Marku 2 - Bhaibheri Rakachena muChindau

Jesu Unoponesa Munhu waiya neRupande rwoMuiri Rwakaoma

¹ Naapo aiya apoterazve muKhapernaume ngesure kwemazuva akatikuti, kwakashumwa kuti uri mumhatso.

² Vazhinji vakaungana pamwepo, ngokudaro pakatamika nendau kunyazwi nepamusiwo; naye wakachumaira izwi kwevari.

³ Navo vakaguma kwaari, vakaunza kwaari munhu wakaoma muiri, akatwarwa ngevarongomuna.

⁴ Vechikorera kukwedzera kwaari ngendaa yembungano, vakabweshura denga ngepaaiyapo; naapo vabeura, vakadzasa musengere apo paiata uwo wairwara ngokuoma muiri.

⁵ Jesu echiona kutenda kwavo, wakati kuneuwo wakaoma muiri, “Mukororo, zvishaishi zvako zvarekererwa.”

⁶ Asi vaiyapo vanyori vamweni vakagara, vechidzibvunza mumwoyo yavo vechiti,

⁷ “Uyu unoereketa kudai ngenyi? Unotuka Mwari! Ndiani unokona kurekerera munhu zvishaishi asi Mwari ega?”

⁸ Paripo Jesu, echizia mumweya wake kuti vaidzibvunza zvakadaro mukati mwavo, wakati kwavari, “Munodzibvunza ngenyi ngeizvi mumwoyo yenyu?

⁹ Chiinyi chakapinda kureruka, kuronza kunouwo unorwara ngokuoma muiri kuti, ‘Zvishaishi zvako zvarekererwa,’ nokuti kuronza kuti, ‘Miruka, utore manhi ako, uhambe?’

¹⁰ Asi kuti muzie kuti Mukororo woMunhu unesimba munyika rokurekerera zvishaishi,” wakati kuneuwo unorwara ngokuoma muiri,

¹¹ “Ndinoti kwouri, miruka, utore manhi ako, uende kumhatso yako.”

¹² Naye wakamiruka, paripo akatora manhi ake, akabuda kubanze pamberi pavo veshe; ngokudaro veshe vakashamiswa kakurutu, vakamuirikidza Mwari vechiti, “Atisati taona zvakadai!”

Jesu Unodaidza Revhi

¹³ Naye wakabuda kuendazve kuruandhle; yeshe mbungano yakauya kwaari, naye wakaidzidzisa.

¹⁴ Echipinda wakaona Revhi mukororo waArifeusi akagara panothererwa chibharo naye wakati kwaari, “Nditeere.” Naye wakamiruka, akamuteera.

¹⁵ Kwakaitika kuti apo akagara pakudya mumhatso mwake, vatheresi vazhinji nevashaishi vakagara pashi naJesu nevadzidzi vake; ngokuti vaiya vazhinji vaimuteera.

¹⁶ Vanyori vevaFarisi, vechiona kuti waidya nevashaishi nevatheresi, vakati kunevadzidzi vake, “Ngenyi echidya nevatheresi nevashaishi?”

¹⁷ Naapo Jesu azwa, wakati kwavari, “Avatami n'anga avo vakagwinya, asi avo vanorwara; andizi kuuya kudaidza vanhu vakarurama, asi vashaishi.”

Mubvunzo ngendaa yoKuera Kudya

¹⁸ Vadzidzi vaJohani nevaFarisi vaiya vechiera kudya; navo vakauya vakati kwaari, “Ngenyi vadzidzi vaJohani nevadzidzi vevaFarisi vechiera kudya, asi vadzidzi vako avaeri?”

¹⁹ Jesu wakati kwavari, “Vanaye nyamuroora vanoera here kudya mukwambo achinavo? Mukuwo wevanaye mukwambo, avazokoni kuera kudya.

²⁰ Asi mazuva anozouya, apo mukwambo unozoduswa kubva kwavari, naapo vanozoera kudya ngeiro zuva.

²¹ Apana munhu unotungira chitembwe chitsva padera pejira rakatsakara; kuti zvakadaro, ichi chitsva chakatungirwa apo chinozobaurisa jira rakatsakara, nokubauka kwakapinda kushata kunozoitika.

²² Akuna munhu unoisa vhini idzva munyede dzevhini dzakatsakara; kuti zvakadaro, vhini rinozoputisa nyede, nevhini rinozorashika pamwepo nenyede; asi vhini idzva rinoiswa munyede itsva.”

Jesu Mambo weSabatha

²³ Ngezuva reSabatha rimweni, echihamba ngepakati peminda yekoroni, vadzidzi vake vakatanga kupurura mitsonzoti yekoroni vechihamba.

²⁴ VaFarisi vakati kwaari, “Ringira, vanoita ngenyi ngezuva reSabatha icho chisikatenderwi?”

²⁵ Wakati kwavari, “Amuzi kumbodzidza here icho chaakaita Dhavhidha, apo aitama, afukama, iye naavo vaiya naye;

²⁶ kuti wakapotera mumhatso yaMwari ngemazuva aAbhiathari mupristi mukuru, akadya zvingwa zvikapirwa, izvo zvisikatenderwi kudyiwa, asi ngevapristi vega, akahinazve kwavari avo vaiya naye?”

²⁷ Wakati kwavari, “Sabatha rakaitirwa vanhu, vanhu avazi kuitirwa Sabatha.

²⁸ Ndizvo Mukororo woMunhu ndiMambo weSabatha.”