Marku 14 - Bhaibheri Rakachena muChindau

Bangano roKuuraya Jesu

¹ Kwaiya kwasara mazuva mairi kuti zuva rePhasika nomushongano wokudya Zvingwa zvisina Mumera rigume. Nevapristi vakuru nevanyori vakatsvaka kuti vangamuita mabatirenyi ngourimbwi, vamuuraye;

² ngokuti vaiti, “Haiwa ngepakati pomushongano wokudya, ngokuti pamweni kungazoita bope pakati pevanhu.”

Jesu Unodzodzwa Mafuta muBhethani

³ Naapo achiri muBhethani mumhatso yaSimoni waiya nemapere, akagara patafura, dzimai rakauya nenhera yearibhasita yemafuta enadhi, anodhura kakurutu, rakaiputsa nhera, rikaadururira musoro mwaJesu.

⁴ Asi kwaiyapo vamweni vakatsamwa vechiti, “Kwaitirwenyi uku kurashwa kwemafuta?

⁵ Ngokuti aya mafuta aizotengeswa ngemare inopinda zvigurwa zvesirivha mazana matatu, ikapuwa varombo.” Vakavhuruvhutira dzimairo.

⁶ Asi Jesu wakati, “Rirekerenyi; munoritambudzirenyi? Raita mushando wakanaka kwendiri.

⁷ Ngokuti munavo varombo nguva dzeshe, naapo mwechida mungaita zvakanaka kwavari; asi inini amuzoanenipi nguva dzeshe akadi.

⁸ Raita icho cheraikona; radzodza muiri wangu usati watsirwa.

⁹ Ngegwinyiso ndinoti kwomuri, kunyazwi ngepari apo perinozochumairwa vhangeri munyika dzeshe, neichi cheraita iri dzimai chinozoteketeswa kuita chicheredziso chake.”

Judhasi Unotenda Kutengesa Jesu

¹⁰ Zvino Judhasi Isikarioti, umwe wevanegumi navairi, wakaenda kuvapristi vakuru kuti amupire kwavari.

¹¹ Navo apo vazwa vakadakara, vakagondisa kumupa mare. Naye wakatsvaka nguva kwayo yokuti amupire.

Jesu Unodya Phasika neVadzidzi Vake

¹² Ngezuva rokutanga redhiri reZvingwa zvisina Mumera, zuva reibaiwa makwai ePhasika, vadzidzi vake vakati kwaari, “Unoda kuti tiende kuri koonasirira kuti udye Phasika?”

¹³ Naye wakatuma vairi vevadzidzi vake, akati kwavari, “Endai mudhorobha, unozoshongana nemwi mwamuna akatwara hari yemvura; muteerenyi,

¹⁴ kunyazwi ngepari paanozopotera munozoti kumuna wemhatso, ‘Mudzidzisi unoti, Riripari kamera rangu revaeni, apo pendinozodya Phasika nevadzidzi vangu?’

¹⁵ Naye unozomupangidzira kamera guru romuturika rakanasirirwa ndizvo zveshe. Naapo munozotinasirira zvokudya zvePhasika.”

¹⁶ Nevadzidzi avo vakabuda kuenda, vakaguma mudhorobha, vakaona kudai ngezvaakaronza kwavari, navo vakanasirira Phasika.

¹⁷ Naapo aamadeekoni wakaguma nevanegumi navairi.

¹⁸ Vari patafura vechidya, Jesu wakati, “Ngegwinyiso ndinoti kwomuri, umwe wenyu unozondipira, umwe uwo unodya neni.”

¹⁹ Navo vakatanga kutambudzika, vechiti kwaari umwe ngaumwe, “Ndini here?”

²⁰ Wakati kwavari, “Ngoumwe wevanegumi navairi, uwo unosheya chingwa neni mundiro imweyo.

²¹ Ngokuti Mukororo woMunhu unoenda kudai ngezvezvakanyorwa ngendaa yake, asi ihehe kwaari munhuwo Mukororo woMunhu waanozopirwa ndiye! Kwaiya kwakapinda kunaka kwaari munhuwo kudai asakabarwa.”

