Mar. 2 - Bhaibheri Rakachena muChindau

¹ “Nazvino, O vapristi, uyu mutemo ngewenyu.

² Kuti imwimwi musikazopurutani, kuti musikazouisi mumwoyo, kuirikidza zina rangu,” unoronza Mambo Mwari wehondo, “Zvino ndinozounza chituko padera penyu, neni ndinozotuka zvifumiso zvenyu; ngegwinyiso ndazvituka, ngokuti amuzi kuuisa mumwoyo.

³ Ringirai, ndinozokaraidza mibarirwana yenyu, nokuseta hope dzenyu ngemadisa, madisa emishongano yenyu yokudira; nemwi munozobviswa pamwepo nawo.

⁴ Ziai zvino kuti ndatumira uyu mutemo kwomuri, kuti chitenderano changu naRevhi chigare chiripo,” unoronza Mambo Mwari wehondo.

⁵ “Chitenderano changu naye chaiya chitenderano chokupona nokunyarara, icho chendakamupa; izvi zvaida kuremeredza naye wakandiremeredza nokuema mukutya zina rangu.

⁶ Kudzidzisa kwegwinyiso kwaiya mumuromo wake, nokushata akuzi kuoneka mumiromo yake. Wakahamba neni mukunyarara nomukururama, wakatenderudza vazhinji kubva mukushata.

⁷ Ngokuti miromo yomupristi ngaingwarire kuzia, nevanhu vanosisira kutsvaka kudzidziswa kubva kumuromo wake, ngokuti mutumwa waMambo Mwari wehondo.

⁸ “Asi mwakapauka kubva munjira; mwaita kuti vazhinji vapumhunwe ngemitemo yenyu; mwasvipisa chitenderano chaRevhi,” unoronza Mambo Mwari wehondo.

⁹ “Ndizvo inini ndinomuita vanoshooreka nevari pashi pamberi pevanhu veshe, kudai ngezvomusikazi kungwarira njira dzangu, asi mwakatonga ngomukheto mukudzidzisa kwenyu.”

Kusikagondeka kweVanhu kunaMwari

¹⁰ Atina baba umwe teshe here? Atizi kusikwa ndiMwari umwe here? Ngenyi zvino techichengedzerana umwe ngaumwe, ngokusvipisa chitenderano chemadzibaba edu?

¹¹ Judha waiya asina kugondeka, nechiro chinonyangadza chaitwa muIsuraeri nomuJerusarema; ngokuti Judha wakasvipisa ndau yakachena yaMambo Mwari yaanoda, waroora mwanasikana wechimwari chipara.

¹² Mambo Mwari ngaauraye kubva kumatende aJakobe munhu weshe unoita izvi, mupupuri weshe nokuti mupinguri, nouwo unopa munikero kunaMambo Mwari wehondo.

¹³ Neizvi munoitawo: Munofukidza arita raMambo Mwari ngemasodzi, ngokuchema nokuboorera, ngokuti iye warekera kupinimidza ngomunikero, nokuti kuuashira ngokudakara kubva kunyara dzenyu.

¹⁴ Munobvunza mwechiti, “Ngenyi asikaiti?” Ngokuti Mambo Mwari uri chapupu pakati pako nomukadzi woutsva hwako, uwo wousikazi kugondeka kwaari, kunyazwi mungani wako, nomukadzi wechitenderano chako.

¹⁵ Aazi kuita umwe here? Zveshe nyama nomweya ngezvake. Chiinyi chaanoda? Mibarirwana yevanodira Mwari. Ndizvo dziringire pachako, usatendera mweya naumwe kuita usikagondeki kumukadzi woutsva hwake.

¹⁶ “Ngokuti ndinonyenya kurambana,” unoronza Mambo Mwari, Mwari waIsuraeri, “Ngokuti umwe unofukidza zvokufuka zvake ngokugebenga,” unoronza Mambo Mwari wehondo. Ndizvo ngwarirai kumweya wenyu, kuti musaita vasikagondeki.

Zuva roKutonga Raapasinde

¹⁷ Mwarembesa Mambo Mwari ngemazwi enyu. Asi munoti, “Tamurembesa ngokudini?” Ngokuronza, “Veshe vanoita zvakashata vakanaka mukuona kwaMambo Mwari, naye unodakara ndivo;” nokuti ngokubvunza kuti “Uri pari Mwari wokutonga kwakanaka?”