Marku 10 - Bhaibheri Rakachena muChindau

Jesu Unodzidzisa ngoKurambana

¹ Wakabvapo akaenda kunyika yeJudhia noruseri rweJorodhani. Mbungano yakaunganazve kwaari; kudai ngokuita kwake, wakavadzidzisazve.

² VaFarisi vakauya kwaari, vakamubvunza vechimuedza vechiti, “Kunotenderwa here kuti mwamuna arashe mukadzi wake?”

³ Wakapingura akati kwavari, “Chiinyi chaakapanga Mosi kwomuri?”

⁴ Navo vakati, “Mosi wakatenda kuti kunyorwe tsamba yokumuramba nokuparadzana naye.”

⁵ Asi Jesu wakati kwavari, “Ngendaa yokukonza kwomwoyo yenyu iye wakamunyorera uyu mupango.

⁶ Asi kubvira pakutanga kwokusikwa, ‘Mwari wakavasika mwamuna nomukadzi.’

⁷ ‘Ngeiyi ndaa mwamuna unozosiya baba ake namai, abatirire kumukadzi wake,

⁸ navo vairi vanozoita nyama imwe.’ Ngokudaro avachaiti vairi, asi nyama imwe.

⁹ Ndizvo chaakasunganidza Mwari, munhu asazosunhura.”

¹⁰ Vaa mumhatso vadzidzi vake vakamubvunzazve ngeiyi ndaa.

¹¹ Wakati kwavari, “Iye unozorasha mukadzi wake, aroore umweni, unoomba echishaishira mukadzi wake.

¹² Kunyazwi mukadzi naye akarasha mwamuna wake, akaroorwa ngoumweni, unoomba.”

Jesu Unofumisa Vana Vadoko

¹³ Vaiunza vana vadoko kwaari kuti avabate; asi vadzidzi vakavarambidza.

¹⁴ Asi Jesu echiona wakashishwa akati kwavari, “Tenderai vana vadoko vauye kwendiri, musavarambidza; ngokuti umambo hwaMwari ngehwevakadai ngeava.

¹⁵ Ngegwinyiso ndinoti kwomuri, iye usikaashiri umambo hwaMwari kudai ngemwana mudoko aatongozopoteri mwouri.”

¹⁶ Naye wakavatengura, akavafumisa, echiisa nyara dzake padera pavo.

Munhu Mupfumi

¹⁷ Naapo Jesu echitanga rwendo rwake, kwakarumba umwe echiuya kwaari, akamugwadamira, akamubvunza kuti, “Mudzidzisi wakanaka, chiinyi chendingaita kuti ndigare nhaka yokupona kusikaperi?”

¹⁸ Jesu wakati kwaari, “Unondidaidza ngenyi kuti, Wakanaka? Akuna wakanaka, asi umwe ega Mwari.

¹⁹ Unozia mipango inoti: ‘Usauraya, usaomba, usaba, usaita chapupu chokunyepa, usachengedzera munhu, remeredza baba ako namai ako.’ ”

²⁰ Wakati kwaari, “Mudzidzisi, izvi zveshe ndakazvingwarira kubvira muudoko hwangu.”

²¹ Jesu echimuringira wakamuda, akati kwaari, “Chiro chimwe chinotamika kwouri; enda utengese zvounazvo, upe kuvarombo, newe unozoa nepfuma kudenga; uuye, unditeere.”

²² Iye wakatambudzika ngeizwi iro, akaenda echisvipa mwoyo, ngokuti waiya nepfuma zhinji.

²³ Jesu aringaringa wakati kuvadzidzi vake, “A, kukonzanyi kwavari avo vanoupfumi kupotera muumambo hwaMwari!”

²⁴ Vadzidzi vakashamiswa ngemazwi ake. Asi Jesu wakapingurazve, akati kwavari, “Vana, kwakakonza kupotera muumambo hwaMwari!

²⁵ Kwakapinda kureruka kuti ngamera ripotere ngepauri renaiti kune kuti mupfumi apotere muumambo hwaMwari.”

²⁶ Vakashamiswa kupinda binzo, vechiti pakati pavo, “Ndiani zvinopano ungaponeswa?”

²⁷ NaJesu echivaringira wakati, “Kuvanhu azvingaitiki, asi haiwa kunaMwari, ngokuti zviro zveshe zvinoitika kunaMwari.”

²⁸ Petro wakatanga kuti kwaari, “Penya, isusu takasiya zveshe tikakuteera.”