Chidyo chaMambo

²² Vachadya, Jesu wakatora chingwa, akabonga, wakachigura, akavapa, akati, “Torai; ichi ndiwo muiri wangu.”

²³ Wakatora tsani, naapo abonga wakaipa kwavari, navo vakamwa veshe kweiri.

²⁴ Naye wakati kwavari, “Iyi ingazi yangu yechitenderano, iyo inoparadzirwa vazhinji.

²⁵ Ngegwinyiso ndinoti kwomuri, andichazomwizve michero yemivhini metsa kuzuva iro rendinozomwa idzva muumambo hwaMwari.”

²⁶ Naapo vaemba ngoma vakabuda kuenda kuMutunhu wemaOrivhi.

Jesu Unoronza kuti Petro Unozomuramba Katatu

²⁷ Jesu wakati kwavari, “Imwimwi mweshe munozopumhuniswa, ngokuti kwakanyorwa kuti, ‘Ndinozorova muushi nemakwai anozoparadzwa.’

²⁸ Asi ngesure kwokumuswa kwangu, ndinozoenda pamberi penyu muGarire.”

²⁹ Asi Petro wakati kwaari, “Kunyazwi veshe vanozopumhuniswa, asi haiwa inini.”

³⁰ Jesu wakati kwaari, “Ngegwinyiso ndinoti kwouri, iwewe nyamashi, usiku uno jongwe risati rarira kairi, unozondiramba katatu.”

³¹ Asi iye wakaereketa ngesimba yaamho echiti, “Kunyazwi ndechizofa newe, andizokurambi akadi.” Navo veshe vakadarowo.

Jesu Unokumbira muGetsemani

³² Vakaguma kundau inozwi Getsemani; naye wakati kuvadzidzi vake, “Garai panapa inini ndechikumbira.”

³³ Wakatora naye Petro, Jakobe naJohani, wakatanga kukaruka nokutambudzika kakurutu.

³⁴ Wakati kwavari, “Mweya wangu unotambudzika kakurutu metsa mukufa. Garai panapa, murinde.”

³⁵ Naye wakaendamberi padoko, akawa pashi pamavhu, akakumbira kuti, dai zvechiitika kuti awa iri ripinde kubva kwaari.

³⁶ Naye wakati, “Aba, Baba, zviro zveshe zvinoitika kwouri; dusa iyi tsani kubva kwendiri. Asi kusaita kuda kwangu, asi kuda kwako.”

³⁷ Wakauya, akavaona vakaata, akati kunaPetro, “Simoni, waata here? Wakorera here kurinda awa rimwe?

³⁸ Rindai mukumbire kuti musapotera mukuedzwa; mweya unotenda asi nyama aina simba.”

³⁹ Wakahwirirazve, akakumbira, echiereketa mazwi ndiwo ndiwo.

⁴⁰ Wakapetukazve akaona vakaata, ngokuti madziso avo aiya echirema; navo avazi kuzia chokumupingura.

⁴¹ Wakauya ngekwechitatu, akati kwavari, “Muchakandoata here, mwechizorora? Zvakwana! Awa raguma; penyai, Mukororo woMunhu unopirwa munyara dzevashaishi.

⁴² Mirukai, tiende. Wonai uwo unondipira waa pasinde.”

Kusungwa kwaJesu

⁴³ Paripo, achaereketa, Judhasi wakaguma, umwe wevanegumi navairi, anembungano ine shoti nenduku, vechibva kuvapristi vakuru nevanyori nevakuru vevanhu.

⁴⁴ Zvinopano iye waiya akavapa chioniso echiti, “Uwo wendinozochingamidza ngomuromo ndiye; mubatenyi mumukweye ngokungwaririka.”

⁴⁵ Naapo aguma, paripo wakauya kwaari akati, “Rabhi!” Naye wakamuchingamidza ngomuromo.

⁴⁶ Navo vakamubata ngenyara dzavo vakamutora.

⁴⁷ Asi umwe weavo vaiema apo wakashwamura shoti yake, wakatema hloko yomupristi mukuru, akagura nzee yayo.

⁴⁸ Jesu wakati kwavari, “Mwabuda kundibata here kudai ngevanoambana negandanga, muneshoti nenduku?

