Marku 12 - Bhaibheri Rakachena muChindau

Vashandi Vakashata muMunda weMivhini

¹ Zvino wakatanga kuereketa kwavari ngemiedzaniso echiti, “Munhu wakasima munda wemivhini, wakaushoshera ngorushosha kutendenedza, wakatsa rindi rokukamurira vhini, akaaka chitumba, wakaupa kuvarimi kuti vaushandise, akaenda kunyika imweni.

² Naapo nguva yokuibva kwemichero yaguma, wakatuma muranda kuvarimi kuti aashire michero imweni yemivhini kubva kunevarimi.

³ Navo vakamubata, vakamurova, vakamupetudza asina chiro.

⁴ Wakatumazve kwavari muranda umweni, nouwo naye vakamuremadza soro rake, vakamutsverudza.

⁵ Naye wakatuma umweni, nouwo vakamuuraya. Nevamweni vazhinji ngokudaro, vakarova vamweni nevamweni vakavauraya.

⁶ Wakasara naumwe, mukororo unodikanwa; wakamutuma kwavari pakugumisira echiti, ‘Vanozoremeredza mukororo wangu.’

⁷ Asi avo varimi vakati pakati pavo, ‘Uyu ndiye unogara nhaka; uyai, ngatimuuraye, nenhaka inozoita yedu.’

⁸ Vakamubata, vakamuuraya, vakamurasha kubanze kwomunda wemivhini.

⁹ Mambo womunda wemivhini unozoitenyi? Unozouya, auraye varimi, unozopa munda wemivhini kunevamweni.

¹⁰ Amuzi kudzidza here ichi chinyorwa chinoti: “ ‘Buwe iro rakarambwa ngevaaki ndiro rakaitwa soro repakhona;

¹¹ ichi chakaitwa ndiMambo Mwari, chinoshamisa mukuona kwemadziso edu?’ ”

¹² Navo vakatsvaka kuti vamubate, asi vakatya mbungano, ngokuti vakazia kuti waiereketa muedzaniso uwo ndivo. Ndizvo vakamusiya, vakaenda.

Mubvunzo ngendaa yoKubhadhara Chibharo kunaSiza

¹³ Vakatuma kwaari vamweni vevaFarisi nevaHerodhi, kuti vamuparise ndaa mukuereketa kwake.

¹⁴ Vaguma vakati kwaari, “Mudzidzisi, tinozia kuti iwewe uri wegwinyiso, aubatiki ngoukuru hwomunhu; ngokuti auringiri hope yomunhu, asi ngegwinyiso unodzidzisa njira yaMwari. ‘Kunotenderwa here kubhadhara chibharo kunaSiza nokuti haiwa?

¹⁵ Tinozobhadhara here nokuti tisabhadhara?’ ” Asi iye echizia kudziitisa kwavo, wakati kwavari, “Munondiedzerenyi? Unzai kwendiri chigurwa chesirivha ndichione.”

¹⁶ Vakachiunza. Naye wakati kwavari, “Uyu muedzaniso nouku kunyorwa ngekwaani?” Navo vakati kwaari, “NgezvaSiza.”

¹⁷ Jesu wakati kwavari, “Bhadharai Siza zviro zvaSiza nokuti Mwari zviro zvaMwari.” Navo vakashamiswa kakurutu ndiye.

Mubvunzo ngendaa yoKumuka kweVakafa

¹⁸ Vakauya kwaari vaSadhusi, avo vanoti akuna kumuka kwevakafa, navo vakamubvunza mubvunzo vechiti,

¹⁹ “Mudzidzisi, Mosi wakatinyorera kuti, ‘Kudai mukoma womunhu echifa, echisiya mukadzi, asi asina mwana, munun'una wake ngaamutore mukadzi, abarire mukoma wake vana.’

²⁰ Vaiyapo vakoma vanomwe; wokutanga wakaroora mukadzi asi wakafa asikazi kusiya vana.

²¹ Nowechipiri wakamutora, naye wakafa asikazi kusiya vana; nowechitatu ngokudarowo.

²² Vanomwe veshe avazi kusiya vana. Ngesure kwavo veshe mukadzi wakazofawo.

²³ Mukumuka kwevakafa, apo voozomuka, unozoita mukadzi waani kwavari? Ngokuti vanomwe vakamuita mukadzi.”

