Marku 3 - Bhaibheri Rakachena muChindau

Jesu Unoponesa Munhu Une Nyara Yakaputa

¹ Wakapoterazve mumhatso yokudira, kwaiyapo munhu waiya nenyara yakaputa.

² Navo vakamuringisisa, kuona kuti unozomuponesa here ngezuva reSabatha, kuti vamuparise ndaa.

³ Naye wakati kunemunhu uwo waiya nenyara yakaputa, “Uyai pano.”

⁴ Wakati kwavari, “Chiinyi chinotenderwa ngeSabatha, kuita zvakanaka nokuti zvakashata, kuponesa munhu nokuti kuuraya?” Asi vakanyarara.

⁵ Naapo aiya avaringisisa ngoushungu, echisvipa mwoyo ngokukonza kwomwoyo yavo, wakati kumunhuwo, “Tambanudza nyara yako.” Naye wakaitambanudza. Nenyara yake yakaponeswa.

⁶ VaFarisi vakabuda, paripo vakapangana nevekwaHerodhi, kuti vangamuita maurairenyi.

Mbungano Huru Inoungana Pasinde peRuandhle rweGarire

⁷ Jesu wakabvapo nevadzidzi vake, akaenda kuruandhle, nembungano huru yakabva Garire yakamuteera; neyaibvawo Judhia,

⁸ Jerusarema, Idhumia, neyaibva ruseri rweJorodhani, nevanotendenedza Thire neSidhoni, mbungano huru yechizwa ngezviro zvikuru zvaakaita, yakauya kwaari.

⁹ Naye wakaronza kuvadzidzi vake kuti ngarava doko ngaimugarire ngendaa yembungano, kuti isazomutsikirira;

¹⁰ ngokuti waiya akarapa vazhinji, veshe avo vaiya nenhenda vakamutsikirira kuti vamubate.

¹¹ Nomweya inetsvina apo yamuona, yakawa pamberi pake, ikaboorera yechiti, “Iwewe uri Mukororo waMwari.”

¹² Naye wakaikaraidza kakurutu kuti isazoita kuti aziikanwe.

Jesu Unodaidza Vanegumi naVairi

¹³ Wakakwira mumutunhu, akadaidza kwaari avo vaaida, navo vakauya kwaari.

¹⁴ Wakaemesa vanegumi navairi kuti vagare naye nokuvatuma koochumaira

¹⁵ nokuvapa simba rokudzinga madhimoni.

¹⁶ Wakadudza Simoni kuti Petro;

¹⁷ wakadudza Jakobe naJohani munun'una wake vakororo vaZebhedhi kuti Bhoanegesi, kuronza kuti, Vakororo voKutinhira;

¹⁸ Andreu, Firipi, Bhatoromeu, Mateu, Thomasi, Jakobe, mukororo waArifeusi, Thadheusi, Simoni muKhenani

¹⁹ naJudhasi Isikarioti, uwo wakamupira.

Jesu naBheerizebhuri

²⁰ Zvino wakapotera mumhatso; nembungano yakaunganazve, ngokudaro vakakorera nokudya chingwa.

²¹ Naapo hama dzake dzazwa, dzakabuda kuuya koomubata, ngokuti vakati, “Unohahamuka.”

²² Nevanyori avo vakadzaka kubva Jerusarema vakati, “Una Bheerizebhuri, naye ngesimba romuzvare wemadhimoni unodzinga madhimoni.”

²³ Naye wakavadaidza kwaari, akaereketa kwavari ngemiedzaniso akati, “Sathani ungaita marashirenyi Sathani?

²⁴ Kudai umambo hwechidziparadza ngekwawo, uwo umambo ahungakoni kuema.

²⁵ Nokudai mhatso ikadziparadza ngekwayo, iyo mhatso aingakoni kuema.

²⁶ Kudai Sathani echidzimukira, echidziparadza, aangakoni kuema, asi unozogumirwa.

²⁷ Asi apana munhu ungakona kupotera mumhatso youwo unesimba, nokuparadza nhumbi dzake, kuti asikazi kutanga kusunga uwo unesimba; naapo unozoparadza mhatso yake.

²⁸ “Ngegwinyiso ndinoti kwomuri, zvishaishi zveshe nokutuka kweshe kwevanozotuka ndikwo zvinozorekererwa kuvakororo vevanhu.

²⁹ Asi kunyazwi ndiani unozotuka Mweya Wakachena, aazorekererwi, asi unendaa yechishaishi chemhera nariini.”

³⁰ Ngokuti ivo vakati, “Une mweya unetsvina.”

Mai neVanun'una vaJesu

³¹ Kwakauya mai ake nevanun'una vake, vechiema ngokubanze, vakatumira kwaari kumudaidza.

³² Nembungano yaiya yakagara naye, yakati kwaari, “Ringira, mai ako nevanun'una vako vari kubanze vanokutsvaka.”

³³ Naye wakavapingura akati, “Ndiani mai angu nevanun'una vangu?”

³⁴ Echiringira kuneavo vaiya vakagara vakamutendenedza, wakati, “Ringirai mai angu nevanun'una vangu!

³⁵ Kunyazwi ndiani unozoita kuda kwaMwari uwo ndiye munun'una wangu, mukunda namai.”