⁴⁹ Ndaiya ndinemwi mazuva eshe muTemperi ndechidzidzisa, nemwi amuzi kundibata. Asi izvi zvinoitika kuti zvakanyorwa zvidzadzisike.”

⁵⁰ Navo veshe vakamusiya, vakatiza.

⁵¹ Jaha rakamuteera, raiya nejira rakachena rakariti kupekupe pamuiri waro risina chimweni chokusimira. Navo vakaribata,

⁵² asi iro rakasiya jira rakachena, rikatiza riri mupunu.

Jesu pamberi peVatongi veVaJudha

⁵³ Navo vakakweya Jesu kuenda naye kumupristi mukuru. Kwakaungana pamwepo vapristi vakuru veshe nevakuru vevanhu nevanyori.

⁵⁴ Petro waiya echimuteera ngokuretu, metsa wakaguma mukati muruwanze rwomupristi mukuru; naye wakagara nevarindi vomupristi mukuru nokugota muriro.

⁵⁵ Zvinopano vapristi vakuru nevatongi veshe vakatsvaka chapupu ndiJesu kuti vamuuraye, asi avazi kuchiona.

⁵⁶ Ngokuti vazhinji vakaereketa chapupu chokunyepa ndiye, nouchapupu hwavo ahuzi kutenderana.

⁵⁷ Kwakamiruka vamweni vanhu vakaita chapupu chokunyepa ndiye vechiti,

⁵⁸ “Takamuzwa echiti, ‘Ndinozoputsa iri Temperi rakaakiwa ngenyara, ngemazuva matatu ndinozoaka rimweni, risikaakwi ngenyara.’ ”

⁵⁹ Ndizvozve ngokudaro uchapupu hwavo ahuzi kutenderana.

⁶⁰ Nomupristi mukuru wakaema pakati pavo, akabvunza Jesu echiti, “Aupinguri chiro here? Chiinyi ichi chevanopupura ava ndiwe?”

⁶¹ Asi iye wakanyarara, aazi kupingura chiro. Mupristi mukuru wakamubvunzazve echiti kwaari, “Iwewe uri Kristu here, Mukororo woUwo Unomuchena?”

⁶² Jesu wakati, “Ndini; nemwi munozoona Mukororo woMunhu akagara ngokumudyo kwoUnesimba, echiuya mumakore omudenga.”

⁶³ Nomupristi mukuru wakabaura machira ake echiti, “Tichatamirenyi zvapupu?

⁶⁴ Mwazwa kutuka kwake. Munotinyi?” Navo veshe vakagura kuti unosisira kufa.

⁶⁵ Vamweni vakatanga kumupfira mata nokufukidza hope yake nokumupamhadza nokuronza kwaari kuti, “Profeta!” Nevarindi vomupristi mukuru vakamuashira ngokumupamhadza ngenyara.

Petro Unoramba Jesu

⁶⁶ Naapo Petro ari paruwanze, kwakauya kwaari umwe wevasikana vomupristi mukuru.

⁶⁷ Naye echiona Petro echigota muriro, wakamuringira, akati, “Iwewewo waiya naJesu weNazaretha.”

⁶⁸ Asi iye wakaramba echiti, “Andizii, andizwisisi kuti unotinyi.” Naye wakabuda akaenda paruwanze pamusiwo, nejongwe rakarira.

⁶⁹ Nomusikana uwo wakamuona, wakatangazve kuronzera avo vaiemapo echiti, “Uyu ndiye umwe wavo.”

⁷⁰ Asi iye wakarambazve. Ngesure kwenguva doko avo vaiemapo vakatizve kunaPetro, “Ngegwinyiso iwewe uri umwe wavo, ngokuti uri muGarire.”

⁷¹ Asi iye wakatanga kutuka nokupika echiti, “Andimuzii uyu munhu womunoereketa ndiye.”

⁷² Apapo ngokukasira jongwe rakarira kwechipiri. NaPetro wakakarakadza izwi raakaereketa Jesu kwaari rokuti, “Jongwe risati rarira kairi unozondiramba katatu.” Naapo akarakadza ngeizvo, wakachema.