwe, inoupinda ngokushata, nayo inopoteramwo yechigara apo. Nokupedzisira kwouwo munhu kunozopinda kushata kunekugara kwokutanga. Kunozodarowo nokuneuyu mubarirwana wakashata.”

Mai neVanun'una vaJesu

⁴⁶ Apo achaereketa kumbungano, ringira, mai ake nevanun'una vake vakaema ngokubanze, vechitsvaka kuti vaerekete naye.

⁴⁷ Noumweni wakati kwaari, “Ringirai, mai ako nevanun'una vako vakaema kubanze vechitsvaka kuereketa newe.”

⁴⁸ Asi iye wakapingura akati kuneuwo wakamuronzera, “Ndiani mai angu, ndianizve vanun'una vangu?”

⁴⁹ Naye wakatambanudzira nyara yake kunevadzidzi vake akati, “Ringirai, mai angu nevanun'una vangu!

⁵⁰ Ngokuti uwo unozoita kuda kwaBaba angu vari mudenga, ndiye munun'una wangu, hanzvadzi namai.”