Marku 6 - Bhaibheri Rakachena muChindau

Jesu Unorambwa muNazaretha

¹ Wakabuda kubvapo, akaguma munyika yekwake, nevadzidzi vake vakamuteera.

² Naapo Sabatha raguma wakatanga kudzidzisa mumhatso yokudira, nevazhinji vechimuzwa vakashamiswa. Vakati, “Munhu uyu wakazviona pari zveshe izvi? Kungwaranyi kwakapuwa kuneuyu munhu? Mishamiso yakakura yakadai inoitwa ngenyara dzake!

³ Uyu andiyepi here mutsetsi, mukororo waMaria, mukoma waJakobe, Josesi, Judha naSimoni? Nevakunda vake avari pano nesu here?” Navo vakapumhunwa ndiye.

⁴ Jesu wakati kwavari, “Muprofeti aarekerwi kuremeredzwa, asi kwega munyika yake nokuhama dzake nomumhatso yake.”

⁵ Naye aazi kukona kuitapo mishando ine simba, asi wakaisa nyara dzake padera pevanhu vashomani vairwara, akavaponesa.

⁶ Wakashamiswa ngokusikatenda kwavo. Naye wakahamba pakati pemaguta avo echidzidzisa.

Jesu Unotuma Vadzidzi Vake Gumi naVairi

⁷ Wakadaidza kwaari vane gumi nevairi, akatanga kuvatuma vairi vairi, naye wakavapa simba rokukurira mweya yakashata.

⁸ Akavapanga kuti vasazotora chiro parwendo rwavo, asi mudondoro wega; vasatora chingwa nokuti nyede nokuti mare muzvikwama zvavo;

⁹ asi kuti vapfeke magwada, vasazopfekazve mabhachi mairi.

¹⁰ Wakati kwavari, “Kunyazwi ngepari pomunopotera mumhatso, garaipo metsa mubvepo.

¹¹ Kunyazwi ngeiri ndau yomusikazoashirwi nokuti kupurutanwa, mwoobvapo zuwai bukuta pashi petsoka dzenyu kuti riite chapupu kwavari.”

¹² Vakabuda, vakachumaira kuti vanhu vatenderuke.

¹³ Vakadusa madhimoni mazhinji, vakadzodza mafuta vazhinji vairwara, vakavaponesa.

Kufa kwaJohani Mubhabhatidzi

¹⁴ Mambo Herodhi wakazvizwa, ngokuti zina raJesu raiya rateketeswa. Vaiti, “Johani Mubhabhatidzi wamuka kwevakafa, ndizvo mishando iyi ine simba inoshandwa ndiye.”

¹⁵ Asi vamweni vakati, “NdiErija.” Nevamweni vakati, “Muprofeti wakadai ngoumwe wevaprofeti vekaretu.”

¹⁶ Asi Herodhi azwa wakati, “NdiJohani, uwo wendakagura soro inini, wamukazve.”

¹⁷ Ngokuti uyu Herodhi waiya akatuma kumubata Johani nokumusunga mutirongo, ngepamusoro paHerodhiasi mukadzi waFiripu munun'una wake, ngokuti iye waiya amutora.

¹⁸ Ngokuti Johani waiya akati kunaHerodhi, “Akutenderwi kwouri kuti utore mukadzi womunun'una wako.”

¹⁹ NaHerodhiasi waiya akamuzonda, akadisisa kumuuraya, asi wakakorera.

²⁰ Herodhi waimutya Johani, echizia kuti waiya munhu wakarurama, wakacheneswa, wakamungwarira. Apo amuzwa, wakatambudzika kakurutu, asi wakamuzwa ngokudakara.

²¹ Asi raguma zuva rakanaka, apo Herodhi ngezuva rokubarwa kwake wakaitira dhiri nhunge dzake nenduna dzake nevakuru veGarire.

²² Mwanasikana waHerodhiasi wakapotera akazvina, akamudakadza yaamho Herodhi naavo vaitseama naye pakudya; namambo wakati kunemusikana, “Kumbira kwendiri kunyazwi chiinyi chounoda, neni ndinozokupa.”

²³ Naye wakapika kwaari kuti, “Kunyazwi chiinyi chounozokumbira kwendiri ndinozochipa kwouri, kunyazwi rupande rwoumambo hwangu.”

²⁴ Wakabuda, akati kunamai ake, “Ndokumbirenyi?” Naye wakati, “Soro raJohani Mubhabhatidzi.”

²⁵ Paripo wakapotera kunamambo ngokukasira, akarikumbira akati, “Ndinoda kuti mundipe zvinopano mundiro soro raJohani Mubhabhatidzi.”

²⁶ Namambo wakasvipa mwoyo kakurutu; asi ngendaa yemhiko dzake nendaa yeavo vaitseama naye pakudya, aazi kuda kumurambira.