²⁹ Jesu wakati, “Ngegwinyiso ndinoti kwomuri, akuna munhu wakasiya mhatso nokuti vanun'una nokuti vakunda nekuti mai nokuti baba nokuti vana nokuti minda ngepamusoro pangu nepevhangeri,

³⁰ usikazoashiri zana rakapetwa zvinopano ngenguva iyi, mhatso, vanun'una, vakunda, madzimai, vana neminda, pamwepo nokushononeswa, nepanguva inozouya unozoashira kurarama kusikaperi.

³¹ Asi vazhinji vokutanga vanozoita vokugumisira, naapo vokugumisira vanozoita vokutanga.”

Jesu Unoereketa kwechitatu ngendaa yoKufa noKumuka kwake

³² Vaiya munjira, vechikwira kuenda Jerusarema, naJesu waihamba pamberi pavo; vakashamiswa, naavo vakamuteera vakatya. Naye wakatorazve vanegumi navairi, wakatanga kuvaronzera zvinozomugumira

³³ echiti, “Penyai, tinokwira Jerusarema, noMukororo woMunhu unozopirwa kuvapristi vakuru nevanyori, navo vanozomutongera rufu, vanozomupira kunevemadzinza;

³⁴ navo vanozomuitira jee nokumupfira nokumurova nokumuuraya; ngesure kwemazuva matatu unozomukazve.”

Chikumbiro chaJakobe naJohani

³⁵ Jakobe naJohani, vakororo vaZebhedhi, vakakwedzera kwaari vechiti kwaari, “Mudzidzisi, tinoda kuti utiitire kunyazwi chiinyi chetinozokumbira.”

³⁶ Wakati kwavari, “Munoda kuti ndimuitirenyi?”

³⁷ Navo vakati kwaari, “Titendere isusu kuti tigare umwe ngokumudyo kwako noumweni ngokumuoshwe kwako muuthende hwako.”

³⁸ Asi Jesu wakati kwavari, “Amuzii chomunokumbira. Munesimba here rokumwa tsani yendinomwa nokuti kubhabhatidzwa ngorubhabhatidzo rwendinobhabhatidzwa ndirwo?”

³⁹ Navo vakati kwaari, “Tinokona.” NaJesu wakati kwavari, “Tsani yendinomwa munozoimwawo, norubhabhatidzo rwendinobhabhatidzwa ndirwo munozobhabhatidzwa ndirwo;

⁴⁰ asi kugara ngokumudyo kwangu nokumuoshwe kwangu andinipi ndinopa, asi ngekwaavo vakakunasirirwa.”

⁴¹ Naapo vanegumi vazwa, vakatanga kushishirwa Jakobe naJohani.

⁴² Naapo Jesu avadaidza kwaari wakati kwavari, “Munozia kuti avo vanosisira kutonga vemadzinza vanesimba padera pavo. Nevakuru vavo vanesimba padera pavo.

⁴³ Asi akuzodaropi kwomuri; asi kunyazwi ndiani uwo unoda kuita mukuru kwomuri ngaaite mushandiri wenyu,

⁴⁴ nouwo unoda kudziita wokutanga pakati penyu ngaaite hloko yavo veshe.

⁴⁵ Ngokuti noMukororo woMunhu aazi kuuya kushandirwa, asi kushandira, nokupa kupona kwake kuti kuite muripo wevazhinji.”

Jesu Unopembenudza Bofu Bhathimeusi

⁴⁶ Vakaguma muJerikho; naapo echibva muJerikho nevadzidzi vake nembungano huru, Bhathimeusi, mukororo waThimeusi, bofu, mupemhi, waiya akagara ngepamhiri penjira.

⁴⁷ Echizwa kuti ndiJesu weNazaretha, wakatanga kuboorera echiti, “Jesu Mukororo waDhavhidha, ndiitire nyasha!”

⁴⁸ Vazhinji vakamukaraidza kuti anyarare, asi iye wakapindisisa kuboorera kakurutu echiti, “Mukororo waDhavhidha, ndiitire nyasha!”

⁴⁹ Naapo Jesu wakaema akati, “Mudaidzenyi.” Vakadaidza bofu, vechiti kweriri “Tsunga; miruka, unokudaidza.”

⁵⁰ Naro rechirasha jira raro rakatomukira mudenga, rakaguma kunaJesu.

⁵¹ Jesu wakaribvunza, akati, “Chiinyi chounoda kuti ndikuitire?” Nebofu rakati kwaari, “Rabhoni, kuti ndione.”

⁵² Jesu wakati kweriri, “Enda; kutenda kwako kwakuponesa.” Paripo rakaona rakamuteera munjira.