Marku 5 - Bhaibheri Rakachena muChindau

Jesu Unodzinga Mweya Unetsvina

¹ Vakaguma ruseri rworuandhle, munyika yeGerasa.

² Apo echibuda kubva mungarava, paripo munhu unemweya wakashata wakashongana naye, echibva mumaiba.

³ Uwo waigara mumaiba; kwaiya kusina munhu waikona kuchamusunga, kunyazwi ngemaketani;

⁴ ngokuti kazhinji waisungwa ngemanguri nemaketani, asi waidambura maketani nokugura manguri. Kwaiya kusina munhu waikona kumunyisa.

⁵ Nguva dzeshe masikati nousiku waigara mumaiba nomumitunhu echiiboorera, echidzicheka ngemapuwe.

⁶ Naye aona Jesu achikuretu, wakarumba kwaari akamugwadamira;

⁷ naye echiboorera ngeizwi guru wakati, “Ndinenyi newe, Jesu, Mukororo waMwari Uripadera pazveshe? Ndinokuphikisa ndiMwari, kuti usanditambudza.”

⁸ Ngokuti iye waiya ati kwaari, “Buda kubva kumunhuwo, iwewe mweya wakashata.”

⁹ Jesu wakamubvunza kuti, “Zina rako ndiani?” Nawo wakapingura ukati kwaari, “Ndini Hondo zina rangu, ngokuti tiri vazhinji.”

¹⁰ Nawo wakamupota kakurutu kuti asazoiendesa kubva kuneiyo nyika.

¹¹ Zvinopano kwaiyapo pamutunhu mutanga mukuru wenguruve dzechifura;

¹² nayo yakamupota yechiti, “Titumirei munguruve; kuti tipotere kwedziri.”

¹³ Naye wakaitendera. Nomweya yakashata yakabuda ikapotera munguruve, nomutanga weshe wakarumba kudzaka ngepamakaha, kupotera muruandhle, dzaida kuguma makumi emazana mairi, nadzo dzakanzvaira muruandhle.

¹⁴ Vaushi vadzo vakatiza, vakazvironzera mudhorobha nomunharaunda. Nevanhu vakauya koona kuti chiinyi chakaitika.

¹⁵ Vakauya kunaJesu, vakaona uwo waiya nemadhimoni akagara, asimira, aamunhu kwaye, iye uwo waiya nehondo, navo vakatya.

¹⁶ Naapo vakazviona, vakatsanangura izvo zvakaitika kwaari uwo waiya nemadhimoni nendaa yenguruve.

¹⁷ Vakatanga kumupota kuti abve mumigano yavo.

¹⁸ Naapo achapinda mungarava, uwo waiya nemadhimoni wakamupota kuti aende naye.

¹⁹ Asi aazi kumutendera, wakati kwaari, “Enda kanyi kwako kuhama dzako, uvaronzere kukura kwezvaakakuitira Mambo, nenjira yaakakuitira nyasha ndiyo.”

²⁰ Naye wakaenda, akatanga kuchumaira muDhekaporisi ngokukura kwezvaakaitirwa ndiJesu; veshe vakashamiswa.

Jesu Unoponesa Mwanasikana waJairosi neDzimai Raibuda Ngazi

²¹ Naapo Jesu aambukazve ruseri ngengarava, mbungano huru yakaungana kwaari, naye waiya pasinde poruandhle.

²² Naapo pakauya umwe wevatongi vemhatso yokudira zina rake raizwi Jairosi, amuona, wakadzikandira patsoka dzake,

²³ akamupota kakurutu echiti, “Mwanasikana wangu mudoko waapasinde pokufa. Ndinokupota kuti uuye, uise nyara dzako padera pake, kuti aponeswe ararame.”

²⁴ Iye wakaenda naye. Nembungano huru yakamuteera, nayo yakamutsikirira.

²⁵ Nedzimai raibuda ngazi makore gumi namairi,

²⁶ rakatambudzika ngenjira dzakawanda ngen'anga zhinji, naro rakapedza zveshe zveraiya nazvo, naro arizi kudetserwa ngechiro, asi rakaangira yaamho kurwara.

²⁷ Iro rechizwa ngendaa yaJesu, rakaguma pakati pembungano ngesure kwake naro rakabata gauni rake.

²⁸ Ngokuti rakati, “Kudai ndikabata kunyazwi gauni rake ndinozoponeswa.”

²⁹ Paripo ngazi yaro yakaema kubuda; naro rakazwa mumuiri mwaro kuti raponeswa nhenda yaro.

³⁰ Paripo Jesu, echizia mukati mwake kuti simba raiya rabuda kubva kwaari, wakakunukukira pakati pembungano, akati, “Ndiani wabata gauni rangu?”

³¹ Vadzidzi vake vakati kwaari, “Unoona kuti mbungano inokutsikirira, newe unoti, ‘Ndiani wandibata?’ ”

³² Naye wakaringaringa kuti aone uwo waiya aita ichi.

³³ Asi dzimai rechitya nokuhuta, rechizia icho chaiya chaitika kweriri, rakauya, rikawa pashi pamberi pake, naro rakamuronzera gwinyiso reshe.

³⁴ Wakati kweriri, “Mukunda, kutenda kwako kwakuponesa, enda ngokunyarara, uponeswe nhenda yako.”

³⁵ Achaereketa, vakaguma vaibva kumhatso yomutongi vechiti, “Mwanasikana wako watofa. Uchamuneserenyi Mudzidzisi?”

³⁶ Asi asikavapurutani Jesu azwa izwi iro rakaereketwa, wakati kune mutongi wemhatso yokudira, “Usatya, gonda kwega.”

³⁷ Naye aazi kutendera munhu naumwe kuti amuteere kwega Petro, Jakobe naJohani, munun'una waJakobe.

³⁸ Naapo aguma mumhatso yomutongi wemhatso yokudira, wakaona nyongano, nevaichema nokubonda kakurutu.

³⁹ Apotera, wakati kwavari, “Munoita nyongano nokuchema ngenyi? Mwana aazi kufa akadi, asi wakaata.”

⁴⁰ Navo vakamusheka. Asi iye wakavabudisa veshe kubanze, wakatora baba vemwana namai, naavo vaiya naye, akapotera pandau paiya nemwana.

⁴¹ Echibata nyara yemwana wakati kwaari, “Tarita Kumi,” ukwo kunoti, “Chisikana, ndinoti kwouri, Muka.”

⁴² Paripo chisikana chakamuka, chakahamba; ngokuti chaiya chaane makore gumi namairi. Paripo vakashamiswa kakurutu.

⁴³ Naye wakavapangisisa kuti zvisazoziikanwa ngomunhu naumwe. Naye wakavaronzera kuti vachipe zvokudya.