Marku 15 - Bhaibheri Rakachena muChindau

Jesu Ari Pamberi paPiratu

¹ Mangwanani maishi vapristi vakuru, pamwepo nevakuru vevanhu, vanyori nevatongi veshe vakapangana; vakasunga Jesu, vakamutora, vakamupira kunaPiratu.

² Piratu wakamubvunza echiti, “Iwewe ndiwe mambo wevaJudha here?” Asi iye wakapingura, akati kwaari, “Watoronza.”

³ Nevapristi vakuru vakamuitira ndaa dzakawanda.

⁴ Piratu wakamubvunzazve echiti, “Aupinguri chiro here? Ringira kuwanda kwendaa dzevanokuitira.”

⁵ Asi Jesu aazi kuchazomupingurazve, ndizvo Piratu wakashamiswa.

Jesu Unotongerwa Rufu

⁶ Zvinopano kumushongano wokudya waisivasunhurira mubhanditi umwe uwo wevaizokumbira.

⁷ Pakati pemabhanditi aiya mutirongo paiya naumwe waizwi Bharabhasi, uwo wakasungwa pamwepo naavo vaiya vakamukira, avo mukumukira kwavo vakauraya munhu.

⁸ Nembungano yechikwirayo, yakatanga kukumbira Piratu kuti avaitire kudai ngomutoo wake kwavari.

⁹ Piratu wakapingura kwavari echiti, “Munoda here kuti ndimusunhurire mambo wevaJudha?”

¹⁰ Ngokuti wakazia kuti vapristi vakuru vaiya vamupira ngendaa yendurumwa.

¹¹ Asi vapristi vakuru vakavherudza mbungano kuti zvirinane kuti avasunhurire Bharabhasi.

¹² Piratu wakapingurazve, akati kwavari, “Ndizvo ndinozoitenyi kwaari uwo womunoti ndimambo wevaJudha?”

¹³ Navo vakaboorerazve vechiti, “Mukohomere.”

¹⁴ Piratu wakati kwavari, “Ngenyi? Chiinyi chakashata chaakaita?” Asi vakaboorera kakurutu vechiti, “Mukohomere.”

¹⁵ NaPiratu echida kudakadza mbungano wakavasunhururira Bharabhasi, akavapa Jesu, ambomupamhadza, kuti akohomerwe.

Masoja Anoitira Jee Jesu

¹⁶ Masoja akamukweya kuenda mukati mungome, akakoka pamwepo chikwata cheshe chemasoja.

¹⁷ Nawo akamupfekesa jira rakatsvukuruka, akapomba dzungudza reminzwa, akariisa musoro mwake.

¹⁸ Akatanga kumuchingamidza echiti, “Makosi, mambo wevaJudha!”

¹⁹ Akamurova musoro ngorutsanga, akamupfira mata, akagwadama ngemabvi awo, akamudira.

²⁰ Naapo vamuitira jee, vakamukhumura jira rakatsvukuruka, vakamupfekesa zvokusimira zvake. Navo vakamukweya kuenda naye kubanze koomukohomera.

Jesu Unokohomerwa

²¹ Navo vakaangiridza umwe waipindapo, Simoni weKurene, echibva munharaundayo, baba waArekizanda naRufusi, kuti atware muchinjiko wake.

²² Vakamuunza kundau inozwi Gorogotha, (iyo inozwi ngokukumuchwa, Ndau yeDenhenya.)

²³ Navo vakamupa vhini rakakumanidzwa nemhura; asi iye aazi kuriashira.

²⁴ Vakamukohomera, vakapaurirana zvokufuka zvake pakati pavo, vechiita mabhigidha okuona kuti umwe ngaumwe ungatorenyi.

²⁵ Raiya awa rechitatu revakamukohomera.

²⁶ Nechinyorwa chendaa yake chaiti “MAMBO WEVAJUDHA.”

²⁷ Jesu wakakohomerwa pamwepo nemagandanga mairi, rimwe ngokumudyo nerimweni ngokumuoshwe kwake. [

²⁸ Nezvinyorwa zvakadzadzisika izvo zvinoti, “Wakaerengwa pamwepo nevashaishi.”]

²⁹ Naavo vaipinda ngaapo vakamutuka, vechigudwaira masoro avo vechiti, “Ehee! Iwewe unoparadza Temperi nokuriaka ngamazuva matatu,

³⁰ dziponese, udzake kubva pamuchinjiko!”

³¹ Vakadarowo vapristi vakuru vechimuitire jee pakati pavo, nevanyori vechiti, “Wakaponesa vamweni, aangakoni kudziponesa.

³² Ngaadzake kubva pamuchinjiko Kristu, Mambo wavaIsuraeri, kuti tione, titende.” Naavo vakakohomerwa naye vakamutukawo.

Kufa kwaMambo Jesu

³³ Kubvira ngeawa rechitanhatu kwaiyapo chidima padera penyika yeshe metsa awa rechipfumbamwe.

³⁴ Ngeawa rechipfumbamwe Jesu wakadaidzira ngeizwi guru echiti, “Eloi, Eloi, Lama Sabakathani?” Ukwo kunoti ngokukumuchwa, “Mwari wangu, Mwari wangu, wandisiya ngenyi?”

³⁵ Vamweni veavo vaiemapo vechizwa, vakati, “Izwai, unodaidza Erija.”

³⁶ Umwe wakarumba, akazadza siponji ngevhini rinorungura, wakariisa padera perutsanga, akamupa kuti amwe echiti, “Rekerai, tione kuti Erija unouya here koomudzasa pashi.”

³⁷ Jesu wakadaidzira ngeizwi guru, wakafa.

³⁸ Nejira romuTemperi rakabaurwa ngepakati, kubvira ngedera metsa kuguma pashi.

³⁹ Naapo nduna yezana, iyo yaiema yakaringisana naye, yaona kuti wafa ngokudaro, yakati, “Ngegwinyiso munhu uyu waiya Mukororo waMwari!”

⁴⁰ Vaiyapo madzimai vairingira vari kuretu, pakati pavo kwaiyapo Maria Magadhareni, Maria mai aJakobe mudoko, Josesi naSarome.

⁴¹ Avo vakamuteera achiri muGarire, vechimushandira; nemadzimai amweni akawanda avo vakakwira naye Jerusarema.

Kuikwa kwaJesu

⁴² Naapo kwaita madeekoni, ngokuti raiya zuva rokunasirira, ukwo kunoti raiya zuva rinotangira Sabatha.

⁴³ Kwakauya Josefa weArimathea, gota rairemeredzwa, uwo naye pachake waigarira umambo hwaMwari, wakapotera kunaPiratu ngokutsunga, akakumbira kupuwa muiri waJesu.

⁴⁴ Piratu wakashamiswa kuti waiya afa; echidaidza kwaari nduna yezana, wakaibvunza kuti watofa here?

⁴⁵ Naapo azwa ngenduna yezana kuti wafa, wakapa muiri waJesu kuna Josefa.

⁴⁶ Naye wakatenga jira rakachena, akamudzasa pashi, akamuputira mujira rakachena, akamuradzika muguwa rakatsetswa pabuwe, akamburumbudzira buwe pamusiwo weguwa.

⁴⁷ Maria Magadhareni naMaria mai aJosesi vakaona apo paakaradzikwa.