Marku 9 - Bhaibheri Rakachena muChindau

¹ Wakati kwavari, “Ngegwinyiso ndinoti kwomuri, varipo vamweni veavo vanoema panapa, vasikazozwi kufa metsa vaone umambo hwaMwari hwechiuya unesimba.”

Kutsandudzwa kwaJesu paMutunhu

² Ngesure kwemazuva matanhatu Jesu wakatora Petro, Jakobe naJohani, akakwira navo padera pomutunhu wakareba, vari vega. Naye wakatsandudzwa pamberi pavo,

³ nezvokufuka zvake zvakan'anikira zvikachena kuti mbeembee, ngokudaro akuna musuki munyika ungaita kuti zvichene kudaro.

⁴ Kwakaoneka kwavari Erija naMosi, vechiereketa naJesu.

⁵ NaPetro wakati kunaJesu, “Rabhi, zvakanaka kuti tindoapanapa; ngatitoita zvitumba zvitatu, chimwe chako, chimweni chaMosi nechimweni chaErija.”

⁶ Ngokuti iye waiya asikachazii kuti ungaereketenyi, ngokuti vakakarudzwa nokutyiswa kakurutu.

⁷ Kwakauya gore rikavathibikira, izwi rakazwika rechibva mugore rechiti, “Uyu ndiye Mukororo wangu unodikanwa; muzwenyi.”

⁸ Paripo vechiringaringa avazi kuona munhu, kwega Jesu navo.

⁹ Vachadzaka kubva pamutunhu, wakavapangirisisa kuti vasazoronzera munhu izvo zvevaiya vaona, metsa Mukororo woMunhu azomukazve kubva kwevakafa.

¹⁰ Navo vakaringwarira izwi iro, veibvunzisana pakati pavo kuti chiinyi kumuka kwevakafa.

¹¹ Vakamubvunza vechiti, “Ngenyi vanyori vanoti kunosisira kuti Erija atange kuuya?”

¹² Wakati kwavari, “Ngegwinyiso Erija unotanga kuuya, kuti amusidzire zveshe. Asi ngenyi zvakanyorwa zvichiti, ‘Mukororo woMunhu unosisira kuti atambudzike ngezviro zvakawanda nokurambwa?’

¹³ Asi inini ndinoti kwomuri, Erija wakatouya, navo vakaita kwaari zvevakada, kudai ngezvakanyorwa ngendaa yake.”

Jesu Unoponesa Murumbwana Unemweya Wakashata

¹⁴ Naapo vaguma kunevadzidzi, vakaona mbungano huru yechivaunganira nevanyori vechivabvunza.

¹⁵ Paripo mbungano yeshe yamuona yakashamiswa kakurutu, yakarumba kuuya kwaari, ikamuchingamidza.

¹⁶ Wakavabvunza kuti, “Chiinyi chomunobvunza kwavari?”

¹⁷ Umwe wembungano wakamupingura akati, “Mudzidzisi, ndaunza mwana wangu kwouri, unemweya wakashata naye aakoni kuereketa.

¹⁸ Naapo wamubata, unomuposhera pashi; naye unobudisa mafuro, mazino echikwetsana, echioma muiri; neni ndakumbira vadzidzi vako kuti vaudzinge, asi avazi kukona.”

¹⁹ Naye wakapingura, akati kwavari, “A! Mubarirwana usikatendi, ndinozogara nemwi nguva yakadini? Ndinozotsengerera mukuwo wakaitawani? Muunzenyi kwendiri.”

²⁰ Vakamuunza kwaari; naapo mweya wakashata waona Jesu, paripo mweya wakasukumidza murumbwana kakurutu, naye wakawa pashi pamavhu, akaburukuta echibudisa mafuro.

²¹ Wakabvunza baba ake kuti, “Mukuwo wakaitawani wechiita kudai kwaari?” Navo vakati, “Kubvira pauhwana hwake.

²² Nemikuwo mizhinji wakamukandira mumuriro nomumvura kuti umuuraye; asi kudai unesimba rokuita chiro, tiitire nyasha, utidetsere.”

²³ Jesu wakati kwaari, “Kudai unesimba! Zviro zveshe zvingaitika kwaari unotenda.”

²⁴ Paripo baba vemwana vakadaidzira vakati, “Ndinotenda; detsera kusikatendi kwangu!”

²⁵ Jesu aona kuti mbungano yairumba kuuya pamwepo, wakakaraidza mweya wakashata echiti kwouri, “Iwewe mweya wembeveve newedziiranzee, ndinokupanga kuti ubude kubva mwaari, usachazopoterazve mwaari.”

