Marku 1 - Bhaibheri Rakachena muChindau

Chumairo yaJohani Mubhabhatidzi

¹ Kutanga kwevhangeri raJesu Kristu, Mukororo waMwari.

² Kudai ngezvezvakanyorwa munaIsaya muprofeti, “Ringirai, ndinotuma munyai wangu pamberi pehope yako, uwo unozonasirira njira yako.

³ Izwi rounodaidzira mushango kuti, ‘Nasirirai njira yaMambo, ruramisai makwara ake.’ ”

⁴ Wakauya Johani uwo waibhabhatidza mushango, echichumaira rubhabhatidzo rwokutenderuka kwokurekererwa zvishaishi.

⁵ Vakabuda kuenda kwaari venyika yeshe yeJudhia, navo veshe veJerusarema; navo vakabhabhatidzwa ndiye murwizi rweJorodhani, vechitenda zvishaishi zvavo.

⁶ NaJohani waiya akafuka jira remamviri engamera anebhande redoo muchiunu chake, naye wakadya ndongwe neuchi womushango.

⁷ Naye wakachumaira echiti, “Iye unouya sure kwangu unesimba kupinda inini, andisisiri kuti nditsikitsire ndisunhure rusinga rwemagwada ake.

⁸ Inini ndakamubhabhatidza mumvura; asi iye unozomubhabhatidza ndiMweya Wakachena.”

Kubhabhatidzwa noKuedzwa kwaJesu

⁹ Ngemazuva awo, Jesu wakabva Nazaretha reGarire, akabhabhatidzwa ndiJohani muJorodhani.

¹⁰ Paripo achabuda kubva mumvura wakaona denga rechibeurwa, noMweya wechidzaka padera pake kudai ngenjia

¹¹ neizwi rechibva mudenga rechiti, “Iwewe ndiwe Mukororo wangu unodikanwa, uwo wendinonasa kudakara ndiye.”

¹² Paripo Mweya wakamusundira mushango.

¹³ Waiyamwo mushango mazuva makumi marongomuna, echiedzwa ndiSathani, naye waiya pamwepo nezvikara zvomushango, nengirosi dzakamushandira.

Jesu Unodaidza Vadzidzi vake voKutanga

¹⁴ Ngesure kwokusungwa kwaJohani, Jesu wakauya muGarire echichumaira vhangeri raMwari

¹⁵ echiti, “Nguva yasvika noumambo hwaMwari hwaapasinde; tenderukai, mutende vhangeri.”

¹⁶ Echipinda ngepasinde peruandhle rweGarire, wakaona Simoni naAndreu munun'una waSimoni vechikandira nhaa muruandhle; ngokuti vaiya vabati vehove.

¹⁷ Jesu wakati kwavari, “Nditeerei neni ndinozomuita vabati vevanhu.”

¹⁸ Paripo vakasiya nhaa dzavo vakamuteera.

¹⁹ Echipinda mberi pafupi, wakaona Jakobe mukororo waZebhedhi naJohani munun'una wake, vaiya mungarava vechinasirisa nhaa dzavo.

²⁰ Paripo wakavadaidza; vakasiya baba avo Zebhedhi nevaranda vari mungarava, navo vakamuteera.

Jesu Unoponesa Munhu Une Mweya Unetsvina

²¹ Vakahamba kuenda muKhapernaume, paripo ngezuva reSabatha wakapotera mumhatso yokudira akadzidzisa.

²² Vakashamiswa ngokudzidzisa kwake, ngokuti wakavadzidzisa kudai ngounesimba asikaiti kudai ngevanyori.

²³ Paripo waiyapo munhu mumhatso yavo yokudira, waiya nomweya une tsvina,

²⁴ naye wakadaidzira echiti, “Tinenyi isusu newe, Jesu weNazaretha? Wauya kutiparadza here? Ndinokuzia kuti urianani, uri Wakachena waMwari.”

²⁵ Jesu wakamukaraidza echiti, “Nyarara, buda kubva kwaari.”

²⁶ Nomweya unetsvina wakamusukumidza, ukaboorera ngeizwi guru, ukabuda kubva mwaari.

²⁷ Navo veshe vakashamiswa, ngokudaro vakabvunzisana vechiti, “Chiinyi ichi? Kudzidzisa kutsva kunesimba! Unopanga kunyazwi mweya inetsvina, nayo inomupurutana.”

²⁸ Paripo mbiri yake yakapararira kunyika dzeshe dzakatendenedza Garire.

Jesu Unoponesa Ambuya vaSimoni neVazhinji Vamweni

²⁹ Paripo abuda kubva mumhatso yokudira, wakapotera mumhatso yaSimoni naAndreu, pamwepo naJakobe naJohani.

³⁰ Ambuya vaSimoni vaiya vakaata vechirwara ngemutsarara, paripo vakamuronzera ndivo.

³¹ Naye wakauya kwavari, akavabata ngenyara, akavamirudza; nemutsarara wakavasiya, navo vakavashandira.

³² Madeekoni zuva rabira vakaunza kwaari veshe vairwara nevaiya nemadhimoni.

³³ Nevedhorobha reshe vakaungana pamusiwo.

³⁴ Naye wakaponesa vazhinji vairwara ngenhenda dzakaparadzana, akadzinga madhimoni mazhinji, asikatenderi kuti madhimoni aerekete, ngokuti aimuzia.

Jesu Unochumaira muGarire

³⁵ Mumangwanani maishi wakamiruka, akabuda akaenda pandau iri yega, akakumbira aripo.

³⁶ Simoni naavo vaiya naye vakateera vechimutsvaka yaamho.

³⁷ Vakamuona, vakati kwaari, “Veshe vanokutsvaka.”

³⁸ Wakati kwavari, “Ngatiende kumaguta amweni, kuti ndimbochumairazve iyoyo, ngokuti ngezvandakauyira.”

³⁹ Wakahamba echichumaira mumhatso dzavo dzokudira muGarire mweshe, echidzinga madhimoni.

Jesu Unomhodyosa Munhu waiya neMapere

⁴⁰ Wakauya kwaari munhu waiya nemapere, akamugwadamira, echimupota echiti kwaari, “Kudai wechida ungandimhodyosa.”

⁴¹ Naye wakamuzwira urombo, wakatambanudza nyara yake, akamubata akati kwaari, “Ndinoda, mhodyoswa.”

⁴² Paripo mapere akabva kwaari, naye wakamhodyoswa.

⁴³ Wakamupangirisa, akamuendesa paripo,

⁴⁴ akati kwaari, “Ngwara kuti usazoronzera munhu ngeizvi; asi enda, udzipangidzire kunemupristi, uhine ngendaa yokumhodyoswa kwako izvo zvaakaemesa Mosi, kuita chapupu kwavari.”

⁴⁵ Asi iye wakabuda, akatanga kuchumaira kakurutu nokuereketa ngeizvi, ngokudaro Jesu waiya asikachakoni kupotera mudhorobha pamhene, asi waiya kubanze pandau iri yega; navo vakauya kwaari kubva kumarutii eshe.