Marku 11 - Bhaibheri Rakachena muChindau

Jesu Mambo Unopotera muJerusarema Akagadha Mbongoro

¹ Naapo vakwedzera Jerusarema, kuBhethifaje nokuBhethani, paMutunhu wemaOrivhi, wakatuma vairi vevadzidzi vake,

² wakati kwavari, “Endai muguta remwakaringirana naro, naapo muchapotera kweriri, paripo munozoona tsiru rembongoro rakasungwa, iro risikazi kumbogadhwa ngomunhu; risunhurenyi muuye naro.

³ Kudai munhu echizoti kwomuri, ‘Munorisunhurirenyi?’ Munozoti, ‘Mambo unorida, paripo unozoripetudzazve panapa.’ ”

⁴ Navo vakaenda, vakaona tsiru rembongoro rakasungwa pasinde pomusiwo ngokubanze mupato, navo vakarisunhura.

⁵ Vamweni vaiya vakaema apo vakati kwavari, “Munoitenyi, mwechisunhura tsiru rembongoro?”

⁶ Vakaronza kwavari kudai ngezvaakaronza Jesu; navo vakavatendera.

⁷ Vakaunza tsiru rembongoro kunaJesu, vakakandira machira avo padera paro, naye wakagara padera paro.

⁸ Vanhu vazhinji vakachinga machira avo munjira, nevamweni matai evakatema mushango.

⁹ Avo vaihamba ngepamberi naavo vaiteera ngesure vakadaidzira vechiti, “Hosana! Unomuchena uwo unouya ngezina raMambo!

¹⁰ Unomuchena umambo uwo unouya waBaba edu Dhavhidha! Hosana mudengadenga!”

¹¹ Naapo Jesu wakapotera muJerusarema, akapinda muTemperi; naapo aringaringa zviro zveshe, zuva rabira wakabuda kuenda muBhethani pamwepo nevanegumi navairi.

Jesu Unotuka Muonde

¹² Nechimangwani voobva Bhethani, iye wakazwa nzara.

¹³ Echiona muonde kuretu unemashakani, wakenda kwouri kuti pamweni ungaona michero kwouri. Naapo aguma kwouri aazi kuona michero, kwega mashakani, ngokuti yaiya isati yaanguva yemaonde.

¹⁴ Jesu, wakati kumuonde, “Apana munhu uchazodya michero kubva kwouri mhera nariini.” Nevadzidzi vake vakazvizwa.

Jesu Unodzinga Vanhu Vaitengesa muTemperi

¹⁵ Vakaguma muJerusarema. Apotera muTemperi wakatanga kudzinga avo vaitengesa nevaitenga muTemperi, naye wakapinduridza matafura eavo vaitenganisana mare nezvigaro zveavo vaitengesa njia;

¹⁶ naye aazi kutendera naumwe kutwara chidziyo kunyazwi ngechiri muTemperi.

¹⁷ Wakavadzidzisa, akati kwavari, “Akuzi kunyorwa here kuti, “Mhatso yangu inozozwi imhatso yokudira yemadzinza eshe? Asi imwimwi mwaiita bako remadzongoni.”

¹⁸ Vapristi vakuru nevanyori vakazvizwa, navo vakatsvaka kuti vangamuita maurairenyi; ngokuti vaimutya, ngokuti mbungano yeshe yakashamiswa ngokudzidzisa kwake.

¹⁹ Naapo zuva rabira vakabuda kubva mudhorobha.

Chidzidzo choMuonde Wakatukwa

²⁰ Mangwanani maishi vechipinda ndipo, vakaona muonde wazeketera metsa kunzinde.

²¹ Petro echikarakadza wakati kwaari, “Rabhi, penya! Muonde wewakatuka wazeketera.”

²² Jesu wakapingura, akati kwavari, “Gondai munaMwari.

²³ Ngegwinyiso ndinoti kwomuri, kunyazwi ndiani unozoti kuneiri dunhu, ‘Bvitwa, uposherwe muruandhle,’ asikagonondi mumwoyo mwake, asi echigonda kuti icho chaaronza chinozoitika, chinozoitika kwaari.

²⁴ Ndizvo ndinoti kwomuri, zveshe zvomunokumbira nezvomunokumbirira, gondai kuti mwaashira, munozoa nazvo.

²⁵ Naapo mwaema mwechikumbira, rekererai, kunyazwi ndiani unendaa kwomuri; kuti Baba enyu arimudenga amurekererewo zvishaishi zvenyu. [

²⁶ Asi kudai musikarekereri, naBaba enyu arimudenga aazomurekereri zvishaishi zvenyu.”]

Simba raJesu Rinobvunzwa

²⁷ Vakauyazve Jerusarema. Naapo echihamba muTemperi, vakauya kwaari vapristi vakuru nevanyori nevakuru vavo

²⁸ navo vakati kwaari, “Unoita izvi zviro ngesimba raani? Nokuti ndiani wakakupa iri simba rokuita izvi zviro?”

²⁹ Jesu wakati kwavari, “Neniwo ndinozomubvunza mubvunzo umwe; kudai mwechizondipingura, ndinozomuronzera kuti ngesimbaraani rendinoita ndiro izvi zviro.

³⁰ Rubhabhatidzo rwaJohani rwakabva mudenga here nokuti kuvanhu? Ndipingurenyi.”

³¹ Navo vakapangana pakati pavo vechiti, “Kuti tikati, ‘Rwakabva mudenga,’ iye unozoti, ‘Ndizvo amuzi kumutenda ngenyi?’

³² Asi tikati, ‘Rwakabva kuvanhu,’ ” vaitya mbungano ngokuti veshe vaitenda kuti Johani waiya muprofeti wegwinyiso.

³³ Ndizvo vakapingura Jesu vakati, “Atizii.” NaJesu wakati kwavari, “Neni andizomuronzeri kuti isimbaraani rendinoita ndiro izvi zviro.”