Marku 13 - Bhaibheri Rakachena muChindau

Jesu Unoereketa ngoKuputswa kweTemperi

¹ Achabuda kubva muTemperi, umwe wevadzidzi vake wakati kwaari, “Mudzidzisi, ringirai, kunaka kwemapuwe aya nokunaka kwemhatso dzakadai!”

² Jesu wakati kwaari, “Unoona here idzi mhatso dzakakura? Akuzosari buwe narimwe padera pebuwe rimweni, risikazorigwi pashi.”

Madambudziko noKutambudzwa

³ Achakagara paMutunhu wemaOrivhi akaringirana neTemperi, Petro, Jakobe, Johani naAndreu vakamubvunza vari vega, vakati,

⁴ “Tironzerei, kuti izvi zvinozoitika riini nokuti chionisonyi chinozoonisa kuti izvi zviro zvoda kuitika?”

⁵ Jesu wakatanga kuvaronzera echiti, “Ngwarai kuti musazopaukiswa ngomunhu kunyazwi ngouri.

⁶ Vazhinji vanozouya ngezina rangu vechiti, ‘Ndini Kristu,’ navo vanozopaukisa vazhinji.

⁷ Naapo mwoozwa ngokurwa nemawirira okurwa, musazotambudzika; izvi zvinosisira kuti zviitike, asi magumo aasati aguma.

⁸ Ngokuti dzinza rinozomukirana nedzinza, noumambo unozomukirana noumambo; kunozoapo kuzungunyika kwenyika kundau dzakaparadzana, kunozoapo nzara. Izvi zviri kutanga kwemadambudziko.

⁹ “Asi dzingwarirenyi imwimwi pachenyu; ngekuti vanozomupira kumakota; nemwi munozorohwa mumhatso dzavo dzokudira; munozoema pamberi pevatongi nemadzimambo ngepamusoro pangu, kuita chapupu pamberi pavo.

¹⁰ Nevhangeri rinosisira kutanga kuchumairwa kumadzinza eshe.

¹¹ Naapo vanozomukweya vechimupira mukutongwa, musazodembatemba ngepamberi kuti munozoereketenyi; asi ereketai kunyazwi ngechiri chemwapuwa ngeawa iro, ngokuti andimwipi munozoereketa, asi ndiMweya Wakachena.

¹² Mukoma unozopira munun'una kuti aurawe, nababa unozopira mwana wavo, nevana vanozomukira vabari nokuvauraisa.

¹³ Nemwi munozonyenywa ndivo veshe ngendaa yezina rangu. Asi iye unozoshingirira metsa kumagumo unozoponeswa.

Chinyangadzo Chakashatisisa

¹⁴ “Naapo mwoona chinyangadzo chinoparadza chechiema apo pechisikasisiri (uwo unodzidza ngaazwisise,) zvino avo vari muJudhia ngavatizire kumitunhu;

¹⁵ nouwo uri padera pemhatso asazodzaka nokuti kupotera kutora chiro kunyazwi ngechiri mumhatso mwake;

¹⁶ nouwo uri mumunda asazopetuka sure kootora jira rake.

¹⁷ Asi ihehe kwavari vane mimba naavo vanoamwisa ngaawo mazuva!

¹⁸ Nemwi kumbirai kuti zvisazoitika ngomukuwo wechando.

¹⁹ Ngokuti ngaawo mazuva kunozoapo kutambudzika kukuru, ukwo kusikazi kumboapo kwakadaro kubvira pakutanga kwokusikwa kwaakasika Mwari metsa zvinopano, akuchatongozoitikizve kwakadaro.

²⁰ Kudai Mambo asikazi kufupisa mazuva, akuna naumwe waizoponeswa; asi ngepamusoro paavo vakatsanangurwa, avo vakatsanangura, mazuva akafupiswa.

²¹ Naapo kudai aripo munhu unozoti kwomuri, ‘Ringira, Kristu uri panapa!’ Nokuti, ‘Ringira, uri apo!’ Musazozvitenda.

²² Ngokuti vanozoapo vaKristu vokunyepa nevaprofeti vokunyepa, navo vanozoita zvioniso nezvishamiso, kupaukisa vakatsanangurwa, kudai zvechibvira.

²³ Asi ngwarai; ndamuronzera zviro zveshe nguva isati yaguma.

Kuuya kwoMukororo woMunhu

²⁴ “Asi ngaawo mazuva, ngesure kwokutambudzika ukwo, zuva rinozoita chidima nomwedzi auzojeki;

²⁵ nenyeredzi dzinozowa kubva mudenga nemasimba omudenga anozozungunyiswa.

²⁶ Naapo vanozoona Mukororo woMunhu echiuya mumakore anesimba guru nouthende.

²⁷ Naapo unozotuma ngirosi nokuunganidza vakatsanangurwa vake kubva kumhepo marongomuna, kubvira kumagumo enyika metsa kuguma kumagumo edenga.

Chidzidzo choMuonde

²⁸ “Dzidzai muedzaniso kubva pamuonde; apo dai rawo rakanyorova rooburikira mashakani aro, munozia kuti zienza raa pasinde.

²⁹ Nemwiwo ngokudaro, apo mwoona izvi zvechiitika, munozozia kuti iye uri pasinde, eya pamisiwo.

³⁰ Ngegwinyiso ndinoti kwomuri, uyu mubarirwana auzopindi izvi zveshe zvisati zvaitika.

³¹ Denga nenyika zvinozopinda, asi mazwi angu aatongozopindi.

Akuna Unozia Zuva nokuti Awa

³² “Asi ngendaa yezuva iro neawa iro, apana naumwe unozvizia, kunyazwi ngirosi dzomudenga nokuti Mukororo, asi ndiBaba ega.

³³ Ngwarai, murinde; ngokuti imwimwi amuzii nguva iyo kuti inoguma riini.

³⁴ Kwakadai ngomunhu echihamba rwendo kuenda kunyika imweni, iye wakasiya mhatso yake, wakapa varanda vake simba, umwe ngaumwe mushando wake, akapangazve murindi wepamusiwo kuti arinde.

³⁵ Ndizvo rindai, ngokuti amuzii imwimwi kuti munewemhatso unoguma riini, dangani zuva rabira, nokuti pakati pousiku, nokuti ngokurira kwejongwe, nokuti mangwanani.

³⁶ Kuti pamweni echiguma ngokukasira iye asamuona mwakaata;

³⁷ neicho chendinoronza kwomuri, ndinoronza kwavari veshe: Rindai.”