Marku 7 - Bhaibheri Rakachena muChindau

Dzidziso yeMadzibabamukuru

¹ VaFarisi nevamweni vevanyori vakabva Jerusarema vakaungana kwaari.

² Vakaona kuti vamweni vevadzidzi vake vaidya chingwa ngenyara dzine tsvina, ukwo kunoti dzisikazi kushambwa.

³ (Ngokuti vaFarisi nevaJudha veshe avadyi vasikazi kunasa kushamba kakurutu nyara dzavo, vechibatirira mitoo yemadzibabamukuru;

⁴ naapo vabva kumusika, avadyi vasikazikushamba; neimweni mitoo mizhinji iripo yevakaashira kuingwarira, kudai ngokusuka tsani nehari nendiro dzethusi.)

⁵ VaFarisi nevanyori vakamubvunza vechiti, “Vadzidzi vako avateeri ngenyi mitoo yemadzibabamukuru, asi vanodya chingwa ngenyara dzine tsvina?”

⁶ Wakati kwavari, “Isaya wakanasa kuprofeta ndimwi, imwimwi vadziitisi, kudai ngezvezvakanyorwa kuti, “ ‘Ava vanhu vanondiremeredza ngemiromo yavo, asi mwoyo yavo iri kuretu neni;

⁷ asi vanotera kundidira, vechidzidzisa tsika dzevanhu kudai ngezvidzidzo kwazvo.’

⁸ “Munorekera mipango yaMwari, mwechibatirira mitoo yevanhu.”

⁹ Wakati kwavari, “Munoramba yaamho mipango yaMwari, kuti mubatirire tsika dzenyu!

¹⁰ Ngokuti Mosi wakati, ‘Remeredza baba ako namai ako,’ zve, ‘Naye unotuka baba kunyazwi mai ngegwinyiso ngaafe mukufa.’

¹¹ Asi imwimwi munoti, ‘Kudai munhu echiti kunababa ake nokuti kunamai ake, icho chewaida kuuyirwa ndicho kwendiri chiri Korbhani,’ (ukwo kunoti, ‘Chakapirwa kunaMwari.’)

¹² Ngokudaro amuchamutenderi kuti aitire chiro kunababa nokuti mai.

¹³ Ngokudaro munoita kuti izwi raMwari riite risina shwiro ngendaa yemitoo yenyu yemwakaashidzana. Nezvimweni zvizhinji zvakadaro zvomunoita.”

Zviro Zvinosvipisa Munhu

¹⁴ Wakadaidzazve mbungano kwaari akati kweiri, “Ndizwenyi, imwimwi mweshe, muzwisise;

¹⁵ apana chiro chinobva ngokubanze kwomunhu chechipotera mukati mwake chingamusvipisa, asi izvo zviro zvinobva mukati mwomunhu ndizvo zvinomusvipisa.” [

¹⁶ “Iye unenzee dzokuzwa ngaazwe.”]

¹⁷ Apo apotera mumhatso, abva kunembungano, vadzidzi vake vakamubvunza ngomuedzaniso uyu.

¹⁸ Naye wakati kwavari, “Nemwiwo amuna kuzwisisa here? Amuoni here kuti kunyazwi chiinyi chinobva ngokubanze chechipotera mumunhu achingakoni kumusvipisa,

¹⁹ ngokuti achipoteri mumwoyo mwake, asi mundani mwake, chechibudiswa mushango?” (Ngokudaro kunocheneswa kudya kweshe.)

²⁰ Wakati, “Icho chinobuda kubva kumunhu ndicho chinomusvipisa.

²¹ Ngokuti mukati mumwoyo yevanhu kunobuda mikarakadzo yakashata, kuhura, kuba, kuuraya,

²² kuomba, mbau, matsambo, kuchengedzera, kuemura, kutuka, kudzikudza, upenzi.

²³ Zveshe izvi zviro zvakashata zvinobuda kubva ngomukati, ndizvo zvinosvipisa munhu.”

Jesu Unoponesa Mwanasikana woMudzimai weMadzinza

²⁴ Wakamiruka kubvapo, akaenda kumigano yeThire neSidhoni. Wakapotera mumhatso, asaida kuti aziikanwe ngomunhu; asi aazi kukona kuti afishike.

²⁵ Paripo dzimai raiya nemwanasikana waro mudoko waiya nomweya wakashata, razwa ndiye, rakaguma rikawira patsoka dzake.

²⁶ Asi dzimai iro raiya muGiriki, ngokubarwa raiya muSurofoenikia. Naro rakamupota kuti aduse dhimoni kubva kumwanasikana waro.

²⁷ Iye wakati kweriri, “Vana ngavagutiswe kutanga, ngokuti akuzi kunaka kutora chingwa chevana kuchikandira kumatuhwa embwa.”

²⁸ Asi rakapingura, rikati kwaari, “Eya, Mambo; matuhwa embwa anodya pashi petafura matsekeneswa evana.”

²⁹ Wakati kweriri, “Ngendaa yeizwi iri, enda; dhimoni rabuda kubva kumwanasikana wako.”

³⁰ Rakaenda kumhatso yaro, rakaona mwana akaradzikwa pamubhedhu, nedhimoni raiya rabuda kubva kwaari.

Jesu Unoponesa Dziiranzee Raiyazve Mbeveve

³¹ Jesu wakabudazve kubva kumigano yeThire, wakahamba ngepakati peSidhoni metsa kuguma kuruandhle rweGarire, kupotya pakati pemiganu yeDhekaporisi.

³² Vakaunza kwaari umwe waiya dziiranzee raiya mbeveve, navo vakamupota kuti aise nyara yake padera paro.

³³ Wakaritora riri rega kubva pakati pembungano, wakaisa zvinwe zvake munzee dzaro, wakapfira mata, akagwama rurumi rwaro.

³⁴ Echiringira mudenga, wakaita mahwema, akati kweriri, “Efata,” ukwo kunoti, “Beuka.”

³⁵ Apapo nenzee dzaro dzakabeurwa, nemusungo worurumi rwaro wakasunhuka, naro rakaereketa zvinozwika.

³⁶ Iye wakavapanga kuti vasazoronzera munhu; asi echinyanya kuvapanga, vakanyanyisawo kuzviteketesa.

³⁷ Navo vakashamiswa kunopinda binzo vechiti, “Iye wakaita zveshe kuti zvinake; unoita kuti nedziiranzee rizwe nechimbungumbungu kuti chierekete.”