Mar. 3 - Bhaibheri Rakachena muChindau

¹ “Ringirai, ndinotuma mutumwa wangu kunasirira njira pamberi pangu, naMambo Mwari, womunotsvaka unozouya ngokukasira kutemperi rake. Mutumwa wechitenderano uwo womunodakara yaamho mwaari, ringira unouya,” unoronza Mambo Mwari wehondo.

² Asi ndiani uwo ungakona kutsunga ngezuva rokuuya kwake? Ndiani uwo ungakona kuema apo ooneka? Ngokuti iye wakadai ngomuriro womueresi, nokudai ngesipo yomusuki;

³ unozogara kudai ngomueresi nomupereresi wesirivha, unozochenesa mibarirwana yaRevhi, nokuvapereresa kudai ngomukore nesirivha, metsa vapire zvipo zvemidiro kunaMambo Mwari mukururama.

⁴ Zvino munikero waJudha neJerusarema unozodakadza Mambo Mwari, kudai ngemazuva ekaretu nokudai ngemakore akapinda.

⁵ “Zvino ndinozokwedzera kwomuri kutonga; ndinozoita chapupu chinokasira kupupura kuitira ndaa vanoringidza, vanoomba, vanopika ngokunyepa, vanotambudza nokunyima musharo wevashandi, weshirikadzi, wenherera, naavo vanopaukisa vapara, vasikandityi,” unoronza Mambo Mwari wehondo.

Kubhadharwa kweChegumi

⁶ “Ngokuti inini Mambo Mwari andipinduki; ndizvo imwimwi, O vana vaJakobe, amuzi kupedzwa.

⁷ Kubvira kumazuva emadzibaba enyu mwakapauka kubva kuzviemeso zvangu, amuzi kuzvingwarira. Petukai kwendiri, neni ndinozopetuka kwomuri,” unoronza Mambo Mwari wehondo. “Asi munoti, ‘Toita mapetukirenyi?’

⁸ Munhu unozobira Mwari here? Asi imwimwi munondibira. Asi munoti, ‘Tinokubira ngokudini?’ Mukupa kwenyu chimwe chegumi neminikero.

⁹ Munotukwa ngechituko, ngokuti munondibira, dzinza renyu reshe.

¹⁰ Unzai zvegumi zvakazara mudura mwangu, kuti kudya kuapo mumhatso mwangu, muizvi mundiedze,” unoronza Mambo Mwari wehondo; “Ringirai kuti andizomubeuriri mafasitera omudenga, ndimudururire chifumiso chinofashukira, kuti kutamike nendau yakakwana yokuchiashira.

¹¹ Neni ndinozorambidza udyi ngendaa yenyu, nahwo ahuzopedzi michero yeivhu renyu; mivhini yenyu muminda aizoporodzi michero yayo,” unoronza Mambo Mwari wehondo.

¹² “Zvino madzinza eshe anozomuerenga kuti munomuchena, ngokuti munozoita nyika inodakadza,” unoronza Mambo Mwari wehondo.

Chigondiso chaMwari cheNyasha

¹³ “Mwaereketa mazwi ehasha kundirwisa,” unoronza Mambo Mwari. “Asi munoti, ‘Taita maereketerenyi kurwisana newe?’

¹⁴ Mwati, ‘Akudetseri chiro kushandira Mwari. Tinouyirwa ngenyi ngokungwarira zviemeso zvake, nokuhamba techichema pamberi paMambo Mwari wehondo?

¹⁵ Zvino tinoerenga kuti vanodzikudza vanomuchena; vanoita zvakashata vakagarisika, asi apo vanoedza Mwari vanopokonyoka.’ ”

¹⁶ Zvino avo vakaremeredza Mambo Mwari vakaereketa umwe kunoumweni. Mambo Mwari wakapurutana, wakazwa, nebhuku romukarakadziso rakanyorwa pamberi pake raavo vakaremeredza Mambo Mwari nokupinimidza ngezina rake.

¹⁷ “Navo vanozoita vangu,” unoronza Mambo Mwari wehondo, “Vangu vemene ngeiro zuva rendinozoita; neni ndinozovakungurira, kudai ngomunhu unokungurira mwana wake emene, uwo unomushandira.

¹⁸ Zvino kamwezve munozoona muparadzaniso pakati pevakarurama nevakashata, pakati pouwo unoshandira Mwari nouwo usikamushandiri.”