Mateu 11 - Bhaibheri Rakachena muChindau

Nhumwa Dzinobva kunaJohani Mubhabhatidzi

¹ Kwakaitika apo Jesu apedza kupanga vadzidzi vake gumi navairi, wakamiruka kubvapo, akaenda koodzidzisa nokuchumaira mumadhorobha avo.

² Zvinopano apo Johani azwa ari mutirongo mishando yaKristu, wakatumira izwi ngevadzidzi vake.

³ Navo vakati kwaari, “Ndiwe here uwo unouya, nokuti tichagarira umweni?”

⁴ NaJesu wakapingura, akati kwavari, “Endai, muronzere Johani izvo zvomunozwa nezvomunoona.

⁵ Mapofu anoona, nezvirema zvinohamba, nevanemapere vanomhodyoswa, nemadziiranzee vanozwa, nevakafa vanomuswa, nevarombo vane vhangeri rinochumairwa kwavari.

⁶ Unomuchena uwo usikapumhunwi ndini.”

⁷ Naapo vachaenda, Jesu wakatanga kuereketa kumbungano ngendaa yaJohani, wakati, “Mwakaenda mushango koonenyi? Rutsanga rwakazungunyiswa ngedutu here?

⁸ Asi mwakaenda koonenyi? Munhu wakapfekeswa ngemachira akapfaa here? Penya, avo vanopfeka machira akapfaa vari mumhatso dzemadzimambo.

⁹ Asi mwakaendeyo koonenyi? Muprofeti here? Eya, ndinoti kwomuri, nouwo unonyanya kupinda muprofeti.

¹⁰ Uyu ndiye wevakanyora ndiye kuti, ‘Penya, ndinotuma munyai wangu pamberi pehope yako, uwo unozonasira njira yako pamberi pako.’

¹¹ Ngegwinyiso ndinoti kwomuri, ‘Pakati peavo vakaberekwa ngevakadzi, akuzi kutongobva mukuru kupinda Johani Mubhabhatidzi. Asi iye uri mudoko muumambo hwomudenga uri mukuru kwaari.’

¹² Kubvira kumazuva aJohani Mubhabhatidzi metsa zvinopano umambo hwomudenga hunopambwa ngezvigebengwa zvinohutora ngesimba.

¹³ Ngokuti vaprofeti veshe neMipango zvakaprofeta metsa orooguma Johani.

¹⁴ Kudai mwechitenda kuchiashira, ‘Uyu ndiye Erija, uwo wakaemeswa kuuya.’

¹⁵ Uwo unenzee dzekuzwa ngaazwe.

¹⁶ Asi ndouedzanisa nenyi uyu mubarirwana? Wakadai ngevana vanogara pandau dzomusika, vechidaidzira kunevangani vavo

¹⁷ vechiti, ‘Takaridza minanzi kwomuri, nemwi amuzikuzvina; takaita chiriro, nemwi amuzikubonda.’

¹⁸ Ngokuti Johani wakauya asikadyi nokuti kumwa, navo vakati, ‘Unedhimoni.’

¹⁹ Mukororo woMunhu wakauya echidya nokumwa, navo vakati, ‘Penyai mubhoki nomumwisi wevhini, shamwari yevabharisi neyevashaishi!’ Asi kungwara kwakapembedzwa ngemishando yakwo.”

Madhorobha Asikagondi

²⁰ Naapo wakatanga kuganyira madhorobha umwo mwaiya mwaitwa mishando mizhinji yake inesimba, ngokuti avazi kutenderuka.

²¹ “Ihehe kwouri, Khorazini! Ihehe kwouri, Bhethisaidha! Ngokuti kudai mishando inesimba yaiya yakaitwa muThire neSidhoni, iyo yakaitwa mukati mwenyu, vaidai vakatotenderuka karetu, vane masaka nemarota.

²² Kani hai, ndinoti kwomuri, ‘Kunozopinda kureruka kuneThire neSidhoni ngezuva rokutongwa kunekwomuri.’

²³ Newe Khapernaume, unozokuriswa mudenga here? Unozodzaswa pashi kuHaidhesi. Ngokuti kudai mishando inesimba yaiya yakaitwa muSodhoma, iyo yakaitwa mukati mwako, raidai riripo nanyamashi.

²⁴ Kani hai, ndinoti kwomuri kuti kunozopinda kureruka kunyika yeSodhoma ngezuva rokutongwa kuneiwewe.”

Uyai kwendiri Muzorore

²⁵ Ngouwo mukuwo Jesu wakapingura, akati, “Ndinokutenda, Baba, Mambo womudenga newenyika, ngokuti iwewe wakazvifisha izvi kune vakangwara nevanekuzia, wakazvipangidzira kuchiya.

²⁶ Eya, Baba, ngokuti chaiya chinodakadza mukuona kwako.

²⁷ Zviro zveshe zvakahinwa kwendiri ndiBaba angu. Akuna unozia Mukororo, ndiBaba ega. Akunazve unozia Baba, asi Mukororo ega, nouwo waanoda kumupangidzira Mukororo.

²⁸ Uyai kwendiri imwimwi mweshe munoremba, munodzimbirwa ngomutwaro, neni ndinozomuzorodza.

²⁹ Mwechitora joka rangu padera penyu, mudzidze kwendiri, ngokuti inini ndakapfaa mumwoyo, nemwi munozoona kuzorora kumweya yenyu.

³⁰ Ngokuti joka rangu rakanaka nomutwaro wangu unoreruka.”