²⁷ Paripo mambo wakatuma umwe wevarindi vake, akapanga kuti riunzwe soro raJohani. Naye wakaenda akagura soro rake ari mutirongo,

²⁸ wakaunza soro rake riri mundiro, akapa musikana, nomusikana wakaripa kunamai ake.

²⁹ Naapo vazwa vadzidzi vake vakauya, vakatora muiri wake, vakauisa muiba.

Jesu Unopa Kudya Vanhu Mazana Makumi Mashanu

³⁰ Navapostori vakaungana kunaJesu, vakashuma kwaari zveshe zvevakaita nezvevaiya vadzidzisa.

³¹ Naye wakati kwavari, “Uyai imwimwi muri mwega pandau iri yega, mumbozorora padoko.” Ngokuti vazhinji vaiuya nokuenda, navo vaiya vasina nenguva yokudya.

³² Navo vakaenda ngengarava kundau iri yega vari vega.

³³ Nevanhu vazhinji vakavaona vechienda, vakavazia, vakarumba ngetsoka vechibva kumadhorobha eshe, navo vakavatangira kuguma.

³⁴ Abuda wakaona mbungano huru, wakakurudzwa ngepamusoro payo, ngokuti yaiya yakadai ngemakwai asina muushi; naye wakatanga kuidzidzisa zviro zvizhinji.

³⁵ Naapo zuva rooda kubira, vadzidzi vake vakauya kwaari vechiti, “Panapa indau iri yega nezuva rotoda kubira.

³⁶ Vaendese munharaunda nomumizi, vadzitengere zvokudya.”

³⁷ Asi iye wakavapingura akati kwavari, “Vapei imwimwi vadye.” Navo vakati kwaari, “Tinozoenda here isusu tivatengere zvingwa zvezvigurwa zvesirivha mazana mairi, tivape kuti vadye?”

³⁸ Asi iye wakati kwavari, “Munezvingwa zvinganai? Endai muone.” Naapo vazvizia vakati, “Zvishanu nehove mbiri.”

³⁹ Wakavapanga kuti veshe vagare pashi ngezvikwata zvikwata padera pemwenje muishi.

⁴⁰ Navo vakagara pashi ngezvikwata zvemazana nezvemakumi mashanu.

⁴¹ Echitora zvingwa zvishanu nehove mbiri, wakaringira mudenga, akazvibonga. Wakagura zvingwa, akazvipa kuvadzidzi kuti vaise pamberi pavo; nehove mbiri akadzikoanisira veshe.

⁴² Navo veshe vakadya, vakaguta.

⁴³ Vakatonhera matsekeneswa akazara zvitundu gumi nazviiri ezvingwa nehove.

⁴⁴ Avo vakadya zvingwa vaiya vamuna makumi emazana mashanu.

Jesu Unohamba padera poRuandhle

⁴⁵ Paripo wakaangiridza vadzidzi vake kuti vapotere mungarava nokutungamira kuenda ruseri rweBhethisaidha, iye emene echiendesa mbungano.

⁴⁶ Naapo avavhaisa wakaenda pamutunhu kookumbira.

⁴⁷ Kwoita madeekoni, ngarava yaiya pakati poruandhle, naye waiya ega panyika.

⁴⁸ Echivaona vechitambudzika ngokuhluza ngarava, ngokuti dutu raiya rechipesana navo, kwaa kuda kuita murindo wechina wousiku, iye wakaguma kwavari echihamba padera poruandhle. Waida kuvapinda,

⁴⁹ asi apo vechimuona echihamba ngepadera poruandhle, vakakarakadza kuti raiya dzimudzangara, navo vakaboorera;

⁵⁰ ngokuti vakamuona veshe, vakatyiswa. Asi paripo iye wakaereketa kwavari echiti, “Shingai, ndini, musatya.”

⁵¹ Naye wakakwira kwavari mungarava nedutu rakaterama. Navo vakashamiswa kakurutu mukati mwavo,

⁵² ngokuti avazi kuzwisisa ngendaa yezvingwa, ngokuti mwoyo yavo yaiya yakakonziswa.

Jesu Unoponesa Vanhu Vairwara veGenesareta

⁵³ Apo vaambuka ruseri vakaguma kunyika yeGenesareta, navo vakasungira ngarava pahumbikumbi.

⁵⁴ Naapo vabuda kubva mungarava, paripo vanhu veyo vakamuzia,

⁵⁵ navo vakarumba nharaunda yeshe, vakatanga kutwara ngemisengere avo vairwara, kuvaisa apo pevakazwa kuti ndipo paari.

⁵⁶ Kunyazwi ngepari paakapotera mumizi nokuti mumadhorobha nokuti munyika, vakavaradzika vairwara pamusika, vakamupota kuti vabate kunyazwi mupendero wegauni rake; naavo veshe vakamubata vakaponeswa.