Marku 4 - Bhaibheri Rakachena muChindau

Muedzaniso woMukushi

¹ Wakatanga kudzidzisazve ari pahumbikumbi yoruandhle. Nembungano hurutu yaamho yakaungana kwaari, ngokudaro wakapotera mungarava, akagara muruandhle; mbungano yeshe yaiya pahumbikumbi pasinde poruandhle.

² Wakavadzidzisa zvakawanda ngemiedzaniso, mukudzidzisa kwake wakati kwavari,

³ “Purutanai! Mukushi wakabuda kookusha.

⁴ Kwakaitika mukukusha kwake, kuti dzimweni mbeu dzakawa panjira, neshiri dzakauya dzakadzidya.

⁵ Nedzimweni dzakawa pandau inetsanza, apo paiya pasina mavhu akawanda, paripo dzakamera, ngokuti paiya pasina mavhu akadzama.

⁶ Kwakati zuva rabuda, dzakatsva ngokuti dzaiya dzisina nzinde, dzakaputa.

⁷ Nedzimweni dzakawa pakati peminzwa, neminzwa yakakura, yakadzidzipa, nadzo adzizi kubereka michero.

⁸ Nedzimweni dzakawa pamavhu akanaka, dzakabereka michero dzechikura, dzechiwanda, dzakabereka dzimweni makumi matatu, dzimweni makumi matanhatu, dzimweni zana.”

⁹ Naye wakati, “Iye unenzee dzokuzwa ngaazwe.”

Donzo roKudzidzisa ngeMiedzaniso

¹⁰ Naapo ari ega, avo vaiya naye nevanegumi navairi vakamubvunza ngendaa yemiedzaniso.

¹¹ Wakati kwavari, “Kwakapuwa kwomuri kuzwisisa zvakafishika zvoumambo hwaMwari, asi kwavari avo vari kubanze zveshe zvinoitwa ngemiedzaniso,

¹² kuti vechiona vangaona vasikaonesesi, vechizwa vangazwa vasikazwisisi, kuti pamweni vangatenderuka, nokushaisha kurekererwe kwavari.”

Khumucho yoMuedzaniso woMukushi

¹³ Wakati kwavari, “Amuzii uyu muedzaniso here? Munozoita maziirenyi miedzaniso yeshe?

¹⁴ Mukushi unokusha izwi.

¹⁵ Ava ndivo vakawa munjira, apo panokushwa izwi; naapo vazwa, paripo unouya Sathani nokudusa izwi iro rakushwa mukati mwavo.

¹⁶ Ava ngokudaro ndivo vakakushwa mutsanza, apo vazwa izwi, paripo vanoriashira ngokudakara,

¹⁷ navo avana nzinde mukati mwavo, asi vanoangirira kwenguva doko; asi apo kwaguma kutambudzwa nokuti kushononeswa ngendaa yeizwi, paripo vanopumhunwa.

¹⁸ Naavo vakakushwa pakati peminzwa, ndivo vanozwa izwi,

¹⁹ nokudembatemba kuri munyika, nokuchengedzerwa ngoupfumi, nokuemura kwezviro zvinhani, zvechipotera zvinodzipa izwi, naro aribereki michero.

²⁰ Naavo vakakushwa pamavhu akanaka ndivo vanorizwa izwi, vanoriashira, vanobereka michero, vamweni makumi matatu, vamweni makumi matanhatu nevamweni zana.”

Muedzaniso weChibani

²¹ Naye wakati kwavari, “Chibani chinounzwa here kuti chiiswe pashi pechitundu nokuti pashi pomubhedhi, chisikaiswi pachigadzikiro pacho?

²² Ngokuti apana chiro chakafishika, chisikazooneswi pamhene; apanazve chiro chakahwara, chisikazobudiswi pakujeka.

²³ Uwo unenzee dzokuzwa ngaazwe.”

²⁴ Naye wakati kwavari, “Ngwarai izvo zvomunozwa; chipimo chomunopima ndicho vamweni nemwi muchapimwawo ndicho, nakwo kunozotutsirwa kwomuri kwakapinda kukura.

²⁵ Ngokuti kwaari unacho, kunozopuwa kwaari, nokwaari usina, nechaatori nacho chinozobviswa kwaari.”

Muedzaniso weMbeu Inokura

²⁶ Naye wakati, “Umambo hwaMwari hwakadai ngomunhu unokusha mbeu mumavhu,

²⁷ naye unoata nokumuka usiku namasikati, nembeu dzinomera, dzechikura iye asikazii njira yedzinomera ndiyo.

²⁸ Mavhu anoita ngekwawo, kuti mbeu dzikure kutanga muningwi, kwoteera mutsonzoti, zvino zviyo zvaibva pamutsonzoti.

²⁹ Naapo zviyo zvaibva paripo unotuma vane sikeyo, ngokuti kukukura kwaguma.”

Muedzaniso weTsangu yoMustadhi

³⁰ Wakati, “Tinozouedzanisa nenyi umambo hwaMwari? Nokuti ngouri muedzaniso wetingauendzanisa ndiwo?

³¹ Hwakadai ngetsangu yomustadhi iyo apo yakushwa mumavhu iri doko kunadzo dzeshe mbeu dzakasimwa munyika;

³² asi apo yakushwa inomera yechiita huru kupinda mapfiba eshe, inobudisa matai makuru, ngokudaro shiri dzomudenga dzinoaka zvisaki zvadzo mukati mwemumvuri wematai awo.”

³³ Ngemiedzaniso yakawanda kudaro wakaereketa izwi kwavari, kudai ngezvevaikona kurizwa;

³⁴ azi kuereketa kwavari pasina muedzaniso, asi ari ega nevadzidzi vake wakavadudzira zveshe.

Jesu Unokaraidza Dutu

³⁵ Ngeiro zuva, apo kwaita madeekoni, wakati kwavari, “Ngatiambuke ruseri.”

³⁶ Vechisiya mbungano, vakaenda naye mungarava. Nengarava dzimweni dzaiyapo dzakaendawo naye.

³⁷ Kwakaguma mubvumo mukuru wedutu, nemafungu akachaya kupotera mungarava, ngokudaro aiya ooda kuzadza ngarava.

³⁸ Asi iye waiya ngesure mungarava, akaata akaisa soro rake pamutsamiro; navo vakamumusa, vakati kwaari, “Mudzidzisi, aubatiki tisu here, tofa?”

³⁹ Naye wakamuka akakaraidza dutu, akati kuneruandhle, “Terama kuti chowee.” Nedutu rakaterama, kwaiyapo kunyarara kukurutu.

⁴⁰ Wakati kwavari, “Munotya ngenyi? Amusati mwagonda here?”

⁴¹ Navo vakatya kakurutu, vakati umwe kunoumweni, “Ndizvo uyu ndiani, kuti dutu noruandhle zvinomupurutana?”