Mateu 10 - Bhaibheri Rakachena muChindau

Jesu Unodaidza Vadzidzi vake Gumi naVairi

¹ Naapo adaidza kwaari vadzidzi vake gumi navairi, wakavapa simba padera pemweya ine tsvina kuti vaidzinge nokurapa nhenda dzeshe nokurwara kweshe.

² Aya ndiwo mazina evapostori gumi navairi: uwo wokutanga ndiSimoni waizwi Petro, naAndreu munun'una wake; naJakobe mukororo waZebhedhi, naJohani munun'una wake,

³ Firipi, Bhathoromeu; Thomasi naMateu mubharisi; Jakobe mukororo waArifeusi, naThadheusi;

⁴ Simoni muKhenani naJudhasi Isikarioti uwo wakamupira.

Jesu Unotuma Vadzidzi Gumi naVairi

⁵ Ava gumi navairi Jesu wakavatuma, akavapanga echiti, “Musaenda munjira yevemadzinza, musapotera muguta kunyazwi ngeriri revaSamaria.

⁶ Asi endai kumakwai akarashika emhatso yaIsuraeri.

⁷ Muchaenda mwechichumaira, mwechiti, ‘Umambo hwomudenga hwakwedzera.’

⁸ Mwechirapa vanorwara, mwechimusa vakafa, mwechimhodyosa vanemapere, mwechidzinga madhimoni; mwakaashira ngenyasha, mwechipawo ngenyasha.

⁹ Musatora mukore nokuti sirivha nokuti thusi muzvikwama zvenyu;

¹⁰ zve, nokuti munzaa werwendo rwenyu, musina mabhachi mairi nokuti magwada nokuti ndonga; ngokuti mushandi unosisira kupuwa kudya kwake.

¹¹ Kunyazwi ngomuri mudhorobha nokuti muguta mwemunozopinda, bvunzai kuti ndiani uri mukati mwaro unosisira; apo ndipo pomunozogara metsa mubvemwo.

¹² Mwoopotera mumhatso muichingamidze.

¹³ Nokudai mhatso iyo yechisisira, kunyarara kwenyu ngakuuye padera payo; asi kuti isikasisiri ngakuhwirire kwomuri.

¹⁴ Kunyazwi ndiani usikazomuashiri nokuti kupurutana mazwi enyu, mwechibudamwo mumhatso iyo nokuti dhorobha iro, guwai bukuta kubva patsoka dzenyu.

¹⁵ Ngegwinyiso ndinoti kwomuri, kunozopinda kureruka kunenyika yeSodhoma neyeGomora ngezuva rokutongwa kuneiro dhorobha.

Madambudziko Achazouya

¹⁶ “Ringirai, ndinomutuma kudai ngemakwai mukati mwemathika. Ndizvo mwechingwara kudai ngenyoka, mwakapfaa kudai ngenjia.

¹⁷ Asi ngwarai vanhu, ngokuti vanozomuhina kubangano revatongi, navo vanozomurova mumhatso dzavo dzokudira.

¹⁸ Nemwi munozounzwa pamberi pemakota nepemadzimambo ngepamusoro pangu, kuita chapupu kwavari nokumadzinza.

¹⁹ Asi apo voomuhina, musazodembatemba kuti munozoereketenyi nokuti munozoronza chiinyi; ngokuti kunozohinwa kwomuri ngeawaro chomunozoereketa.

²⁰ Ngokuti andimwipi munoereketa, asi Mweya waBaba enyu unoereketa uri mukati mwenyu.

²¹ Nomukoma unozohina munun'una kuti afe, ngokudaro baba mwana wavo, nevana vanozomukira vabari nokuvauraya.

²² Nemwi munozonyenywa ndivo veshe ngendaa yezina rangu. Asi uwo unoshingirira metsa kumagumo, ndiye unozoponeswa.

²³ Naapo vanozomutambudza muguta rimwe, mwechitizira kune rimweni; ngokuti ngegwinyiso ndinoti kwomuri, amuzopedzi kuhamba madhorobha eshe aIsuraeri, asati auya Mukororo woMunhu.

²⁴ “Mudzidzi aari padera pomudzidzisi wake akadi, nomuranda aari padera pamambo wake.

²⁵ Kwakanaka kuti mudzidzi adai ngomudzidzisi wake, nomuranda kuti adai ndimambo wake. Kudai vakadudza munewemhatso kuti Bheerizebhuri, vanozopinda kwakaitawani kuvadudza kudaro avo vari vemhatso yake!

Ziai woKutya

²⁶ “Ndizvo musavatya; ngokuti apana chiro chakafishika chisikazooneki; nokuti chakafishiridzwa chisikazoziikanwi.

²⁷ Icho chendinomuronzera muchidima, mwechichiteketesa mukujeka, neicho chomunozwa ngevherevhere, mwechichichumaira muri padera pechachungu chemhatso.

²⁸ Musatya avo vanouraya muiri, asi vasina simba rokuuraya mweya. Asi mutye uwo unesimba rokuparadza zveshe mweya nomuiri muGehena.

²⁹ Zviwanzaburi zviiri azvitengiswi ngesendi here? Nechimwe chazvo achizowi pashi pamavhu kusatenderwa ndiBaba enyu.

³⁰ Asi nebvudzi resoro renyu rakaerengwa reshe.

³¹ Ndizvo musatya, muri vanopinda kudikanwa kunezviwanzaburi zvakawanda.

Kutenda noKuramba Jesu

³² “Ndizvo weshe uwo unozonditenda pamberi pevanhu, neniwo ndinozomutenda pamberi paBaba angu vari mudenga.

³³ Kunyazwi ndiani unozondiramba pamberi pevanhu, neniwo ndinozomuramba pamberi paBaba angu vari mudenga.

Andizi Kuunza Kunyarara asi Shoti

³⁴ “Musapinimidza kuti ndakauya kuunza kunyarara padera penyika. Andizi kuuya kuunza kunyarara, asi shoti.

³⁵ Ngokuti ndakauya kuparadzanisa munhu nababa ake, nemwanasikana namai ake, nomunyamwana namazvarira ake.

³⁶ Nemagaa omunhu anozoita avo vari vemhatso yake.

³⁷ Iye unopinda kuda baba kunyazwi mai kuneinini, aazi kundisisira. Naye unopinda kuda mukororo kunyazwi mwanasikana kuneinini, aazi kundisisira.

³⁸ Neuwo usikatori muchinjiko wake, ateere sure kwangu, aazi kundisisira.

³⁹ Iye unoona kurarama kwake unozokurasha, nouwo unozorasha kurarama kwake ngepamusoro pangu unozokuona.

Misharo

⁴⁰ “Iye unomuashira imwimwi unondiashira inini, nouwo unondiashira, unoashirawo uwo wakandituma.

⁴¹ Iye unoashira muprofeti ngezina romuprofeti, unozoashira musharo womuprofeti; nouwo unoashira munhu wakarurama ngezina romunhu wakarurama, unozoashira musharo womunhu wakarurama.

⁴² Nouwo unozopa umwe wevadoko ava tsani yemvura inotonhora yega ngezina romudzidzi, ngegwinyiso ndinoti kwomuri, aatongozorashikirwi ngomusharo wake.”