²⁴ Jesu wakati kwavari, “Andikwopi kupauka kwenyu here, ngokuti amuzii zvakanyorwa nokuti simba raMwari?

²⁵ Ngokuti apo voomuka kubva kwevakafa, avazoroori nokuti kuroodzwa, asi vanozodai ngengirosi dziri mudenga.

²⁶ Asi ngendaa yevakafa kuti vanomuswa, amuzi kudzidza here mubhuku raMosi, pandau inoronza ngepfiba, ngenjira iyo Mwari yaakaereketa kwaari echiti, ‘Inini ndini Mwari waAbrahama, Mwari waIsaka naMwari waJakobe?’

²⁷ Iye aasiri Mwari wevakafa akadi, asi ndiMwari wevanopona; mwapauka kakurutu.”

Mupango Mukuru

²⁸ Kwakaguma umwe wevanyori, wakavazwa vechibvunzisana pamwepo, naye echiona kuti wakanasa kuvapingura wakamubvunza, akati, “Ngouri mupango wokutanga kweiri yeshe?”

²⁹ Jesu wakapingura akati, “Wokutanga unoti, ‘Izwai, A Isuraeri! Mambo Mwari, Mwari wedu ndiMambo Mwari umwe;

³⁰ newe unozomuda Mambo Mwari, Mwari wako, ngomwoyo wako weshe, ngomweya wako weshe, ngomupinimidzo wako weshe nesimba rako reshe.’

³¹ Nowechipiri ngouyu, ‘Unozomuda muakirwana wako kudai ngokudzida kwako iwewe pachako.’ Akuna mupango umweni wakapinda kukura kuneiyi.”

³² Nomunyori wakati kwaari, “Wanasa, Mudzidzisi; waereketa gwinyiso kuti uripo Mwari umwe, akuna umwenizve ngepabanze pake;

³³ nokumuda ngomwoyo weshe, ngokuzwisisa kweshe, ngesimba reshe, nokumuda muakirwana wako kudai ngokudzida kwako iwewe pachako, kunopinda kakurutu midiro yokupisha nemibairo yeshe.”

³⁴ Naapo Jesu aona kuti wapingura ngokungwara, wakati kwaari, “Iwewe auri kuretupi akadi kubva kuneumambo hwaMwari.” Sure kweizvi apana waishinga kuchamubvunza chiro.

Kristu Mukororo waDhavhidha Here?

³⁵ Jesu achadzidzisa muTemperi wakati, “Vanyori vanoronza ngenyi kuti Kristu mukororo waDhavhidha?

³⁶ Dhavhidha emene ari muMweya Wakachena wakati, ‘Mambo Mwari wakati kunaMambo wangu, gara ngokumudyo kwangu, metsa ndiite magaa ako chitambarariro chetsoka dzako.’

³⁷ Dhavhidha emene unomudaidza kuti Mambo; ndizvo uri mukororo wake ngenjiranyi?” Nouzhinji hwevanhu vakamuzwa ngokudakara.

Jesu Unonyowedza Vanhu ngendaa yeVadzidzisi veMipango yaMosi

³⁸ Mukudzidzisa kwake wakati, “Ngwarai vanyori, avo vanodisisa kuhamba vakapfeka machira akareba, nokuchingamidzwa mundau dzemisika,

³⁹ nezvigaro zvepamberi mumhatso dzokudira nendau dzepamberi mumadhiri.

⁴⁰ Avo vanochakata mhatso dzeshirikadzi, vachidzionisa kudai ngevanhu vakanaka ngokurebesa mikumbiro. Vanozoashira kurashwa kwakanyanyisa kukura.”

Chipo cheShirikadzi Chinopinda Zveshe

⁴¹ Jesu wakagara pashi pasinde pebhokisi rezvipo, wakaringira mapire embungano mare mubhokisi rezvipo. Nevazhinji vaiya nepfuma vaipamwo yakawanda.

⁴² Kwakaguma shirikadzi yaiya murombo, yakapa zvigurwa zviiri zvemare, zvinoita sendi.

⁴³ Wakadaidza kwaari vadzidzi vake, akati kwavari, “Ngegwinyiso ndinoti kwomuri, iyi shirikadzi murombo yapa kupinda avo veshe vapa mubhokisi rezvipo.

⁴⁴ Ngokuti avo veshe vapa ngouwandu hwepfuma yavo; asi iyo mukutama kwayo yapa zveshe zveyaiya nazvo, zveshe zveinopona ndizvo.”