²⁶ Nawo wechiboorera, wakamukandira pashi ngesimba gurutu, wakabuda kubva mwaari. Nomurumbwana uwo wakaita kudai ngewatofa, ngokudaro vazhinji vavo vakati, “Watofa.”

²⁷ Asi Jesu wakamubata ngenyara, akamumirudza, naye wakamiruka.

²⁸ Naapo apotera mumhatso, vadzidzi vake vakamubvunza vari vega vechiti, “Isusu atizi kukona ngenyi kuudzinga?”

²⁹ Wakati kwavari, “Urwu rudzi arungabudi ngechiro chimweni kwega asi ngokukumbira.”

Jesu Unoereketazve ngendaa yoKufa noKumuka kwake

³⁰ Vakabvapo vakahamba ngemuGarire, iye aazi kuda kuti munhu azie ichi.

³¹ Ngokuti waidzidzisa vadzidzi vake, echiti kwevari, “Mukororo woMunhu unozohinwa munyara dzavanhu, navo vanozomuuraya; naapo aurawa, ngesure kwemazuva matatu unozomuka.”

³² Asi avazi kuzwisisa izwi iro, vakatya nokumubvunza.

Ndiani Mukuru

³³ Vakaguma Khapernaume; apo aamumhatso wakavabvunza kuti, “Chiinyi chemwaiphikisana ndicho munjira?”

³⁴ Navo vakanyarara, ngokuti vaiya vechiphikisana munjira kuti ndiani mukuru.

³⁵ Naapo agara pashi, wakadaidza kwaari vanegumi navairi, akati kwavari, “Kunyazwi ndiani unoda kuita wokutanga ngaaite chigumisirwa kwavari veshe nomuranda wavo veshe.”

³⁶ Naye wakatora mwana mudoko, akamuemesa pakati pavo; amutengura munyara dzake, wakati kwavari,

³⁷ “Kunyazwi ndiani unozoashira umwe weava vadoko wakadai ngezina rangu, unondiashira inini; nouwo unondiashira inini, aandiashiri inini asi uwo wakandituma.”

Uwo Usikarwi nesu ngeWedu

³⁸ Johani wakati kwaari, “Mudzidzisi, takaona umwe echirasha madhimoni ngezina rako, nesu takamurambidza ngokuti waiya asikatiteeri.”

³⁹ Asi Jesu wakati, “Musamurambidza; ngokuti akuna munhu ungaita mushando mukuru ngezina rangu, ungakona paripo kuereketa zvakashata ndini.

⁴⁰ Ngokuti uwo usikarwi nesu unotirwira isusu.

⁴¹ Kunyazwi ndiani unozomupa tsani yemvura yokumwa, ngepamusoro pokuti muri vaKristu, ngegwinyiso ndinoti kwomuri aazorashikirwi ngomusharo wake.

Chishaishi choKupaukisa Umwe weVadoko Chikuru

⁴² “Kunyazwi ndiani unozoita kuti umwe weava vadoko vanonditenda ashaishe, kunopinda kunaka kwaari kuti guyo guru risungirwe muhuro mwake aposherwe muruandhle.

⁴³ Kudai nyara yako yechikupumhunisa, igure, ngokuti kwakapinda kunaka kwouri kuti upotere mukupona uri chirema, kunekuti unenyara mbiri upotere muGehena, mumuriro usikadzimi, [

⁴⁴ apo peisikafi honye yavo, nepasikadzimi muriro.]

⁴⁵ Kudai tsoka yako yechikupumhunisa, igure; ngokuti kwakapinda kunaka kwouri kuti upotere mukupona wechikumhina kunekuti unetsoka mbiri ukandirwe muGehena, [

⁴⁶ apo peisikafi honye yavo, pasikadzimi muriro.]

⁴⁷ Kudai dziso rako rechikupumhunisa, ribvite; ngokuti kwakapinda kunaka kwouri kuti upotere muumambo hwaMwari unedziso rimwe, kunekuti unemadziso mairi ukandirwe muGehena,

⁴⁸ apo peisikafi honye yavo, pasikadzimi muriro.

⁴⁹ Ngokuti munhu weshe unozorungwa ngomuriro.

⁵⁰ Munyu wakanaka; asi kuti munyu warasha kunaka kwawo, unozorungwa ngenyi? Garai munemunyu mukati mwenyu, mugarisane zvakanaka umwe noumweni.”