Marku 8 - Bhaibheri Rakachena muChindau

Jesu Unopa Zvokudya Vanhu Makumi Marongomuna eMazana

¹ Ngemazuva awo kwaiyapozve mbungano huru, yaiya isina chokudya; iye wakadaidza vadzidzi akati kwavari,

² “Ndinosvipa mwoyo ngendaa yembungano, ngokuti yakagara neni zvinopano mazuva matatu, isina chokudya.

³ Kuti ndikavaendesa kumakanyi kwavo vasati vadya, vanozofukama munjira, nevamweni vavo vanobva kuretu.”

⁴ Nevadzidzi vake vakamupingura vakati, “Munhu ungazviona pari zvingwa kuti agutse ava vanhu muno mushango?”

⁵ Naye wakavabvunza akati, “Munezvingwa zvinganai?” Vakati, “Zvinomwe.”

⁶ Wakapanga mbungano kuti igare pashi; akatora zvingwa zvinomwe, akabonga, akazvigura akazvipa kuvadzidzi vake kuti vazviise pamberi pevanhu, navo vakazvipa kumbungano.

⁷ Navo vaiya nehove doko shomani; abonga wakapanga kuti dziiswewo pamberi pavo.

⁸ Navo vakadya, vakaguta; navo vakatonhera matsekeneswa ezvakasara akaita zvitundu zvinomwe.

⁹ Vaiya vaida kukwana makumi marongomuna emazana. Naye wakavaendesa.

¹⁰ Paripo wakapotera mungarava nevadzidzi vake, wakaenda kunharaunda yeDharamanuta.

VaFarisi Vanokumbira Chioniso

¹¹ VaFarisi vakauya kunaJesu, vakatanga kuphikisana naye, vechitsvaka kwaari chioniso chinobva mudenga, vechimuedza.

¹² Naye wakaita mahwema makuru mumweya wake, akati, “Uyu mubarirwana unotsvaka ngenyi chioniso? Ngegwinyiso ndinoti kwomuri, mubarirwana uyu auzopuwi chioniso.”

¹³ Wakavasiya, akapoterazve mungarava, akaambuka ruseri.

Mumera wevaFarisi newaHerodhi

¹⁴ Vadzidzi vaiya variarwa kutora zvingwa, vaiya nechingwa chimwe chega mungarava.

¹⁵ Naye wakavapanga echiti, “Penyai, ngwarai mumera wevaFarisi nomumera waHerodhi.”

¹⁶ Vakapangana pakati pavo vechiti, “Ngokuti atina zvingwa.”

¹⁷ Jesu echizia wakati kwavari, “Munopangana ngenyi, ngokuti amuna zvingwa? Amusati mwazia nokuti kuzwisisa here? Mwoyo yenyu ichakandokonza here?

¹⁸ Munemadziso musikaoni here, munenzee musikazwi here? Amucherechedzi here?

¹⁹ Naapo zvendakagurira vanhu makumi emazana mashanu zvingwa zvishanu, mwakazadza zvitundu zvinganai ngematsekeneswa?” Vakati kwaari, “Gumi nezviiri.”

²⁰ “Naapo zvingwa zvinomwe zvakagurirwa kuvanhu makumi emazana marongomuna, mwakazadza zvitundu zvinganai ngematsekeneswa?” Vakati kwaari, “Zvinomwe.”

²¹ Naye wakati kwavari, “Amusati mwazwisisa here?”

Jesu Unopembenudza Bofu muBhethisaidha

²² Vakaguma muBhethisaidha. Vakaunza kwaari bofu, navo vakamupota kuti aribate.

²³ Naye wakaribata ngenyara, akaribudisa kubanze kwedhorobha; naapo apfira mata mumadziso aro, wakaisa nyara dzake padera paro, akaribvunza kuti, “Unoona chiro here?”

²⁴ Naro rakaringira rikati, “Ndinoona vanhu, asi ndinovaona vechihamba vakadai ngemiti.”

²⁵ Wakaisazve nyara dzake padera pemadziso aro; naro rakaringisisa, rakapembenudzwa, rikaona zviro zveshe pamhene.

²⁶ Wakariendesa kanyi kwaro echiti, “Usapoterazve mumizi.”

Petro Unopupura kuti Jesu ndiye Kristu

²⁷ Jesu nevadzidzi vake vakaenda vakapotera mumizi yeSizaria Firipi; vachimunjira wakabvunza vadzidzi vake echiti kwavari, “Vanhu vanoti, inini ndirianani?”

²⁸ Navo vakamuronzera vechiti, “Johani Mubhabhatidzi, nevamweni vanoti, Erija, nevamweni vanoti, Uri umwe wevaprofeti.”

²⁹ Naye wakavabvunza, “Imwimwi munoti ndirianani?” Petro wakapingura akati kwaari, “Iwewe uri Kristu.”

³⁰ Naye wakavapangisisa kuti vasaronzera munhu ndiye.

Jesu Unoereketa ngoKutambudzwa, Kufa noKumuka kwake

³¹ Wakatanga kuvadzidzisa echiti, “Kunosisira kuti Mukororo woMunhu atambudzike ngezvakawanda nokurambwa ngevakuru nevapristi vakuru nevanyori, aurawe, ngesure kwemazuva matatu amukezve.”

³² Wakaereketa izwi iri pamhene, Petro wakamutora, akatanga kumurambidza.

³³ Asi iye echikunukuka, echiona vadzidzi vake, wakakaraidza Petro akati, “Ibva uende sure kwangu, Sathani. Ngokuti aunyeri ngezvaMwari, asi ngeizvo zvevanhu.”

³⁴ Naapo adaidzira kwaari mbungano pamwepo nevadzidzi vake, wakati kwavari, “Kunyazwi ndiani unoda kuuya sure kwangu, ngaadzirambe atore muchinjiko wake, anditeere.

³⁵ Ngokuti kunyazwi ndiani unoda kuponesa ndaramo yake unozorashikirwa ndiyo, nouwo unozorashikirwa ngendaramo yake ngendaa yangu neyevhangeri, unozoiponesa.

³⁶ Ngokuti munhu unozouyirwa ngenyi, kudai echiuyirwa ngenyika yeshe, arashe ndaramo yake?

³⁷ Ngokuti munhu ungaita mutenganiso wenyi nendaramo yake?

³⁸ Ngokuti kunyazwi ndiani unozotsveruka ndini nemazwi angu kuneuyu mubarirwana unoomba nounoshaisha, Mukororo woMunhu unozotsverukawo ndiye apo oozouya muuthende hwaBaba ake, pamwepo nengirosi dzake dzakachena.”